Կենտրոն հեռուստաընկերությունն իրավունք ունի ցուցադրելու Իսպանիայի Լա Լիգայի՝ տարբեր մրցաշրջաններում կայացած Էլ-Կլասիկոներից մի քանիսը։
Այս մասին ֆեյսբուքյան իր էջում հայտնել է մարզական մեկնաբան Մենուա Մեհրաբյանը․
«Իսպանիայի Լա Լիգայի կողմից ստացվել է առաջարկություն, ըստ որի, իսպանական ֆուտբոլի ընթացիկ մրցաշրջանում հայտարարված դադարի ընթացքում Լա Լիգան մեզ տրամադրում է նախորդ մրցաշրջաններում կայացած Էլ-Կլասիկոները՝ դրանով փորձելով առայժմ լրացնել ֆուտբոլային բացը նաև Կենտրոնի եթերում։
Հեռուստաընկերության ղեկավարությունը, հաշվի առնելով ֆուտբոլասերների հետաքրքրությունը, ինչպես նաև հայտարարված դադարը ֆուտբոլով ապահովելու նպատակով, ընդունել է Լա Լիգայի առաջարկությունը»,- գրել է Մեհրաբյանը։
Կենտրոն հեռուստաընկերությունը ցուցադրելու է Էլ-Կլասիկոյի այն հանդիպումները, որոնք տրամադրելու է Լա Լիգան, այսինքն խաղերի ընտրությունը կատարելու է հենց Լա Լիգան։
Առաջիկա հեռարձակումը կլինի կիրակի՝ ապրիլի 19-ին։
«Ինչ վերաբերում է ժամին, ապա Կենտրոն հեռուստաընկերությունն ունի եթերացանց, որը նախապես կազմված է, ուստի մեծ փոփոխություններ կատարելը հնարավոր չէ։ Առաջին հանդիպումը կհեռարձակվի 23։30-ին»,- գրել է Մեհրաբյանը։
Նա նաև ընդգծել է, որ դրանից հետո, հնարավորության դեպքում, գուցե մեկնարկը տեղափոխվի 23։00։
