Vbet Հայաստանի Պրեմիեր լիգայում ապրիլի 15-ին կսկսվի 27-րդ տուրը: Ուրբաթ և շաբաթ օրերին տեղի կունենա երկուական խաղ: Առաջնության ավարտից 10 տուր առաջ չեմպիոնական պայքարը կտրուկ սրվել է: Մրցաշարային աղյուսակը 54-ական միավորով գլխավորում են «Փյունիկն» ու «Արարատ-Արմենիան»:
| 15.04.22 | Արարատ-Արմենիա |
—
|
Արարատ | Երևան | Ֆուտբոլի ակադեմիա | 15:00 |
Տուրի մեկնարկը կտրվի Ավանի ֆուտբոլի ակադեմիայում, որտեղ «Արարատ-Արմենիան» կընդունի գործող գավաթակիր Երևանի «Արարատին»: Դմիտրի Գունկոյի գլխավորած «Արարատ-Արմենիան» գարնանային հատվածից առաջ 8 միավորի առավելություն ուներ «Փյունիկի» նկատմամբ, սակայն վերջին խաղերում միավորների կորուստները թույլ տվեցին «Փյունիկին» հավասարվել առաջատարին: Գունկոյի գլխավորած թիմն առաջնության երկրորդ հատվածում անցկացրած 8 խաղից հաղթել է 4-ում, երկու խաղ ավարտել է ոչ-ոքի, իսկ մյուս երկու խաղերում պարտություն է կրել՝ զիջելով «Փյունիկին» և «Վանին»: Վերջին երկու խաղերում երևանյան թիմը հաղթանակ չի տարել՝ պարտվելով «Վանին» ու ոչ-ոքի խաղալով «Ուրարտուի» հետ:
«Արարատը» պարտվել է վերջին երեք խաղերում՝ զիջելով «Ալաշկերտին», ԲԿՄԱ-ին ու «Փյունիկին»: Այս ընթացքում գործող գավաթակիրը դուրս մնաց գավաթային պայքարից՝ պարտվելով Վայոց ձորը ներկայացնող «Նորավանքին»: Առաջնության գարնանային հատվածում անցկացրած 8 խաղում Էդգար Թորոսյանի թիմը տարել է ընդամենը երկու հաղթանակ: Վերջին խաղերում միավորների նման կորուստը թույլ տվեց գործող չեմպիոն «Ալաշկերտին» ընդհուպ մոտենալ «Արարատին» ու հիմա «դեղինները» «Արարատից» հետ են մնում ընդամենը մեկ միավորով: Արամ Ոսկանյանի գլխավորած թիմը մեկ խաղ պակաս է անցկացրել: Ընթացիկ մրցաշրջանում «Արարատ-Արմենիան» ու «Արարատը» հանդիպել են 2 անգամ, երկու դեպքում էլ հաղթել է «Արարատ-Արմենիան»: Առաջին շրջանի խաղում գրանցվել է 3:0, իսկ երկրորդ շրջանում՝ 1:0 հաշիվ:
| 15.04.22 | Փյունիկ |
—
|
Ալաշկերտ | Երևան | «Հանրապետական» | 18:00 |
Երևանի «Փյունիկը» ֆանտաստիկ շրջան է անցկացնում: Եղիշե Մելիքյանի գլխավորած թիմն առաջնության այս տարվա խաղերում պարտություն չի կրել: 8 խաղում երևանյան թիմը կորցրել է 2 միավոր՝ ոչ-ոքի խաղալով Չարենցավանի «Վանի» հետ: Միավորների նման պաշարից ու առաջատար «Արարատ-Արմենիայի» սայթաքումներից հետո Եղիշե Մելիքյանի թիմը նախորդ տուրում ստանձնեց առաջնության առաջատարի կարգավիճակը՝ միավորներով հավասարվելով «Արարատ-Արմենիային»:
«Ալաշկերտն» այս տարվա 9 խաղերում կրել է երկու պարտություն, մեկն ավարտել ոչ-ոքի, իսկ 6-ում հաղթանակ տարել: Արամ Ոսկանյանի գլխավորած թիմը մեկ միավոր է զիջում 3-րդ տեղում գտնվող «Արարատին»: Վերջինս մեկ խաղ պակաս է անցկացրել: Վերջին երկու խաղերում «Ալաշկերտը» հաղթանակի է հասել «Նորավանքի» ու ԲԿՄԱ-ի նկատմամբ: Ընթացիկ մրցաշրջանում «Փյունիկն» ու «Ալաշկերտը» հանդիպել են երկու անգամ: Առաջին խաղում թիմերը փոխանակել են մեկական գնդակ, իսկ երկրորդում «Փյունիկը» հաղթել է 4:1 հաշվով:
| 16.04.22 | Վան |
—
|
ՈՒրարտու | Չարենցավան | քաղաքային | 15:00 |
Երևանի «Ուրարտուն» այս տարի անցկացրած 8 խաղերից միայն մեկում է պարտվել, հաղթել է երկուսում, իսկ մյուս խաղերն ավարտել ոչ-ոքի: Նախորդ շաբաթ այս երկու թիմերը հանիպեցին Գավաթի խաղարկության կիսաեզրափակչում, որտեղ Ռոբերտ Արզումանյանի գլխավորած թիմը 3:0 հաշվով վստահ հաղթանակ տարավ չարենցավանյան թիմի նկատմամբ ու դուրս եկավ եզրափակիչ:
«Վանը» շարունակում է անկայուն ֆուտբոլ ցուցադրել: Այս տարվա անցկացրած 8 խաղերից 5-ում Սևադա Արզումանյանի գլխավորած թիմը պարտություն է կրել, սակայն կարողացել է հաղթել առաջատար «Արարատ-Արմենիային», իսկ «Փյունիկի» հետ խաղում վաստակել է մեկ միավոր: Նախորդ խաղում Չարենցավանի թիմը Երևանում 1:7 հաշվով պարտվեց «Նորավանքին»: Ընթացիկ առաջնությունում «Ուրարտուն» ու «Վանը» հանդիպել են երկու անգամ: Առաջին խաղում թիմերը փոխանակել են մեկական գնդակ, իսկ երկրորդում երևանյան թիմը հաղթել է նվազագույն հաշվով:
| 16.04.22 | ԲԿՄԱ |
—
|
Նորավանք | Երևան | Ֆուտբոլի ակադեմիա | 18:00 |
Տուրի վերջին խաղը տեղի կունենա Ավանի ֆուտբոլի ակադեմիայում: Առաջնությունում թեժ պայքար է ծավալվել նաև մրցաշարային աղյուսակի ստորին հատվածում: Վերջին խաղերում «Նորավանքի» վստահ ելույթները թույլ տվեցին Վայոց ձորը ներկայացնող թիմին հավասարվել «Վանին»: Վահե Գևորգյանի գլխավորած թիմը նախորդ տուրում 7:1 հաշվով ջախջախիչ հաղթանակ տարավ «Վանի» նկատմամբ ու շրջանցեց չարենցավանյան թիմին: Բացի այդ, Վայոց ձորը ներկայացնող թիմը դուրս է եկել Գավաթի խաղարկության եզրափակիչ, որտեղ մայիսի 8-ին կմրցի «Ուրարտուի» հետ:
Մրցաշարային աղյուսակը եզրափակող ԲԿՄԱ-ն այս տարի անցկացրած 8 խաղերից երեքում պարտություն է կրել, 4 խաղ ավարտել ոչ-ոքի և 1 հաղթանակ տարել՝ առավելության հասնելով Երևանի «Արարատի» նկատմամբ: Հարկ է նշել, որ Ռաֆայել Նազարյանի գլխավորած թիմը միավորներ է վաստակել «Արարատ-Արմենիայի», «Նոայի», «Վանի» և «Նորավանքի» հետ խաղերում: Այս երկու թիմերն ընթացիկ առաջնությունում հանդիպել են երկու անգամ: Առաջին խաղում ԲԿՄԱ-ն հաղթել է 2:0 հաշվով, իսկ մյուս խաղում թիմերը փոխանակել են մեկական գնդակ:
27-րդ տուրից առաջ Vbet Հայաստանի Պրեմիեր լիգայի մրցաշարային աղյուսակն ունի հետևյալ տեսքը.
| N | Թիմեր | Խ | Հ | Ո | Պ | ԽԳ | ԲԳ | Մ |
|---|---|---|---|---|---|---|---|---|
| 1. |  Փյունիկ |
23 | 17 | 3 | 3 | 37 | 19 | 54 |
| 2. |  Արարատ-Արմենիա |
23 | 17 | 3 | 3 | 44 | 15 | 54 |
| 3. |  Արարատ |
23 | 11 | 5 | 7 | 37 | 25 | 38 |
| 4. |  Ալաշկերտ |
22 | 11 | 4 | 7 | 28 | 20 | 37 |
| 5. |  Նոա |
24 | 7 | 8 | 9 | 29 | 35 | 29 |
| 6. |  ՈՒրարտու |
22 | 6 | 9 | 7 | 24 | 22 | 27 |
| 7. |  Նորավանք |
23 | 4 | 5 | 14 | 22 | 36 | 17 |
| 8. |  Վան |
23 | 4 | 5 | 14 | 14 | 35 | 17 |
| 9. |  ԲԿՄԱ |
23 | 3 | 4 | 16 | 19 | 47 | 13 |
