«Ռեալ Սոսյեդադը» պատրաստվում է ամռանը, որը կնշանավորի մեծ փոփոխությունների սկիզբը։ Դեռ նախորդ տարի ակումբը հանդես էր գալիս Չեմպիոնների լիգայում, իսկ այս մրցաշրջանում թիմը Լա լիգայի մրցաշարային աղյուսակի երկրորդ հատվածում է։
Սան Սեբաստիանի ակումբը փոփոխությունների կենթարկվի ոչ միայն իր կառավարման կառուցվածքում՝ Իմանոլ Ալգուասիլի և Ռոբերտո Օլաբեի նախատեսված հեռանալու պատճառով, այլև հանդերձարանում, որտեղ կարող են տեղի ունենալ նշանակալի փոփոխություն։ Ակումբն, ամենայն հավանականությամբ, կմնա առանց եվրագավաթների հաջորդ մրցաշրջանում և դա կարող է զգալիորեն ազդել բասկերի ֆինանսական իրավիճակի վրա։
Նախ մարզչի մասին․ Ալգուասիլը ակումբում որպես գլխավոր մարզիչ աշխատում է 2018 թվականից, մինչ այդ նա 7 տարի ղեկավարել է երիտասարդական թիմերը։ Հենց նույն թիմում նա սկսեց իր պրոֆեսիոնալ կարիերան 1989 թվականին։ 2019/20 մրցաշրջանի ավարտին մասնագետը Սան Սեբաստիան քաղաքը ներկայացնող ակումբի հետ նվաճեց Իսպանիայի գավաթը։ Դա թիմի պատմության մեջ առաջին տիտղոսն էր 1987 թվականից ի վեր: Եվ հաջորդ մրցաշրջանում արդեն թիմը հանդես կգա այլ մարզչի ղեկավարությամբ։
Ո՞վ կհեռանա ակումբից․․․
Մարտին Սուբիմենդի․․․
Այս համատեքստում երեք անուն է առանձնանում։ Առաջինը Մարտին Սուբիմենդին է, որի ապագան, կարծես, ավելի ու ավելի է կապված «Արսենալի» հետ։ Կիսապաշտպանը թիմի ամենակարևոր ֆուտբոլիստներից մեկն է, և անգլիական ակումբը պատրաստ է վճարել նրա պայմանագրով նախատեսված 60 միլիոն եվրոն։ Ֆուտբոլիստի տրանսֆերին հավակնում է նաև «Ռեալը», սակայն, ըստ իսպանական ԶԼՄ-ների, Մարտինն ամենայն հավանականությամբ կտեղափոխվի ԱՊԼ։
Բրաիս Մենդես․․․
Բրաիս Մենդեսը լավ մրցաշրջան չի անցկացրել՝ չնայած թիմի ներկայիս իրավիճակին, և սպորտային ղեկավարությունն, ամենայն հավանակնությամբ, դրական կդիտարկի նրա տրանսֆերի վաճառքը, եթե հետաքրքիր առաջարկ ստանա։ Մինչև 2028 թվականը գործող պայմանագրի և աճող տրանսֆերային արժեքի պատճառով նրա հեռանալը կարող է զգալի շահույթ բերել, հաշվի առնելով, որ նա 2022 թվականին ժամանեց Սան Սեբաստիան 14 միլիոն եվրոյի դիմաց, իսկ հիմա նրա տրանսֆերային արժեքը 28 մլն է։
Տակեֆուսա Կուբո․․․
Վերջապես, Տակե Կուբոն, որին վաղուց են սպասում թոփ ակումբներում։ Չնայած ճապոնացի ֆուտբոլիստը հայտարարել էր, որ ցանկանում է մնալ, սակայն ժամանակն է վերանայել այս որոշումը։ Առջևում Աշխարհի առաջնությունն է, հաջորդ մրցաշրջանում նրա ակումբն, ամենայն հավանականությամբ, չի մասնակցի եվրագավաթներին, բացի այդ, դեռ պարզ չէ, Սուբիմենդեի և ևս մի քանի առաջատար ֆուտբոլիստների հեռանալուց հետո բասկյան ակումբն ինչ տրանսֆերային քաղաքականություն կվարի․․․ Պրեմիեր լիգայի մի քանի թոփ թիմեր դեռ շարունակում են հետաքրքրվել նրանով, միգուցե, ժամանակն է արդեն նոր մարտահրավերի։
