ՀՀ կրթության, գիտության, մշակույթի և սպորտի նախկին փոխնախարար Գևորգ Լոռեցյանի գործի քննության ձգձգումը պայմանավորված է նրանով, որ նա փաստացի ենթարկվում է քրեական հետապնդման նաև մի այնպիսի արարքի համար, որի վերաբերյալ նրան մեղադրանք չի առաջադրվել: Այս մասին ֆեյսբուքյան իր էջում կատարած գրառման միջոցով հայտնել է Լոռեցյանի պաշտպան Լևոն Սահակյանը՝ ընդգծելով, որ սա Մարդու իրավունքների եվրոպական կոնվենցիայի 6-րդ հոդվածի իմաստով արդար դատաքննության իրավունքի կոպիտ խախտում է:
Այլ կերպ ասած՝ Գևորգ Լոռեցյանն իրեն հասկանալի լեզվով (հայերեն) չի տեղեկացվել իրեն ներկայացվող նաև այդ մեղադրանքի բնույթի ու հիմքի մասին:
«ՀՀ ԿԳՄՍ նախկին փոխնախարար Գևորգ Լոռեցյանը ակնհայտ անհիմն մեղադրանքով կալանավորվեց հինգ ամիս առաջ: Վերջինս մինչ օրս որևէ սուր հայտարարությամբ հանդես չի եկել իրեն առաջադրված մեղադրանքի կապակցությամբ և նշել է, որ ապավինում է ՀՀ արդարադատությանը ու հուսով է, որ օբյեկտիվ քննության արդյունքում կվերականգնվի իր բարի համբավը:
Այսօր՝ կալանավորվելուց շուրջ կես տարի անց, Գևորգ Լոռեցյանն արդեն իր տարակուսանքն է հայտնում քրեական գործի դանդաղ ընթացքի վերաբերյալ, ինչի կապակցությամբ հորդորում ենք ՀՀ իրավապահ մարմիններին ցուցաբերել առավել ջանասիրություն ու հնարավորինս շուտ ավարտել գործի նախաքննությունը»,- գրել է Լևոն Սահակյանը:
Ինչ վերաբերում է առաջադրված մեղադրանքին, ապա Լևոն Սահակյանը նշում է՝ պահպանելով սույն գործով որդեգրած ռազմավարությունը, հրապարակայնորեն որևէ փաստի վերաբերյալ պնդումներ առայժմ իրենք չեն կատարի:
«Պարզապես, այդ մեղադրանքի լրջության աստիճանը գնահատելու համար հիշեցնենք, որ Լոռեցյանին մեղադրանք է առաջադրված այն բանի համար, որ նա ավելի քան 13 միլիոն ՀՀ դրամի չափով կաշառք ստանալու պայմանավորվածություն է ձեռք բերել տնտեսվարող սուբյեկտի հետ մրցույթի շրջանակներում նրա հաղթանակը ապահովելու հաար:
Ի դեպ, ֆանտաստիկ տնտեսագետ պետք չէ լինել, որպեսզի պարզագույն հաշվարկի միջոցով հասկանալ, որ այդ մրցույթի հաղթանակի արդյունքում տվյալ կազմակերպության շահույթը կազմելու էր մի քանի անգամ ավելի փոքր գումար, քան «պայմանավորված կաշառքի» գումարն էր»:
Սահակյանը նշում է՝ քրեական հետապնդում իրականացնող մարմինը կամ պետք է առնվազն ապացուցի, որ սույն գործով «կաշառք տվողը» աշխարհի ամենավատ բիզնեսմենն է, կամ ընդունի, որ առաջադրված մեղադրանքը զավեշտ է:
«Անկախ նրանից, թե նշվածներից որ ուղղոթյամբ կկենտրոնանան՝ հորդորում ենք գործել արագ»:
Հիշեցնենք, որ դեկտեմբերի 5-ին կաշառք ստանալու կասկածանքով Գևորգ Լոռեցյանը, նրա վարորդն ու ֆուտբոլային ակումբներից մեկի նախագահը ձերբակալվել են, ավելի ուշ՝ կալանավորվել։
