Իհարկե, եվրոպական գեղեցիկ և շքեղ քաղաքները գրավիչ են և կարող են պտտեցնել նույնիսկ ամենատոկուն անձնավորության գլուխը, բայց ինչպես յուրաքանչյուր խրախճանքից հետո, այնպես էլ այստեղ՝ Չեմպիոնների լիգայի ֆուտբոլային հրավառությունից հետո, ցանկություն է առաջանում «վերադառնալ տուն»՝ մեր հարազատ առաջնություն: Հայաստանի առաջնությունը այս տարի ձանձրանալու առիթ մեզ չի տալիս: Մեկնարկում է 13-րդ տուրը, որի ընթացքում մեզ սպասում են ուշագրավ հանդիպումներ:
«Գանձասար-Կապան» (10 միավոր) — «Ուրարտու» (12 միավոր) . 08.11.19 ՀՖՖ տեխնիկական կենտրոն/ֆուտբոլի ակադեմիա, ժամը` 15:00
Բարձրագույն խմբի ընթացիկ առաջնությունում երկու թիմերն էլ բավականին ցածր արդյունավետություն են ցուցադրում: Իհարկե, վերջին տեղի համար առաջնությունում կա «անվտանգության բարձիկ»՝ «Երևանը», որը վստահորեն զբաղեցնում է վերջին հորիզոնականը: «Գանձասար-Կապանի» ֆուտբոլիստները լավ տրամադրությամբ են մոտենում այս հանդիպմանը, քանի որ օրեր առաջ ՝ հաղթահարելով «Շիրակի» արգելքը, դուրս եկան Հայաստանի Գավաթի խաղարկության 1/4 եզրափակիչ: Թիմը միևնույն` 1:2 հաշվով պարտվել է «Նոային» և «Լոռիին», այնուհետև 2:1 հաշվով պարտության մատնել «Արարատ- Արմենիային»: Աշոտ Բարսեղյանի թիմը կոշտ ֆուտբոլի կողմնակից է, ինչի մասին վկայում է ակումբի ֆուտբոլիստների ստացած կարմիր քարտերի քանակը (5): Խնդիրներ կան հատկապես հարձակման գծում. «Գանձասար-Կապանի» երեք հարձակվողներից միայն մեկն է դարձել գոլի հեղինակ, մնացած գոլերը խփել են պաշտպաններն ու կիսապաշտպանները: Որակյալ ֆուտբոլ են ցուցադրում Անդրանիկ Քոչարյանն ու Դավիթ Մինասյանը, ովքեր դարձել են երկուական գոլերին հեղինակ: Բացի այդ, նրանք իրենց ձեռքում են պահում խաղադաշտի կենտրոնը, և եթե հարձակման գծի ֆուտբոլիստները ավելի լավ օգտագործեին նրանց փոխանցումները, ապա «Գանձասար-Կապանը» չէր հայտնվի մրցաշարային աղյուսակի վերջնամասում: Նույն խնդիրները ունի նաև «Ուրարտուն»: Այս թիմն էլ կարողացավ Գավաթի խաղարկությունում հաղթահարել «Փյունիկի» արգելքը, բայց առաջնությունում նրանց գործերը այդքան էլ լավ չեն: Իլշատ Ֆայզուլինի թիմը անհաջող սկսեց առաջնությունը՝ կրելով երեք անընդմեջ պարտություն, սակայն, վերջին չորս հանդիպումներում թիմը տարել է երեք հաղթանակ: Հատկապես աչքի է ընկնում սլավոնական Եվգենի Կոբզար — Եվգեն Բուդնիկ զույգը, որոնք միասին դարձել են 7 գոլի հեղինակ: Սպասում ենք անզիջում պայքար, միգուցե ոչ այնքան գրավիչ, բայց համառ ֆուտբոլ, քանի որ երկու թիմերին էլ հաղթանակը օդի և ջրի նման անհրաժեշտ է:
«Փյունիկ» (13 միավոր) — «Շիրակ» (25 միավոր) . 08.11.19 «Հանրապետական» մարզադաշտ, ժամը` 18:30
Երկու թիմերն էլ պետք է պայքարեն չեմպիոնական տիտղոսի համար: Եթե «Շիրակը» գնում է այդ ճանապարհով, ապա «Փյունիկի» մասին նույնը չենք կարող ասել: Խնդիրները բազմատեսակ են: Այնպիսի տպավորություն է, որ եվրագավաթային «տորթի» քաղցր համը զգալուց հետո «Փյունիկի» ֆուտբոլիստները չեն կարողանում կենտրոնանալ Հայաստանի առաջնության վրա: Դրան չեն նպաստում նաև ակումբում առկա խնդիրները. ղեկավարության տարատեսակ հայտարարությունները մրցավարների կողմնակալության մասին, մարզչական փոխատեղումները: Պարզ է, որ այս ամենը չի կարող իր ազդեցությունը չունենալ թիմի խաղի, արդյունքի և իհարկե ֆուտբոլիստների պահվածքի վրա: Մեղադրողների և արդարացնողների պակաս չենք զգա, բայց դա չէ խնդիրը (հատկապես, որ Էրիկ Վարդանյանն արդեն տեղափոխվել է այլ ակումբ: Դժվար է հասկանալ, թե որ ուղղությամբ է ընթանում ակումբը, թե ինչ մեթոդներով պետք է մարզչի պաշտոնակատար Սուրեն Չախալյանը փոխի իրավիճակը և այդ գործում ո՞րն է լինելու թիմի նորընծա փոխնախագահի՝ Ալեքսանդր Տարխանովի դերը: Չէ՞ որ նա ակումբի զարգացման գծով փոխնախագահն է, իսկ ու՞ր է տանում այդ զարգացումը: Հիշենք, որ Տարխանովը Եկատերինբուրգի «Ուրալում» արդեն անցել է նմանատիպ «արահետով», երբ այնտեղ էլ հեռացավ մարզչի պաշտոնից՝ զբաղեցնելով բարձրաստիճան պաշտոն ակումբի ղեկավարությունում: Սրանք հարցեր են, որոնք դեռ չունեն պատասխաններ: Միգուցե, ոչ հեռու ապագայում մենք կստանանք դրանց պատասխանները, սակայն, մի բան հստակ է՝ թիմն առայժմ չի ցուցադրում իր հնարավորությունների անգամ կեսը: «Փյունիկում» հավաքված են Հայաստանի հավաքականի փորձառու ֆուտբոլիստներ:
«Շիրակի» մասին ասելիքը սուղ է, գործ ունենք վերջին տարիների Հայաստանի ամենակայուն թիմերից մեկի հետ: Վարդան Բիչախչյանի թիմը, ի տարբերություն նախորդ մրցաշրջանի, շտկել է իրավիճակը և առաջնության առաջատար «Արարատի» հետ միասին գլխավորում է մրցաշարային աղյուսակը: Առաջնության գլխավոր ռմբարկուն ֆանտաստիկ ֆուտբոլ ցուցադրող Մորի Կոնեն է (11 գոլ): Կոնեն, կարծես թե, «Շիրակում» գրեթե մշտապես առկա հերթական բարձրակարգ հարձակվողն է:
«Ալաշկերտ» (22 միավոր) — «Արարատ» (25 միավոր). 09.11.19 «Նաիրի»/«Ալաշկերտ» մարզադաշտ, ժամը` 14:00
«Ալաշկերտը» զբաղեցնում է չորրորդ հորիզոնականը, սակայն, ընդամենը երեք միավոր է զիջում առաջատար «Արարատին»: Սեփական հարկի տակ տարած հաղթանակը կարող է «Ալաշկերտին» դարձնել չեմպիոնական պայքարի լիարժեք մասնակից: Թիմը վստահորեն հաղթելով` «Տորպեդո Երևանին», դուրս եկավ Գավաթի խաղարկության 1/4 եզրափակիչ: Առաջնության վերջին տուրում «Արարատ-Արմենիայի» նկատմամբ տարած ծանր հաղթանակը (2:1), ցույց է տալիս, որ Արմեն Ադամյանի գլխավորած թիմը կարող է լուրջ նպատակներ դնել իր առջև: Տիագո Գալվաո — Գուստավո Մարմենտինի բրազիլական զույգին ՝ ակտիվորեն աջակցում են հարձակման գծի մյուս կրակոտ ֆուտբոլիստները: Ամեն դեպքում, գործող գավաթակրին բարդ փորձություն է սպասվում: «Արարատը» միգուցե աչքի չի ընկնում խանդավառ ֆուտբոլով, բայց Վադիմ Լազորենկոյի գլխավորած թիմը ցուցադրում է բալանսավորված խաղ: Չնայած «Նոայից» կրած պարտությանը, ինչպես նաև ՝ «Շիրակից» կրած ցավալի պարտությանը, թիմը մնում է առաջնությունը հաղթելու հիմնական հավակնորդներից մեկը: Եթե «Արարատը» հաղթի, ապա ոչ միայն կամրապնդի իր դիրքերը, այլև չի թողնի իր պոտենցիալ մրցակցին «շնչել իր թիկունքին»
«Նոա» (17 միավոր ) — «Լոռի» (22 միավոր). 10.11.19 «Նաիրի»/«Ալաշկերտ» մարզադաշտ, ժամը` 14:00
Մրցաշարային աղյուսակի «հարևանների» հերթական հանդիպումը: Չնայած թիմերի միջև կա չորս միավորի տարբերություն, բայց նրանց ցուցադրած խաղում ՝ ոչ այնքան: Նաև յուրատեսակ մրցակցություն կլինի այդ խաղում` Մաքսիմ Մայրովիչ- Ջոնել Դեսիրե: Նրանք իրենց թիմերի հարձակման գծի առաջատարներն են, այն ֆուտբոլիստները, ովքեր կարող են ոչ ստանդարտ գործողություններով անակնկալի բերել մրցակցին: Վադիմ Բորեցը և Դավիդ Կամպանյան ստեղծել են մրցունակ թիմեր, որտեղ խաղին տոն են տալիս լեգիոներները: «Նոան» վերջին երկու հանդիպումներն անցկացրեց «Արարատների» դեմ, մեկը՝ առաջնությունում, մյուսը՝ Գավաթի խաղարկությունում: Եթե առաջնության խաղում Վադիմ Բորեցի գլխավորած թիմը շանսեր չունեցավ «Արարատ- Արմենիայի» դեմ (1:3), ապա Գավաթի 1/8 եզրափակոչւմ նրանք կարողացան հաղթահարել առաջնության առաջատարներից մյուսի՝ Երևանի «Արարատի» արգելքը (1:0): Այնպես որ, սպասում ենք «պինդ ընկույզների» անհաշտ հակամարտությանը:
«Արարատ-Արմենիա» (23 միավոր) — «Երևան» (0 միավոր). 10.11.19 ՀՖՖ տեխնիկական կենտրոն, Ֆուտբոլի ակադեմիա, ժամը` 15:00
Երբ թիմը 12 տուրից հետո միավոր չունի, իսկ խփած և բաց թողած գոլերի հարաբերակցությունը՝ 7 խփած և 24 բաց թողած գոլ է, հոգեբանորեն դժվար է նոր հույսերով և հույզերով տրամադրվել հերթական հանդիպմանը: Այս հանդիպման գլխավոր ինտրիգը դրա բացակայությունն է: Երբ ֆուտբոլում և ընդհանրապես սպորտում բացակայում է անկանխատեսելիությունը, այն վերածվում է մի հասարակ թվապատկերի, որի մեջ դժվար է գտնել որևէ իմաստ: Ավելին, դժվար է գտնել այդ իմաստը փնտրելու անհրաժեշտությունը: Միայն կարելի ցանկանալ «Երևանի» ֆուտբոլիստներին, որ նրանք մոռանան մրցաշարակին աղյուսակը և պարզապես խաղան այս խաղը, փորձեն վայելել խաղադաշտում գտնվելու ամեն մի պահը: Չնայած, դժվար թե նրանք կարողանան ըմբռնել մեր այս ուղերձը, համենայն դեպս առանց թարգմանչի դա դժվար կլինի անել, քանի որ թիմի հիմնական կազմի բոլոր խաղացողները լեգիոներներ են: Դժվար է ասել, թե այսպիսի իրավիճակում ո՞րն է այսքան լեգիոներների իմաստը,բայց արդեն պայմանվորվել ենք, որ նման իրավիճակում միգուցե պետք չէ այն փնտրել: Միայն կարել է հաջողություն մաղթել Խոսե Անտոնիո Կալդաս դե Օլիվեյրային և իր գլխավորած թիմին: Իսկ «Արարատ-Արմենիայի» ֆուտբոլիստներին կարող է խանգարել գերվստահությունը, որը կարող է վերաճել թմրեցնող ինքնավստահության: Հայաստանի գործող չեմպիոնը չի ցուցադրում իր հաղթական խաղը, բայց այս պարագայում Վարդան Մինասյանի թիմը ունի անհրաժեշտ այն ամենը, ինչը հնարավորություն պետք է տա առանց լուրջ «գլխացավանքի» վաստակել այդքան անհրաժեշտ երեք միավորները և միանալ չեմպիոնական պայքարին: Միայն թե, պետք հարգանքով վերաբերվել մրցակցին և ժամանակից շուտ «չլքել պարահրապարակը», քանի դեռ հնչում է երաժշտությունը:
Նարեկ Գրիգորյան
