Մենք Ռեալից հետո հերթ էինք կանգնել այդ մրցակցի հետ խաղալու համար. Դմիտրի Գունկո.

«Ուրարտու» ֆուտբոլային ակումբն, ի թիվս այլոց, սկսել է նախապատրաստվել մրցաշրջանի երկրորդ հատվածին։ Armsport-ը ներկա է գտնվել թիմի հերթական մարզմանը, որի ավարտին զրուցել է գխավոր մարզիչ Դմիտրի Գունկոյի հետ։ Նա մեզ հետ զրույցում պատմել է թիմի առաջիկա ծրագրերի, տրանսֆերային քաղաքականության և հավաքի ընթացքում նախատեսված ստուգողական հանդիպումների մասին։

— Մենք ամեն ինչ սկսել ենք ծրագրածի համաձայն, հավաքվել ենք հունվարի 9-ին, անցկացրել բուժզննում, փառք Աստծո՝ բոլորն առողջ են, կազմ ու պատրաստ։ Բոլորն ապաքինվել են այն վնասվածքներից, որոնք մեզ վրա ծանրացել էին մրցաշրջանի առաջին հատվածում, և առանց վնասվածքների սկսել ենք ուսումնամարզական հավաքն այստեղ՝ Երևանում։ Հավաքի առաջին հատվածը կտևի մինչև այս ամսվա 25-ը, որից հետո մենք մեկնում ենք Արաբական Միացյալ Էմիրություններ: Այնտեղ հրաշալի մարզաբազա կա, որտեղ մենք մեր հավաքն անցկացրել ենք նաև նախորդ տարի. ԱՄԷ-ում մենք կանցկացնենք 5 ընկերական հանդիպում։ Շուտով կհաստատվի վերջին մրցակցի անունը։ Բոլորն էլ արժանի թիմեր են։ Վստահ եմ՝ այդ հանդիպումները մեզ թույլ կտան հնարավորինս լավ պատրաստվել առաջնության երկրորդ հատվածին։

— Մրցակիցների մասին դեռ կզրուցենք։ Տրանսֆերային պատուհանն արդեն ակտիվ է, բնականաբար, որոշ խաղացողներ եկել են, որոշներն էլ գնացել։ Ցանկալի է զրուցել հեռացածների, մասնավորապես, երկրպագուների վարկածով թիմի առանցքային խաղացող Նանայի հեռանալու մասին։ Նա թիմի հիմնական աջ պաշտպանն էր։ Կա՞ նրան արժանի փոխարինող և արդյոք սպասելի՞ էր ձեզ համար մյուս ֆուտբոլիստների հեռանալը։ Ո՞ր խաղացողի հեռանալն էր Ձեզ համար ամենաանսպասելին։

-Նանայի մասին կասեմ, որ մենք պատրաստ էինք նրա հեռանալուն։ Մենք հասկանում էինք, որ նա մեծ պահանջարկ ունի տրանսֆերային շուկայում, մենք նրա վերաբերյալ բազում առաջարկներ էինք ստանում մինչև վերջերս։ Վերջին առաջարկը, որ ստացանք, ամբողջությամբ բավարարեց մեր պահանջները։ Մենք ծրագրում ենք այդ դիրքում մի քանի ֆուտբոլիստի դիտարկել։ Կլինի առողջ մրցակցություն, ինչը թույլ կտա մեզ ընտրել լավագույն տարբերակը։ Մենք նաև հասկանում էինք, որ Նանան հայ ֆուտբոլիստ էր, այսինքն՝ լեգիոներ չէր համարվում, և դա այս պահին մեզ համար որոշ դժվարություններ է առաջացնում (կապված մեկնարկային կազմում հայ ֆուտբոլիստների նվազագույն քանակն ապահովելու պահանջի հետ — խմբ.)։ Մյուսների վերաբերյալ կասեմ, որ բոլորն էլ հեռացել են տարբեր պատճառներով, բոլորն էլ հեռացել են փոխադարձ հարգանքի դրևորումով, մենք եկել ենք համաձայնության։ Ամենաանսպասելին Մարկոսի հեռանալն էր։ Նա ֆուտբոլիստ էր, որի հեռանալն ամենաքիչն էի սպասում։ Մենք չենք կարող պարտադրաբար պահել խաղացողների, որոնք ունեն հեռանալու ավելի քան արդարացված պահանջ։ Մարկոսի պարագայում պատճառն ընտանեկան էր, ու մենք նրան բաց թողեցինք։

— Որո՞նք են այն խնդրահարույց դիրքերը, որ հենց այս պահին ուժեղացնելու կարիք ունեն՝ կենտրոնական կիսապաշտպա՞ն («6» համարի դիրք) ու կենտրոնական հարձակվո՞ղ, թե այլ դիրքեր էլ կան։

— Բնականաբար, մենք ցանկանում ենք ուժեղանալ բոլոր դիրքերում՝ պաշտպանությունում, կիսապաշտպանությունում ու հարձակման գծում։ Արդեն ներկայացվել են արգենտինացի Ալվարոն, Վլադիսլավ Պանտելեևը՝ Ռուսաստանից, շուտով կլսեք ևս մեկ տրանսֆերի մասին։ Սա սովորական մարզական գործընթաց է։ Իհարկե, իդեալական կլիներ պահպանել այն թիմը, որը կա և որը արդյունք է տալիս։ Իսկ եթե դա չկա, ուրեմն անհրաժեշտ են փոփոխություններ։ Դրա համար կա տրանսֆերային պատուհան, և փոփոխությունները բնական են։ Մենք ցանկանում ենք մարտունակ թիմ ունենալ առաջնության երկրորդ հատվածում։

— Արդեն հայտնի է, որ ԱՄԷ հավաքի համար կա հաստատված 4 մրցակից, ևս մեկի անունը կիմանանք շուտով։ Միակ հարցը կապված է կորեական «Չոմբուկ Մոտորսի» հետ, քանի որ հայկական ակումբները հավաքի ընթացքում մրցում են հիմնականում ռուսական ու նախկին խորհրդային տարածքի թիմերի հետ։ Ինչու՞ ընտրվեց հենց այս մրցակիցը, որը լուրջ թիմ է ու գրեթե միշտ համարվել է, օրինակ, «Ռեալի» կամ «Մանչեսթեր Յունայթեդի» ստուգողական մրցակիցը։

— Մենք պարզապես հերթ էինք կանգնել «Ռեալի» ու «Մանչեսթերի» հետևից։ Իհարկե, մենք գիտակցում ենք մրցակցի ուժը։ Խաղադաշտ դուրս եկող բոլոր ֆուտբոլիստների մակարդակը հավասար է։ Մեզ համար չկա տարբերություն, մենք կարող ենք մեր ուժերը ստուգել նման մակարդակի վրա, ցույց տալ մեր կարողություններն ու հասկանալ՝ ինչի վրա կարող ենք աշխատել։

Ռոբերտ Գասպարյան