Այսօր՝ դեկտեմբերի 17-ին տեղի ունեցավ FIFA The Best 2024-ի պաշտոնական արարողությունը։
Արարողության ընթացքում հայտարարվել են տարվա լավագույն ֆուտբոլիստի, լավագույն ֆուտբոլիստուհու, լավագույն դարպասապահի, կանանց թիմի լավագույն դարպասապահի, տղամարդկանց թիմի լավագույն մարզչի և կանանց թիմի լավագույն մարզչի, ինչպես նաև այլ անվանակարգերում հաղթողների անունները։ Ընդհանուր առմամբ, շնորհվել են մրցանակներ 11 անվանակարգում։
Տարվա լավագույն ֆուտբոլիստ՝ Վինիսիուս Ժունիոր («Ռեալ Մադրիդ», Բրազիլիա)
Քվեարկության արդյունքում բրազիլացի ֆուտբոլիստը գերազանցել է հետևյալ մրցակիցներին՝ Ջուդ Բելինգեմ, Կիլիան Մբապե, Դանիել Կարվախալ, Ֆեդերիկո Վալվերդե (բոլորն՝ Մադրիդի «Ռեալ»), Լիոնել Մեսսի («Ինտեր Մայամի»), Լամին Յամալ («Բարսելոնա»), Էրլինգ Հոլանդ, Ռոդրի (երկուսն էլ՝ «Մանչեսթեր Սիթի»), Ֆլորիան Վիրտց («Բայեր») և Տոնի Կրոս:
Տվյալ մրցանակը շնորհելու ժամանակ հաշվի է առնվել ֆուտբոլիստների ելույթները 2023 թվականի օգոստոսի 21-ից մինչև 2024 թվականի օգոստոսի 10-ն ընկած ժամանակահատվածում: Հաղթողը որոշվել է հավաքականների ավագների և մարզիչների, երկրպագուների ու լրատվամիջոցների ներկայացուցիչների քվեարկությամբ:
Տարվա լավագույն ֆուտբոլիստուհի՝ Այտանա Բոնմատի
Նախորդ մրցաշրջանում «Բարսելոնան» Այտանա Բոնմատիի հետ միասին հաղթեց չորս մրցաշարերում՝ Չեմպիոնների լիգա, Իսպանիայի առաջնություն, գավաթ և Սուպերգավաթ:
Բոնմատին Կատալոնական «Բարսելոնայի» սան է և 2016 թվականից հանդես է գալիս «Բարսայի» առաջին թիմում: Իսպանական ակումբի հետ միասին նա նվաճել է 23 տարբեր տիտղոսներ, այդ թվում՝ երեք անգամ դարձել է կանանց Չեմպիոնների լիգայի հաղթող:
Տղամարդկանց թիմի լավագույն մարզիչ՝ Կառլո Անչելոտի («Ռեալ»)
2023/2024 մրցաշրջանում «Ռեալը» Կառլո Անչելոտիի գլխավորությամբ դարձավ Իսպանիայի չեմպիոն և հաղթեց Չեմպիոնների լիգան:
Լավագույն մարզչի կոչման համար քվեարկությունում Անչելոտին գերազանցեց հետևյալ մասնագետներին՝ Լիոնել Սկալոնի (Արգենտինայի հավաքական), Լուիս դե լա Ֆուենտե (Իսպանիայի հավաքական), Խոսեպ Գվարդիոլա («Մանչեսթեր Սիթի»), Խաբի Ալոնսո («Բայեր»):
65-ամյա մարզչի գործող աշխատանքային պայմանագիրը «Ռեալի» հետ նախատեսված է մինչև 2025/2026 մրցաշրջանի ավարտը:
Կանանց թիմի լավագույն մարզիչ՝ Էմմա Հեյզ («Չելսի», ԱՄՆ հավաքական)
Կանանց լավագույն դարպասապահ՝ Ալիսա Նաեհեր («Չիկագո Ռեդ Սթար»)
Տղամարդկանց լավագույն դարպասապահ՝ Էմիլիանո Մարտինես (Արգենտինա, «Ասթոն Վիլա»)
Անցած ամռանը Մարտինեսը Արգենտինայի ազգային հավաքականի կազմում հաղթեց Ամերիկայի գավաթը:
2023/2024 մրցաշրջանում 32-ամյա ֆուտբոլիստը մասնակցեց 47 հանդիպման ակումբային մակարդակում, որոնցից 15-ում նա դարպասը պահեց անառիկ: Արգենտինացի դարպասապահը երկրորդ անգամ երեք տարվա ընթացքում ճանաչվեց լավագույն դարպասապահ՝ ըստ FIFA-ի վարկածի:
Տարվա 11 լավագույն ֆուտբոլիստները՝ Էմիլիանո Մարտինես, Դանի Կարվախալ, Անտոնիո Ռյուդիգեր, Ռուբեն Դիաս, Վիլյամ Սալիբա, Ջուդ Բելինգհեմ, Ռոդրի, Տոնի Կրոս, Լամին Յամալ, Էրլինգ Հոլանդ, Վինիսիուս Ժունիոր
Տարվա 11 լավագույն ֆուտբոլիստուհիները՝ Ալիսա Նաեհեր, Լուսիա Բատլ, Էսթեր Պարեդես, Նաոմի Գիրմա, Լյուսի Բրոնզ, Այտանա Բոնմատի, Լինդսի Հորան, Պատրի Գույարո, Սալմա Պարալուելո, Կերոլայն Գրեմ Հանսեն
FIFA Marta Award՝ Մարտա
FIFA Puskás Award՝ Ալեխանդրո Գարնաչո («Մանչեսթեր Յունայթեդ»)
«Մանչեսթեր Յունայթեդի» արգենտինացի հարձակվողը դարձավ Պուշկաշի մրցանակի դափնեկիր։ Արգենտինացին գեղեցիկ գոլը խփել էր «Էվերթոնի» դարպասին (3:0) ԱՊԼ 2023/2024 մրցաշրջանի 13-րդ տուրի խաղում։
Լավագույն երկրպագու՝ Գիլյերմե Գանդրա Մոուրա
Ֆեյր-փլեյ մրցանակ՝ Տիագո Մայա
