Լոնդոնի օլիմպիական վարկանիշային մրցաշարում հայ բռնցքամարտիկների մասնակցության հետ կապված ֆինանսական ծախսերը հոգում է Հայաստանի բռնցքամարտի ֆեդերացիան` պետության կողմից ֆեդերացիային տրվող դրամաշնորհների միջոցով:
Այս մասին ArmSport-ի հետ զրույցում հայտնեց ԿԳՄՍ նախարարության սպորտի բարձրագույն նվաճումների քաղաքականության վարչության պետ Նարինե Շահբազյանը:
Ավելի վաղ Հայաստանի բռնցքամարտի ֆեդերացիայի մամուլի քարտուղարությունը հայտարարություն էր տարածել` նշելով, որ Լոնդոնում կայանալիք մրցաշարին մասնակցելու ամբողջ ծախսերը հոգում է ՀԲՖ նախագահ Արթուր Գևորգյանը, ինչից հետո «Բռնցքամարտի հայկական ազգային ֆեդերացիա» ՀԿ-ն պատասխան հայտարարությամբ էր հանդես եկել` ընդգծելով, որ «օլիմպիական վարկանիշային մրցաշարին մասնակցելու ծախսերը բացառապես հոգում է Հայաստանի Հանրապետությունը՝ ի դեմս ԿԳՄՍ նախարարության»:
«Հայաստանի բռնցքամարտի ֆեդերացիա» ՀԿ-ին պետության կողմից դրամաշնորհի տեսքով տրամադրվող ֆինանսական աջակցության գումարը 2020 թվականի կտրվածքով 116 մլն 900 հազար դրամ է կազմում, իսկ կոնկրետ Լոնդոնում կայանալիք մրցաշարի մասնակցության համար ֆեդերացիան նախարարություն ներկայացրած հայտով 27 մլն 428,560 հազար է պահանջել.
«Ֆեդերացիան նախօրոք ներկայացրել է իր պլանը, որն էլ նախարարությունը հաստատել է, ինչից հետո տվել են այդ միջոցառման համար իրենց պահանջելիք գումարը: Դա պետության կողմից ֆեդերացիային տրվող դրամաշնորհ է»,- ասում է Նարինե Շահբազյանը:
Շահբազյանի խոսքով, պայմանագիրը նախարարության հետ կնքել է Արթուր Գևորգյանի ներկայացուցիչը և, ըստ այդ պայմանագրի, գումարները տրվում են նախարարության կողմից` որպես դրամաշնորհ.
«Ես չգիտեմ, գուցե Արթուր Գևորգյանն էլ իր կողմից է որոշակի ծախսեր արել, չեմ կարող ասել, թող ներկայացնի»,- ասում է Նարինե Շահբազյանը:
Ի դեպ, ArmSport-ի հարցմանն ի պատասխան, Հայաստանի բռնցքամարտի ֆեդերացիայի մամուլի քարտուղարությունից խոստացել են շուտով հայտարարությամբ հանդես գալ:
Հիշեցնենք` հավաքականի մարզիչ Ռաֆայել Մեհրաբյանի գլխավորությամբ Լոնդոն կմեկնեն և օլիմպիական ուղեգրերի համար կպայքարեն Եվրոպայի չեմպիոն, 63 կգ քաշային Հովհաննես Բաչկովը, 52 կգ քաշային Կորյուն Սողոմոնյանը, 57 կգ քաշային Արթուր Բազեյանը, 69 կգ քաշային Գուրգեն Մադոյանը, 75 կգ քաշային Արման Դարչինյանը, 81 կգ քաշային Գոռ Ներսիսյանը, 91 կգ քաշային Նարեկ Մանասյանն ու գերծանր քաշային Գուրգեն Հովհաննիսյանը:
Նրանցից բացի, մրցաշարին մեկնելու են ևս մեկ մարզիչ, 1 բժիշկ և 1 մերսող: Մրցաշարը կայանալու է մարտի 10-ից 25-ը:
