Դորտմունդի «Բորուսիան» ցանկանում է ձեռք բերել անգլիական «Սանդերլենդի» կիսապաշտպան Ջոբ Բելինգհեմին, որը Մադրիդի «Ռեալի» կիսապաշտպան Ջուդ Բելինգհեմի եղբայրն է: Այս մասին հայտնում է Sky Sport Germany-ն։
Ջուդը նախկինում ևս հանդես է եկել դորտմունդցիների կազմում:
Աղբյուրի համաձայն՝ անգլիացին կենտրոնական կիսապաշտպանի դիրքն ամրապնդելու համար գերմանական ակումբի գլխավոր տրանսֆերային թիրախների թվում է: Հաղորդվում է, որ դորտմունդցիները դիտարկում են նաև «Մանչեսթեր Սիթիից» Ջեյմս Մաքեյթիի, Պետար Սուչիչի և Մարտին Բատուրինայի (երկուսն էլ Զագրեբի «Դինամո»), ինչպես նաև «Ցրվենա Զվեզդայից» Անդրյու Մաքսիմովիչի թեկնածությունները:
Ջոբ Բելինգհեմն այս մրցաշրջանում բոլոր մրցաշարերում անցկացրել է 23 հանդիպում «Սանդերլենդի» կազմում՝ դառնալով 4 գոլի և երեք գոլային փոխանցման հեղինակ: Transfermarkt պորտալում ներկայացված տեղեկատվության համաձայն՝ 19-ամյա ֆուտբոլիստի շուկայական արժեքը կազմում է 18 միլիոն եվրո։
