Մադրիդի «Ռեալի» նախկին մարզիչ Զինեդին Զիդանը կգլխավորի Ֆրանսիայի հավաքականը Քաթարում կայանալիք Աշխարհի առաջնությունից հետո, որը կանցկացվի նոյեմբերի 20-ից դեկտեմբերի 18-ը։
«Մեկուկես տարի առաջ, երբ Զիդանը հեռացավ «Ռեալից», ես ասացի, որ նա չի մարզելու որևէ ակումբ՝ սպասելով Ֆրանսիայի հավաքականին։ Այսօր սպասումն ավարտվեց. Զինեդին Զիդանը կգլխավորի Ֆրանսիայի հավաքականը Աշխարհի առաջնությունից հետո»,- Twitter-ում գրել է լրագրող Սերխիո Վալենտինը։
Զիդանը Ֆրանսիայի հավաքականում հանդես է եկել 1994-2006 թվականներին, անցկացրել 108 հանդիպում՝ դառնալով 31 գոլի հեղինակ։ Հավաքականի կազմում կիսապաշտպանը 1998 թվականին հաղթել է Աշխարհի առաջնությունում, իսկ 2000 թվականին՝ Եվրոպայի առաջնությունում։
Որպես գլխավոր մարզիչ՝ Զիդանը «Ռեալի» հետ երեք անգամ հաղթել է Չեմպիոնների լիգան, երկու անգամ՝ Իսպանիայի առաջնությունը։ Մադրիդյան ակումբից մասնագետը հեռացավ 2021 թվականի մայիսի 27-ին։ Դրանից հետո Զիդանը չի վերադարձել մարզչական աշխատանքի։
