Եվրոպական թոփ լիգաներում աստիճանաբար նշմարվում են չեմպիոնության համար պայքարողներն ու լիգաները լքելու թվացյալ հավակնորդները։ Պայքարը թափ է հավաքում։ Այս ամենի մեջ շատերը անուշադրության են մատնում եվրոպական ֆուտբոլային գերտերությունների կարևորությամբ երկրորդ առաջնություններին։
Ողջու՜յն։ Այսօր մտովի կտեղափոխվենք Անգլիա, Իսպանիա, Գերմանիա և Իտալիա՝ հասկանալու համար, թե ինչ վիճակ է այս երկրների ֆուտբոլային երկրորդ լիգաներում։
Championship
Եթե Պրեմիեր լիգայում «Լիվերպուլը» առաջ է անցել բոլորից, ապա Championship-ում իրավիճակը չափազանց խառն է։ Առաջատարը «Վեստ Բրոմվիչն» է։ Սլավեն Բիլիչի թիմը 14 խաղից հետո 27 միավոր է վաստակել։ «Վեստ Բրոմի» թիկունքում «շնչում» են «Պրեստոնը», «Լիդսը» և «Սուոնսին»։
Այս թիմերը 25 միավոր են վաստակել։ 24-ական միավոր ունեն «Շեֆիլդ Վեդը», «Բրիստոլ Սիթին»։ «Ֆուլհեմն» ու «Քուինս Պարկ Ռենջերսը» 23 միավոր ունեն։ «Չարլտոնը», «Նոթինգեմը» և «Բիրմինգեմը» 14 խաղից 22 միավոր են վաստակել։ «Բրենտֆորդը» 21 միավոր ունի իր ակտիվում։
Այսպիսով, Championship-ում իսկական «գժանոց» է։ Միանգամից 12 թիմեր շատ մոտ են միմյանց միավորների քանակով։ Ամեն տուրում իրավիճակը կարող է փոխվել։ Նախորդ տարի ԱՊԼ-ի վերադարձին չափազանց մոտ եղած «Դերբին» 18 միավոր ունի ու 16-րդն է։ Նրանց ևս պայքարից հանել պետք չէ։ Նշենք, որ առաջատար «Վեստ Բրոմվիչը» վերջին երկու խաղում 4 միավոր է կորցրել։
Լա լիգա 2
Այստեղ կա որոշակի պարզություն կապված առաջատարի հետ։ Պրիմերայի երբեմնի մասնակից «Կադիսը» 13 խաղից հետո 31 միավոր ունի ու երկրորդ տեղում գտնվող «Ալմերիայից» առաջ է 8 միավորով։ «Ֆուենլաբրադան» ևս 23 միավոր է վաստակել։
Նախորդ մրցաշրջանում Լա լիգայի գլխավոր անհաջողակ «Ուեսկան» «Ալբասետեի» հետ միասին կիսում է 4-րդ և 5-րդ տեղերը վաստակած 22-ական միավորով։ «Դեպորտիվոն» 9 միավորով եզրափակում է մրցաշարային աղյուսակը։
2-րդ Բունդեսլիգա
«Համբուրգը», կարծես թե, չի պատրաստվում երկար մնալ երկրորդ Բունդեսլիգայում։ Դիտեր Հեքինգի սաները 11 տուրից հետո 24 միավորով միանձնյա գլխավորում են մրցաշարային աղյուսակը։ Երկրորդ տեղում գերմանական գլխավոր լիգայի երբեմնի մշտական ներկայացուցիչներից մեկն է՝ «Արմինիան» 22 միավորով։
«Շտուտգարտը» 20 միավոր ունի, սակայն երրորդ տեղում գտնվող թիմը լավագույն մարզավիճակում չէ։ Վերջին երեք խաղերում նրանք երեք պարտություն են կրել։ 11-րդ տուրում հենց «Համբուրգն» է առավելության հասել «Շտուտգարտի» նկատմամբ 6-2 հաշվով։
Բ սերիա
Բ սերիայում շատ հանդիպումներ դեռևս չեն կայացել։ 9 տուր։ «Կրոտոնեն» և «Բենեվենտոն» 18 միավոր ունեն։ Երրորդ տեղում «Էմպոլին» է։ Վերջիններս առաջատարներից երկու միավորով են հետ մնում։ Ա սերիայի բարձրանալու համար պայքարում կան նոր անուններ ի դեմս «Ասկոլիի», «Սալերնիտանայի» և «Պերուգիայի»։ Այս թիմերին վերջին տարիներին Ա սերիայում չենք տեսել։
Ինչպես երևում է, բոլոր տեղերում էլ չափազանց թեժ պայքար է ծավալվել իրենց երկրների ֆուտբոլային գլխավոր լիգա տեղափոխվելու համար։ Ժամանակ առ ժամանակ մենք հայացք կնետենք հասկանալու համար, թե ինչ իրավիճակ է ոչ պակաս հետաքրքիր ու լարվածությամբ չզիջող առաջնություններում, որտեղ նպատակը մեկն է․ նվաճել գլխավոր առաջնությունում նորից խաղալու բաղձալի ուղեգիրը․․․
Արամ Սահակյան
