Նոր մրցաշրջանում մենք հավանական է ականատես կլինենք բոլորովին կերպարանափոխված «Չելսիի»։ Լոնդոնյան ակումբը ամենաակտիվներից մեկն է տրանսֆերային շուկայում, և միջազգային մամուլում վերջերս բավականին լուրջ գործարքների մասին բազմաթիվ շշուկներ են հայտնվել։
Թե որքանով են իրատեսական այդ գործարքները, վերջապես՝ ինչ փոփոխություններ են առաջիկայում սպասվում «արիստոկրատներին», այսօր կփորձենք քայլ առ քայլ անցնել թիմի կազմով և պարզել՝ այդ բազմաթիվ շշուկները տեղի՞ն են, հավանական տրանսֆերներն ադեկվա՞տ են արդյոք և, ըստ մեզ, ովքե՞ր են անհրաժեշտ Լեմպարդին՝ ավելի ուժեղ և մրցունակ թիմ ունենալու համար։
«Չելսին» երկարաձգել է պայմանագիրը թիմի դարպասապահ Վիլի Կաբալյերոյի հետ մինչև 2021 թվականը։ Լոնդոնյան ակումբը օգտվել է 38-ամյա դարպասապահի պայմանագրում առկա դրույթից, որի համաձայն՝ «Չելսին» կարող էր մեկ տարով երկարաձգել գործող համաձայնագիրը։ Սակայն, պարզ է, որ Վիլին դիտարկվում է որպես պահեստային դարպասպահ, իսկ ահա հիմնական դապասապահի հարցը «Չելսիի» գլխավոր խնդիրներից մեկն է։ Ինչո՞ւ․ կա մեկ պատասխան՝ Կեպա։ 25-ամյա դարպասապահը բավականին բարձրակարգ է, և նրա դեպքում խնդիրներ կոչվածը կապված չէ նրա խաղի հետ։ Բոլոր խնդիրները կուլիսների հետևում են․ նախ խնդիրներ Սարիի հետ, ընդհուպ մինչև վեճեր մարզումների ժամանակ, իսկ հետո, ըստ տարբեր աղբյուրների, տարաձայնություններ նաև ակումբի ղեկավարության և նոր մարզչի՝ Լեմպարդի հետ։ Որքան էլ որ իսպանացին լավն է դարպասներում, Լեմպարդը դեռևս թիմ կառուցելու ճանապարհին է, և մոտ ապագայում ցանկալի չի լինի հանդերձարանում ավելորդ լարվածության առկայությունը։ Այնպես որ, շշուկները, որ Կեպան կարող է լքել Լոնդոնը, բոլորովին անհավանական չեն թվում, նամանավանդ, որ հայրենիքում մի շարք ակումբներ դեմ չեն լինի տրանսֆերը գնելուց։
Իսկ ո՞վ կփոխարինի իսպանացուն։ Ամստերդամի «Այաքսի» դարպասապահ Անդրե Օնանան ամռանն ամենայն հավանականությամբ կտեղափոխվի Լոնդոնի «Չելսի»: Voetbal Nieuws-ի հաղորդմամբ, Օնանան որոշել է տեղափոխվել Լոնդոն՝ չնայելով ՊՍԺ-ի և «Բարսելոնայի» (որի սանն էլ նա հանդիսանում է) հետաքրքրություններին: Հաղորդվում է, որ ՊՍԺ-ի մարզական տնօրեն Լեոնարդոն հայտնել է, որ Օնանային ձեռք բերելու շանսերը սպառված են: Հայտնի է, որ ֆուտբոլիստի տրանսֆերային արժեքը կկազմի 40-50 մլն եվրո: Հենց այդքան գումարով էլ կարելի է վաճառել Կեպային, և ստացվում է, որ մեկ բարձրակարգ դարպասապահին կարելի է փոխարինել գրեթե բոլոր ասպեկտներով հավասարզոր մեկ այլ դարպասապահով։
«Չելսին» ցանկանում է ուժեղացնել թիմի պաշտպանական գիծը։ Եվ, իհարկե, դա տրամաբանական է, քանի որ լոնդոնյան գրանդի պաշտպանությունը թոփ համարել՝ ներկա պահին լեզուն չի պտտվում։ Goal.com-ի տեղեկություններով՝ լոնդոնյան ակումբը հետաքրքրված է «Լեսթերի» պաշտպան Բեն Չիլուելի ծառայություններով։ Աղբյուրի տեղեկություններով՝ «Չելսին» ակտիվորեն աշխատում է պաշտպանի տրանսֆերը իրականություն դարձնելու համար։ Լրագրող Ֆաբրիցիո Ռոմանոն նշում է, որ ակումբների միջև բանակցություններ են ընթանում, և Չիլուելն էլ ցանկանում է տեղափոխվել «Չելսի»։ Նա նաև գիտի, որ իր ծառայություններով հետաքրքրված է Ֆրենկ Լեմպարդը։ Չիլուելը, անխոս, ներկայումս լավագույն ձախ պաշտպաններից մեկն է աշխարհում, և նրան ձեռք բերելը մեծ հաջողություն կլինի «արիստոկրատների» համար։
Ըստ որոշ աղբյուրների, «Չելսին» հետաքրքրված է Մյունխենի «Բավարիայի» պաշտպան Դավիդ Ալաբայի ծառայություններով։ Ալաբան ունիվերսալ է, հաճախ խաղում է հենց կենտրոնական պաշտպանի դիրքում, նաև հենակետայինի, ինչպես նաև լավ է դիտվում ձախ եզրում։ Անշուշտ մամուլում դեռ կհայտնվեն նոր թեկնածուներ «Չելսիի» համար, այնպես որ 1-2 ամսից, Լեմպարդը ձեռք կբերի որևէ բարձրակարգ կենտրոնական պաշտպանի։
Calciomercato-ն հայտնում է, որ «Չելսիի» պաշտպան Էմերսոնը մոտ է «Յուվենտուսին» միանալուն: Ենթադրվում է, որ թուրինյան ակումբն արդեն սկսել է բանակցությունները 25-ամյա պաշտպանի տեղափոխության ուղղությամբ: Ֆուտբոլիստի տրանսֆերից «Չելսին» ակնկալում է ստանալ առնվազն 30 միլիոն եվրո: Իր հերթին «Յուվենտուսի» կիսապաշտպան Միրալեմ Պյանիչը կարող է շարունակել կարիերան Պրեմիեր լիգայում, գրում է Sky Sports Italia-ն: «Ծեր սենյորայի» գլխավոր մարզիչ Մաուրիսիո Սարին ցանկանում է ձեռք բերել «կապույտների» կիսապաշտպան Ժորժինյոյին: Թուրինցիները մտածում են Պյանիչին այս գործարքում ընդգրկելու մասին: Սակայն այստեղ կա մի մեծ խնդիր․ Պյանիչը ցանկանում է տեղափոխվել «Բարսելոնա», իսկ հակառակ ուղղությամբ կարող է Թուրին մեկնել Արտուրը։ Եթե վերջին գործարքը իրականանա, ապա հարց է մնում՝ «Յուվենտուսը» կշարունակի՞ ցուցաբերել հետաքրքություն Ժորժինյոյի նկատմամբ․ ֆուտբոլիստն անկասկած բարձրակարգ է և դեռ երկար տարիներ կարող է օգուտ տալ լոնդոնյան գրանդին, սակայն եթե նա ցանկանա հեռանալ, «Չելսին» դժվար թե խոչընդոտի նրա ծրագրերին։ Մենք բոլորս էլ լավ գիտենք, թե ինչ է լինում, երբ թիմը ընդառաջ չի գնում ակումբից հեռանալ ցանկացող ֆուտբոլիստներին․ արդյունքում տուժում են բոլորը՝ և՛ թիմը, և՛ ֆուտբոլիստը։
««Չելսին» ինձ առաջարկել է 2 տարվա պայմանագիր, իսկ ես ուզում եմ համաձայնագիր 3 տարով։ Մենք չենք կարողանում համաձայնության գալ»,-ասել է Վիլիանը։ Բրազիլացի կիսապաշտպանի գործող պայմանագիրն ավարտվում է այս ամառ։ Այս թեմայի շուրջ հրապարակվող լուրերը թուլ են տալիս ենթադրել, որ կողմերը դժվար թե համաձայնության գան, և Վիլիանը կլքի լոնդոնյան ակումբը։ Նույն ճակատագիրը, ամենայն հավանակնությամբ սպասվում է նաև Պեդրոին։ Նկատենք, որ թիմի հարձակվողական ոճի խաղացողներից թիմում չէ արդեն Մարիո Պաշալիչը, ում տրանֆերը վերջերս գնեց «Ատալանտան», որտեղ խորվաթ կիսապաշտպանը խաղում էր վարձավճարով։
Հարձակվողական ոճի ֆուտբոլիստներից թիմում կա Մեյսոն Մաունթը, ով պարզապես հրաշալի մրցաշրջան անցկացրեց, եթե հաշվի առնենք այն փաստը, որ սա նրա առաջին մրցաշրջանն էր ԱՊԼ-ում։ Կա նաև Քրիստիան Պուլիշիչը․ ամերիկացին, միգուցե չարդարացրեց շատերի ակնկալիքները, սակայն չպետք է մոռանալ, որ նա մրցաշրջանի մի հատվածը բաց թողեց վնասվածքների պատճառով, բացի այդ էլ՝ տեղափոխությունից հետո նա դեռ ադապտացիայի փուլում է։ Ամռանը թիմին կմիանա նաև Հակիմ Զիեշը, ում տրանֆերային իրավունքները «Չելսին» «Այաքսից» ձեռք էր բերել դեռ ձմռանը։ Թե ինչպիսի ֆուտբոլիստ է Զիեշը և ինչ սրալի խաղ է ցուցադրում, ֆուտբոլասերների մեծ մասը շատ լավ գիտի, և չկենտրոնանալով նրան գովաբանելու վրա՝ պարզապես նկատենք, որ ֆուտբոլիստը բավականին կուժեղացնի «արիստոկրատների» հարձակման գիծը։ Բացի այդ, թիմում կան նաև Լոֆթուս Չիկը, Հադսոն Օդոյին։
Mundo Deportivo-ն հաղորդում է, որ «Չելսին», «Մանչեսթեր Յունայթեդը» և «Լեսթերը» հետաքրքրված են Ֆելիպե Կոուտինյուի ծառայություններով։ Բրազիլացու տրանսֆերային մրցավազքին կարող է միանալ նաև «Նյուքասլը»։ Ինչ վերաբերվում է «Չելսիին», նա բրազիլացու տրանսֆերի մրցավազքում չի դիտարկվում որպես ֆավորիտ։
Անգլիական ակումբները պայքարում են «ՌԲ Լայպցիգի» հարձակվող Տիմո Վերների տրանսֆերի համար: The Telegraph-ի հաղորդմամբ, Վերներին ձեռք բերելու մտքից հետ չի կանգնում Լոնդոնի «Չելսին»: Չնայած ֆուտբոլիստի՝ «Լիվերպուլ» տեղափոխվել ցանկությանը, «Չելսին» ամեն ինչ կանի գերմանացու տրանսֆերը ձեռք բերելու համար, իսկ «Լիվերպուլը» երկարաձգում է գործարքի հաստատումը: Հիշեցնենք, որ Վերներին հրաժարագնով ձեռք բերելու ժամկետը լրանում է հունիսի 15-ին. հրաժարագինը 55 մլն եվրո է: Սակայն․․․ բոլորովին վերջերս մամուլում սկսվեցին պտտվել լուրեր, իբր Վերները մտափոխվել է և ցանկանում է տեղափոխվել ոչ թե «Լիվերպուլ», այլ հենց Լոնդոնյան ակումբ։ Նույնիսկ հաղորդվում է, որ նա արդեն համաձայնեցրել է անձնական պայմանագրի մանրամասները «Չելսիի» հետ, իսկ մերսիսայդնցիներն էլ, իմանալով այդ ամենի մասին, ետ են կանգնել գերմանացուն ձեռք բերելու մտքից։ Ըստ էության այս հարցում Վերներին հասկանալ կարելի է․ Յուրգեն Կլոպի թիմում նրան սպասվում էր մեծ մրցակցություն հարձակման գծում՝ Սալահ, Մանե, Ֆիրմինո․․․ ո՞ւմ տեղը պետք է զբաղեցներ Վերները։ Իսկ Լեմպարդի թիմում հիմնական կազմում խաղալու հավանականությունն ավելի մեծ է։ «Չելսիի» հարձակման գծում արդեն կան երիտասարդ Աբրահամը և փորձառու Ժիրուն, սակայն վերջինս, ով արդեն իսկ երկարաձգել է պայմանագիրը լոնդոնցիների հետ, հիմնականում դիտարկվում է որպես ռոտացիայի ֆուտբոլիստ։ Ինչ վերաբերվում է Բատշուայիին, ապա նրան «Չելսին» հնարավոր է կրկին վարձավճարով գործուղման ուղարկի որևէ այլ ակումբ, կամ էլ ընդհանրապես վաճառի բելգիացու տրանսֆերը։ Իսկ Ալվարո Մորատային հաստատ այլևս չենք տեսնի Լոնդոնում․ նա վարձավճարով հանդես էր գալիս «Աթլետիկոյում» և մադրիդյան ակումբը, ըստ նախնական պայմանավորվածության, արդեն իսկ գնել է նրա ամբողջական տրանսֆերը։ Այս ամենը հաշվի առնելով՝ Վերների տեղափոխությունը հենց լոնդոնյան ակումբ լիովին ադեկվատ է թվում։
Վար Բաբայան
Շարքի նախորդ մասերը
Դեպի բաղձալի չեմպիոնություն․ Ինչո՞ւ է Լիվերպուլը այդքան լավը
Ֆուտբոլային աշխարհի 5 ներկայացուցիչներ, ովքեր կցանկանային շուտ մոռանալ այս տարին
