Հայաստանի ազգային հավաքականի գլխավոր մարզիչ Ջոն վան՛տ Սխիպը Կոսովոյից կրած 2։5 հաշվով պարտությունից հետո պատասխանել է լրագրողների հարցերին։
«Եթե նայենք առաջին 60 րոպեին՝ մինչև 11-մետրանոցի դրվագը, մենք կազմակերպված ֆուտբոլ էինք ցուցադրում, ունեինք կառուցվածք, իհարկե մրցակիցն ավելի շատ էր տիրում գնդակին ու նաև պահեր ունեին, բայց 11-մետրանոցից հետո մենք կորցրինք խաղի կառուցվածքը, ինչպես նաև խաղացողների մոտ հոգնածություն նկատվեց։ Ստեղծված իրավիճակի լուծումներից մեկն այն է, որ ֆուտբոլիստները պետք է խաղան իրենց ակումբներում՝ ամենաբարձր մակարդակով։ Սևիկյանը, Թիկնիզյանը քիչ խաղաժամանակ են ստանում իրենց ակումբներում, և դա իր ազդեցությունն ունենում է այս մակարդակում խաղալու տեսանկյունից։ Նույնը վերաբերում է նաև Միրանյանին, Համբարձումյանին, որին մենք ցանկանում էինք փոխարինել մինչև 11-մետրանոցի դրվագը»,- ասել է մարզիչը։
Լրագրողների հարցին՝ որքանո՞վ է արդար պարտության հիմնական պատճառը նշել ֆուտբոլիստների՝ քիչ խաղաժամանակ ստանալը, այն պարագայում երբ թիմի հայտացուցակում կան խաղացողներ, որոնք բավարար խաղաժամանակ են ստանում, ինչպես օրինակ Նարեկ Գրիգորյանը, մարզիչն ասել է․ «Այո, մասամբ ճիշտ եք, բայց երբ 3 օրում երկու խաղ պետք է անցկացնես, ստիպված ես բալանսավորված ընտրություն կատարել։ Ընդ որում, խոսքը նաև ոչ միայն խաղաժամանակի, այլև այն առաջնությունների մասին է, որտեղ մեր ֆուտբոլիստները խաղում են։
Միրանյա՞նը․ նա բավարար որակներ ունի, այո շատ խաղաժամանակ չի ստանում իր ակումբում, բայց հանդես է գալիս լավ առաջնությունում, մարզվում է այդ պայմաններում։ Խաղի վերջին 15 րոպեում կարող էր օգուտ տալ թիմին, բայց երբ նա դուրս եկավ խաղադաշտ, թիմն արդեն իսկ կռիվ էր տալիս ու այնքան էլ լավ վիճակում չէր։ Մենք այս խաղացողի կարիքն ունեինք, քանի որ պետք է ավելի մեծ ճնշում գործադրեինք։ Այս պահին ես չեմ տեսել Հայաստանի առաջնությունում իսկապես լավ հարձակվողի, որը պատրաստ է այս մակարդակում 90 րոպե խաղալու: Դժվար է, բայց պետք է աշխատել, ընտրությունը մեծ չէ։ Այս խաղացողների հատկանիշների բարելավման պարագայում կարող ենք հաջողության հասնել։ Հուսով եմ՝ նրանք կսկսեն ավելի բարձրակարգ թիմերում խաղալ։ Միայն այդ դեպքում կարող ենք ուժեղ հավաքական ունենալ»։
Անդրադառնալով դարպասապահ Հենրի Ավագյանի գործողություններին՝ մարզիչը բավական բարձր է գնահատել նրա խաղը, որոշ դրվագներում կատարած սեյվերն ու համարձակ որոշումները։ Ընդհանուր առմամբ, մարզիչը նշել է՝ բոլոր խաղացողները ներդրել են իրենց ողջ ուժերը։
«Բարկացած չէի, այլ հիասթափված, իսկ դա բնական է նման պարտությունից հետո»,- ասել է մարզիչը։
