Իտալիայի ֆուտբոլի առաջնության ապրիլի 26-ին նախատեսված հանդիպումները չեղարկվել են Հռոմի պապ Ֆրանցիսկոսի հուղարկավորության պատճառով։ Իտալիայում հայտարարվել է հնգօրյա ազգային սուգ՝ Պոնտիֆիկոսի մահվան կապակցությամբ։
«Շաբաթ օրը նախատեսված խաղերը չեն կայանա», – լրագրողներին հայտնել է Իտալիայի քաղաքացիական պաշտպանության և ծովային քաղաքականության հարցերով նախարար Նելո Մուզումեքին։
Ապրիլի 26-ին Ա Սերիայում նախատեսված էին հետևյալ հանդիպումները․ «Կոմո» – «Ջենոա», «Ինտեր» – «Ռոմա» և «Լացիո» – «Պարմա»։
Ինչպես նշում է Football-Italia-ն, «Լացիո» – «Պարմա» և «Կոմո» – «Ջենոա» հանդիպումները, ամենայն հավանականությամբ, կկայանան հաջորդ օրը կամ երկուշաբթի՝ ապրիլի 28-ին։
Միևնույն ժամանակ, «Ինտերի» և «Ռոմայի» խաղի տեղափոխումը բարդ է կազմակերպել, քանի որ միլանյան գրանդը մասնակցում է ինչպես Իտալիայի գավաթի, այնպես էլ Չեմպիոնների լիգայի խաղարկություններին։
