Վաղը՝ հունիսի 9-ին, Հայաստանի ազգային հավաքականը Երևանի Վազգեն Սարգսյանի անվան «Հանրապետական» մարզադաշտում ընկերական հանդիպում կանցկացնի Մոլդովայի ընտրանու հետ։
Նախախաղային մամուլի ասուլիսի ընթացքում լրագրողների հարցերին է պատասխանել ռումինական «Ֆարուլի» և ազգային թիմի կիսապաշտպան Նարեկ Գրիգորյանը։
«Մեր առաջնությունն ավելի ուշ ավարտվեց, քան մյուսները, և կարծում եմ՝ լավ մարզավիճակում եմ գտնվում ու պատրաստ եմ վաղվա խաղին։ Թիմն ընդհանուր առմամբ լավ է պատրաստվել. ամենակարևորը գիտենք՝ դաշտում ինչ պետք է անենք։ Ամեն ինչ անելու ենք, որ մեր երկրպագուներին ուրախացնենք հաղթանակով։
Բնականաբար՝ արդեն վերլուծել ենք մրցակցին։ Մոլդովան լավ թիմ է, բայց կփորձենք չեզոքացնել նրանց ուժեղ կողմերը, օգտագործել մեր ուժեղ կողմերը և հասնել դրական արդյունքի։
Ինչ վերաբերում է ներկայիս ակումբում հարմարվելուն՝ այո՛, բնականաբար հարմարվել եմ։ Բայց, իհարկե, առաջընթաց գրանցելու ցանկություն միշտ կա. ուղղակի այս պահին դեռ հստակ հեռանկարներ չկան դրա վերաբերյալ։ Պատրաստվում եմ հաջորդ մրցաշրջանը ևս այնտեղ անցկացնել, իսկ թե ապագայում ինչ կլինի՝ այս պահին չեմ կարող ասել։
Արդեն բավականին երկար ժամանակ է, ինչ հրավիրվում եմ հավաքական: Գրեթե բոլոր ֆուտբոլիստների հետ խաղալու փորձ ունեմ։ Ճիշտ է՝ նոր ֆուտբոլիստներ շատ ունենք հավաքականում, մեծ փոփոխություններ են եղել, բայց մարզումների ընթացքում փորձում ենք կարճ ժամանակահատվածում հասկանալ իրար, որպեսզի դաշտում կարողանանք լավ արդյունք ցույց տալ։
Մոլդովայի հավաքականից մի քանիսին լավ ճանաչում եմ, նրանց խաղային որակներին ծանոթ եմ: Նրանցից մի քանիսը խաղում են Ռումինիայի առաջնությունում: Կարծում եմ՝ ինձ հավելյալ օգնություն կլինի խաղադաշտում այն, որ ճանաչում եմ այդ խաղացողներին»,- ասել է Գրիգորյանը։
Հիշեցնենք, որ Հայաստան – Մոլդովա ընկերական հանդիպումը կմեկնարկի ժամը 19։00-ին։
