Թուրքիայի հետ առաջիկա խաղից առաջ Հայաստանի ազգային հավաքականի գլխավոր մարզիչ Ալեքսանդր Պետրակովն իր ձեռքի տակ ուներ բոլոր ուժեղագույններին, որոնք կարող էին հրավիրվել ազգային թիմ։ Առաջին անգամ վերջին տարիների համար նույնիսկ մեր հավաքականի գլխավոր մարզիչը ստիպված է եղել հրաժարվել մի շարք ուժեղ տղաներից, քանի որ հայտացուցակում պարզապես այդքան տեղ չկար։ Մասնավորապես, ընտրանու կազմում այս անգամ չեն Ժիրայր Շաղոյանը, Սոլոմոն Ուդոն և Նարեկ Գրիգորյանը։
Առաջին հայացքից, սա լավ ցուցիչ է, սակայն մյուս կողմից չմոռանանք, որ հավաքական չհրավիրված մյուս ֆուտբոլիստները հիմնականում միջին և առջևի գծի ֆուտբոլիստներ են, մինչդեռ մենք ունենք պաշտպանական գծում այլընտրանքային տարբերակների պակաս։ Այս անգամ կազմից դուրս մնացած Արթուր Քարտաշյանն ու Ժոաո Արարատը ևս կարող էին հանգիստ համալրել Թուրքիայի և Խորվաթիայի հավաքականների հետ խաղին պատրաստվող ֆուտբոլիստների ցանկը։
Այս ամենը հաշվի առնելով` ընտրանու կազմը Թուրքիայում նախատեսվող առաջիկա խաղի հավանական մեկնարկային կազմը պետք է որ լինի առանց լուրջ անակնկալների։
Դարպասապահ — Օգնյեն Չանչարևիչ
Ալեքսանդր Պետրակովի հրավիրված 3 դարպասապահներից 2-ն իրենց ակումբներում հիմնական դարպասապահ են։ Միայն Արսեն Բեգլարյանն է, որը վերջերս է ամրապնդվել «Արարատ-Արմենիայի» հիմնական կազմում։ Վերջին խաղերում ցույց տված տպավորիչ խաղի շնորհիվ նա ստացել է Վարդան Մինասյանի վստահության քվեն։ Հաշվի առնելով, որ վերջին խաղերում հավաքականի առաջին ընտրությունը Չանչարևիչն է, Պետրակովը պետք է որ իր ընտրությունը չփոխի այս հարցում, չնայած որ Բուչնևն էլ պակաս արժանի չէ առաջին համարը լինելուն։
Կենտրոնական պաշտպաններ — Չալըշըր, Հարությունյան, Հարոյան
Ամենայն հավանականությամբ, Պետրակովը չի փոխի նաև թիմի մարտավարությունը և խաղը կկառուցի 3 կենտրոնական պաշտպանով սխեմայով։ Ու այս հարցում ուկրաինացի մասնագետը բախվելու է լուրջ խնդիրների։ Հիմնական ընտրություն համարվող Չալըշըր-Հարությունյան-Հարոյան եռյակից ստաբիլ խաղում է միայն «Կրանսոնդարի» երիտասարդը, մինչդեռ Հարոյանը «Աստանայի» կազմում դաշտ է դուրս գալիս ոչ այնքան մեծ հաճախականությամբ։ Անդրե Չալըշըրն էլ վնասվածք էր ստացել ու մի քանի շաբաթ ապաքինվել է և «Բրոմապոյկարնայի» միայն վերջին խաղին է եղել հայտացուցակում։ Սա կարող է բացել Ստոյպա Մկրտչյանի ճանապարհը, որը կայուն խաղային պրակտիկա ունի «Օսիեկում»։ Եթե նա դուրս գա խաղադաշտ առաջին րոպեներից, բարդ է ասել՝ ում փոխարեն՝ խաղային պրակտիկա չունեցող, բայց գերազանց որակներ ունեցող Չալըշըրի՞, թե՞ վատ մարզավիճակում գտնվող թիմի ավագ Հարոյանի։ Չպետք է մոռանալ նաև Էրիկ Փիլոյանի մասին, որը պատրաստ սպասում է իր շանսին։ Հաշվի առնելով Պետրակովի խառնվածքը՝ նա կարող է անակնկալ որոշում կայացնել ու Փիլոյանին դաշտ դուրս բերել մեկնարկային կազմում։
Եզրային պաշտպաններ — Նաիր Թիկնիզյան, Կամո Հովհաննիսյան
3 կենտրոնական պաշտպանով խաղալու դեպքում Պետրակովը առաջին րոպեներից գրոհի է նետում եզրային պաշտպանների, որոնք իրենց պատասխանատվության տակ են վերցնում ամբողջ եզրը։ Ժամանակին մենք կարող էին ավելի լավ արդյունքների հասնել նախորդ հավաքականների հետ հենց այս սխեմայով, սակայն չունեինք համապատասխան մակարդակի բավարար քանակությամբ ֆուլբեքներ։ Հիմա նրանք կան, նրանք երկուսն են՝ Նաիր Թիկնիզյան ու Կամո Հովհաննիսյան։ Ընդ որում, եթե «Լոկոմոտիվի» պաշտպանը ցանկանացած պարագայում ունի այլընտրանք (Ժիրայր Մարգարյան), Կամո Հովհաննիսյանի պարագայում ամեն ինչ մի փոքր տագնապալից է. «Աստանայի» ֆուտբոլիստին փոխարինող չկա, քանի որ բոլոր հրավիրվածները նոմինալ կենտրոնական պաշտպաններ են։ «Ուրարտուի» կազմում 1-2 հանդիպում աջ եզրային պաշտպանի դիրքում անցկացրած Էրիկ Փիլոյանը լավագույն ընտրությունը չէ ֆուլբեքի դիրքի համար։ Ամենայն հավանականությամբ, միակ «ազատ» տարբերակն ունիվերսալ Արտակ Դաշյանն է մնում։ Բայց «Փյունիկի» ֆուտբոլիստն այս դիրքի համար պահեստային տարբերակ է միայն։
Հենակետային կիսապաշտպաններ — Իվու, Սպերցյան
Միջին օղակը, երևի թե, Ալեքսանդր Պետրակովի համար ամենակայունն է, քանի որ այստեղ ընտրությունն առավել քան ակնհայտ է։ Իվուն վաղուց է ապացուցել, որ այս պահին հավաքականում հենակետային կիսապաշտպանի միակ և արժանի տարբերակն է, իսկ Սպերցյանի՝ մեկնարկային կազմում լինել-չլինելու հարցը նույնիսկ քննարկման ենթակա չէ։ Այլ հարց է, որ ցանկալի կլիներ «Կրասնոդարի» կիսապաշտպանին տեսնեինք մի փոքր ավելի բարձր դիրքում խաղալիս, սակայն, ինչպես Մխիթարյանի ժամանակ էր, մենք այս պահին չունենք այլ որակյալ կենտրոնական կիսապաշտպան, որը կկարողանար գնդակը միջին գծից առաջ տաներ։ Նրանց փոխարինելու պոտենցիալ միայն 2 թեկնածու կա՝ Վբեյմարն ու Դաշյանը, սակայն վերջին երկուսը խաղադաշտ դուրս կգան այս դիրքում միայն ծայրահեղ անհրաժեշտության դեպքում։
Հարձակվողներ — Սելարայան, Ադամյան, Ռանոս
Հենց այստեղ է Պետրակովի ամենամեծ ընտրությունն ու, միևնույն ժամանակ, ամենամեծ գլխացավանքը։ Ո՞ւմ տեղավորել Ռանոսի ու Սելարայանի կողքին։ Ցավոք, վնասվածքի պատճառով հավաքականի ճամբարը թողել է Տիգրան Բարսեղյանը. «Սլովանի» վինգերը ընտրանուն միացել էր արդեն վնասվածքով, և բժիշկները նրան խորհուրդ տվեցին հետագա բարդություններից խուսափելու համար չմասնակցել հանդիպումներին։ Այլապես հենց նա էլ կլիներ հարձակման գծում Պետրակովի երրորդ ընտրությունը։
Տիգրանի բացակայությամբ պետք է միայն ենթադրել՝ ինչ է մտածել Պետրակովը։ Ամենայն հավանականությամբ, Ռանոսը կլինի կրակագծում, Սելարայանը կգործի մի փոքր խորքից կամ ձախ կիսաեզրից։ Աջ կողմից խաղալու միանգամից 3 թեկնածու կա՝ Սերոբյան, Ադամյան ու Բիչախչյան։ Այս տարբերակներից ամենանախընտրելին, երևի թե, Ադամյանն է, քանի որ վերջինս հաջողությամբ կարող է խաղալ նաև «կեղծ 9 համարի» դիրքում կամ լինել թիմի երկրորդ հարձակվողը, մինչդեռ Սերոբյանն ու Բիչախչյանը բացառապես եզրային հարձակվողներ են։ Կա, իհարկե, նաև Բալեկյանի տարբերակը, սակայն «Բոկա Խունիորսի» ֆուտբոլիստը վնասվածք ունի, որը, թեպետ, բժիշկները գնահատել են ոչ լուրջ, բայց, պետք է նաև մտածել անհրաժեշտության դեպքում առջևի գիծը թարմացնելու մասին։ Այս տեանկյունից, Բալեկյանը պետք կգա, միանշանակ, երկրորդ կեսում։
Ռոբերտ Գասպարյան
