Vbet ՀՊԼ 19-րդ տուրի՝ «Ուրարտուի» հետ արտագնա խաղից հետո (1-1) «Նորավանքի» գլխավոր մարզիչ Վահե Գևորգյանը պատասխանել է լրագրողների հարցերին:
«Երկու թիմերն էլ խաղադաշտ էին դուրս եկել միայն հաղթանակի համար: Մենք սկսեցինք խորը պրեսինգով: Առաջին խաղակեսը պահերով հարուստ չէր: Մրցակիցը հաշիվը բացեց 11 մետրանոցից: 2-րդ խաղակեսում փոփոխություններից առաջ և հետո մենք բավականին մեծ առավելություն ունեինք, ստեղծեցինք գոլային պահեր, ի վերջո հաջողվեց գրավել մրցակցի դարպասը: Իմ կարծիքով, արդեն երկրորդ խաղն է մենք ավելիին ենք արժանի»,-ամփոփելով խաղն ասել է Վահե Գևորգյանը:
-Խաղի սկզբից «Նորավանքի» ֆուտբոլիստները մի փոքր կոպիտ էին գործում: Խաղի կարևորությո՞ւնն էր պատճառը:
-Մեզ համար բոլոր խաղերը կարևոր են: Առհասարակ, սա ֆուտբոլ է և պայքարը նորմալ է:
— Ինչո՞վ էր պայմանավորված երկրորդ խաղակեսի սկզբում Բաբու Չամի փոխարինումը:
-Մենք առաջին խաղակեսում դաշտի կենտրոնում խնդիր ունեինք, այդ պատճառով ընդմիջման ժամանակ փոփոխություն կատարեցինք: Բաբուն նախորդ խաղից հետո չէր հասցրել լիովին վերականագնվել և դա զգացնել տվեց այսօր:
-Երկրորդ խաղակեսում «Նորավանքի» ֆուտբոլիստներն ավելի ակտիվ էին: Արդյո՞ք փոխարինման մտած ֆուտբոլիստները փոխեցին խաղը:
-Մենք հենց առաջին վայրկյանից մարտական էինք մտել խաղադաշտ: Երկու թիմերն էլ խաղում էին 3 միավորի համար: Պարզապես կատարեցինք փոփոխություններ, որոնք ազդեցին խաղի ելքի վրա: Մենք հարձակվողական ոճի ֆուտբոլիստներ դուրս բերեցինք դաշտ: Առաջին խաղակեսում խնդիր ունեինք գնդակը մրցակցի կիսադաշտում վերահսկելու հետ: Երկրորդ խաղակեսում մենք շտկեցինք իրավիճակը: Կարեն Նալբանդյանն ու Արամ Քոչարյանը այն ֆուտբոլիստներն էին, որոնք օգնեցին մեզ այսօր այդ հարցում: Շուայբուն ու Տենտոն ավելի սրեցին խաղն առջևի գծում և մինչև վերջին վայրկյանը փորձում էինք ևս մեկ գոլ խփել:
-Առաջնության առաջին հատվածում «Նորավանքը» հիմնականում պաշտպանությունից էր գործում, բայց այս երկու խաղերը ցույց տվեցին, որ ձեր թիմի խաղը կերպարանափոխվել է: Կարո՞ղ ենք ասել, որ նոր ֆուտբոլիստներն են ստիպել նման խաղաոճով խաղալ:
-Շատ ճիշտ եք նկատել: Թիմը լիովին կերպարանափոխվել է և այո, նոր ֆուտբոլիստների շնորհիվ: Նախորդ խաղից հետո ես նշեցի, որ մենք հիմա արդեն ավելի երկար պահեստայինների նստարան ունենք ու կատարել ենք կետային սելեկցիա, որի շնորհիվ կարող ենք խաղալ «ուրիշ» ֆուտբոլ: Եթե անցած տարի խաղում էինք պաշտպանությունից հակագրոհների վրա, այս տարի փորձելու ենք ավելի դոմինանտ ֆուտբոլ խաղալ: Կարծում եմ՝ արդեն երկու խաղ է ստացվում է, բայց դա չի նշանակում, որ «Նորավանքը» այլ մարտավարությունով չի խաղալու: Մեր թիմը գնալով ավելի գրագետ ու ճկուն է լինելու ու փորձարկելու ենք շատ մարտավարություններ՝ կախված մրցակցից:
-Հաշվի առնելով, ձեր թիմի ակտիվությունը երկրորդ խաղակեսում ու ստեղծած գոլային պահերը, ի՞նչ կարծիքի եք, դուք այսօր մեկ միավոր վաստակեցի՞ք, թե՞ երկու միավոր կորցրիք:
-Ես արդեն նշեցի, որ մենք ավելիին էինք արժանի: Իսկ եթե մեկ միավոր վաստակել ենք, ավելին 3 միավորն է:
