Հունահռոմեական ոճի ըմբշամարտի Հայաստանի հավաքականի գլխավոր մարզիչ Էդուարդ Սահակյանը լրագրողների հետ զրույցում պատասխանեց այն հարցին, թե ինչ սկզբունքով են որոշել, թե 77 կգ քաշային կարգում ով պետք է ներկայացնի Հայաստանը Տոկիոյի 2020 թվականի Օլիմպիական խաղերին.
«Ով վարկանիշը նվաճել էր, նա էլ որոշեցինք, որ մասնակցի Օլիմպիական խաղերին: Վճռորոշը Նիցի մրցաշարն էր, դրանից հետո պետք է որոշում կայացնեինք, բայց Արսեն Ջուլֆալակյանը չմասնակցեց Նիցի մրցաշարին, նա մասնակցեց Դանիայի մրցաշարին: Այդ իսկ պատճառով որոշեցինք, որ Օլիմպիական խաղերին պետք է մասնակցի Կարապետ Չալյանը:
Նիցի մրցաշարում նաև Հայաստանի չեմպիոնն էր մասնակցում՝ Արման Բաղդասարյանը: Այսինքն, մրցակցային դաշտ կար, պայքար կար: Կոնկրետ բանաձև չկա, թե երբ պետք է հայտարարվի կազմը: Մարզչական կազմով քննարկել ենք, ու որոշել, որ ճիշտը դա է»,- ասում է Էդուարդ Սահակյանը:
Հայաստանի ըմբշամարտի ֆեդերացիայի փոխնախագահ Սամվել Գևորգյանի խոսքով, նախկինում էլ որ ըմբիշը՝ ԱԱ-ից վարկանիշ է ձեռք բերել, մեկ տարի առաջ արդեն իմացել է, որ ինքն է մեկնելու Օլիմպիական խաղերին:
«Ով վարկանիշ է նվաճել, նա էլ մասնակցում է: Այստեղ անձերի հարց չէ: Եթե Ալեքսանյան Արթուրը բերել է ուղեգիրը, արդեն իմացել է, որ առաջին համարն ինքն է, ու ինքն է մասնակցելու Օլիմպիական խաղերին: Դա երբեք վատ ազդեցություն չի ունեցել մոտիվացիայի կամ արդյունքների տեսանկյունից»,- ասում է Սամվել Գևորգյանը:
