«Լիվերպուլի» կիսապաշտպան Ջեյմս Միլները շնորհավորել է «Լիդսին»՝ ԱՊԼ դուրս գալու առթիվ: «Լիդսը» Պրեմիեր-լիգայի ուղեգիր նվաճեց այն բանից հետո, երբ «Վեսթ Բրովմիչը» 1-2 հաշվով պարտվեց «Հադերսֆիլդին»: Անգլիայի եռակի չեմպիոնները 16 տարվա ընդմիջումից հետո են վերադարձել ԱՊԼ.
«Շնորհավորում եմ, «Լիդս»: Վերադարձաք այնտեղ, որտեղ՝ պետք է լինեիք»,- գրել է Միլները Թվիթերի իր էջում:
Միլները, հիշեցնենք, 2002-ից 2004 թվականներին հանդես է եկել «Լիդս Յունայթեդում»:
Congratulations LUFC 🔥🔥#backwhereyoubelong #MOT pic.twitter.com/AYYugyLL87
— James Milner (@JamesMilner) July 17, 2020
Հիշեցնենք՝ Մարսելո Բիելսայի թիմը 44 խաղում 87 միավոր է վաստակել ու Չեմպիոնշիփի մրցաշարային աղյուսակի առաջին հորիզոնականն է զբաղեցնում:
1990-ականների կեսերից մինչև 2000-ականների սկզբները «Լիդսը» կանոնավոր կերպով հանդես էր գալիս եվրագավաթներում, դուրս էր գալիս ՈՒԵՖԱ-ի Գավաթի և Չեմպիոնների լիգայի կիսաեզրափակիչներ: Ֆինանսական խնդիրները, սակայն, հանգեցրին նրան, որ թիմը 2003/04 մրցաշրջանի արդյունքներով դուրս մնաց ԱՊԼ-ից:2006/07 մրցաշրջանում «Լիդս Յունայթեդն» առհասարակ հայտնվեց Առաջին լիգայում, և միայն 3 մրցաշրջան անց կարողացավ վերադառնալ Չեմպիոնշիփ:
«Լիդսը» հիմնադրվել է 1919 թվականին: Ակումբն Անգլիայի եռակի չեմպիոն է (1968/1969, 1973/1974, 1991/1992), Անգլիայի (1972) և անգլիական լիգայի գավաթակիր (1968), ինչպես նաև երկրի Սուպերգավաթի հաղթող (1969, 1992):