Ֆուտբոլի Չեմպիոնների լիգայի խմբային փուլը մոտենում է ավարտին։ Վերջին տուրի խաղային առաջին օրում կա 2 խումբ, որտեղ փլեյ-օֆֆ փուլի ուղեգրեր այլևս չեն խաղարկվում։ Սակայն հետաքրքիր դիմակայությունները քիչ չեն։
Երեքշաբթի խաղարկվելու է փլեյ-օֆֆ փուլի 3 ուղեգիր։ F խմբում 1/8-րդ եզրափակիչի ուղեգիր արդեն նվաճել է «Բորուսիա» Դորտմունդը։ Երկրորդ տեղով ընթացող «Լացիոն» ունի 9 միավոր։ 3-րդը «Բրյուգեն» է։ Նրանք 7 միավոր ունեն։ Վերջին տուրում «Լացիոն» ու «Բրյուգեն» հանդիպելու են իրար։ Հենց այս խաղում կորոշվի թիմերից որը պայքարը կշարունակի Չեմպիոնների լիգայում, իսկ որը՝ Եվրոպա լիգայում։ Խմբի մյուս խաղում ոչինչ դրված չէ սեղանին․ «Զենիթը» տանն ընդունելու է «Բորուսիա» Դորտմունդին։
Ամենաթեժը, իհարկե, լինելու է H խմբում։ Այստեղ միանգամից երեք թիմ ունի 9 միավոր ու պահպանում է շանսերը հաջորդ փուլ դուրս գալու համար։ Այդ թիմերն են «Մանչեսթեր Յունայթեդը», «Պարի Սեն Ժերմենն» ու «ՌԲ Լայպցիգը»։ Գերմանական թիմը տանն ընդունելու է «մանկունյանցիներին»։ ՊՍԺ-ն տանը խաղալու է «Իստամբուլ Բաշակշեհիրի» հետ։ Այս խմբում կարող է ամեն ինչ լինել։
G խմբում փլեյ-օֆֆի ուղեգրերը նվաճել են «Բարսելոնան» ու «Յուվենտուսը», սակայն դեռևս հայտնի չէ, թե թիմերից որը որ տեղով դուրս կգա խմբից։ Վերջին տուրում «Բարսելոնան» հյուրընկալելու է «Յուվենտուսին»։ Եթե 2-րդ տուրում Կրիշտիանու Ռոնալդուի՝ կորոնավիրուսով վարակված լինելու պատճառով չտեսանք Մեսսի-Ռոնալդու դիմակայության հերթական սերիան, ապա այս անգամ ամեն ինչ գնում է նրան, որ վերջին տարիների լավագույն 2 ֆուտբոլիստներին դարձյալ կտեսնենք միասին նույն դաշտում։ Խմբի մյուս խաղում «Դինամո Կիևն» ու «Ֆերենցվարոշը» կխաղարկեն Եվրոպա լիգայի ուղեգիր։ Երկու թիմերն էլ ունեն 1 միավոր։
Խաղային օրվա միակ խումբը, որտեղ մրցաշարային առումով ոչինչ չի որոշվում, E խումբն է։ Այստեղ «Չելսին» առաջինն է, «Սևիլիան»՝ երկրորդը։ «Կրասնոդարը» արդեն նվաճել է Եվրոպա լիգայի ուղեգիր, իսկ «Ռեննը» դուրս է մնում հետագա պայքարից, քանի որ անգամ հավասար միավորների դեպքում չի կարող Եվրոպա լիգայի ուղեգրի համար պայքարել, քանի որ անձնական խաղերում զիջում է «Կրասնոդարին»։
Հանդիպումներ․
«Լացիո» — «Բրյուգե» — 21։55
«Զենիթ» — «Բորուսիա» Դորտմունդ — 21։55
«Բարսելոնա» — «Յուվենտուս» — 00։00
«Չելսի» — «Կրասնոդար» — 00։00
«Դինամո Կիև» — «Ֆերենցվարոշ» — 00։00
ՊՍԺ — «Բաշակշեհիր» — 00։00
«ՌԲ Լայպցիգ» — «Մանչեսթեր Յունայթեդ» — 00։00
«Ռենն» — «Սևիլիա» — 00։00
Արամ Սահակյան
