UFC-ի թեթև քաշային կարգի վարկանիշային աղյուսակի երկրորդ հորիզոնականը զբաղեցնող Արման Ծառուկյանը սուր քննադատության է ենթարկել բրիտանացի մարտիկ Փեդի Փիմբլեթին։
Հիշեցնենք, որ հունվարի 25-ին Լաս Վեգասում (ԱՄՆ) կայացած UFC 324 մրցաշարի գլխավոր իրադարձությունը թեթև քաշային կարգի ժամանակավոր չեմպիոնի տիտղոսի համար մղվող պայքարն էր Ջասթին Գեյջիի և Փեդի Փիմբլեթի միջև։ Այդ դիմակայությունում Գեյջին հաղթանակ է տարել մրցավարների միաձայն որոշմամբ՝ նվաճելով ժամանակավոր չեմպիոնի տիտղոսը։
«Եթե նայենք վարկանիշային աղյուսակին, ապա Փիմբլեթին կարող են հաղթել Բենուա Սեն-Դենին, Ռաֆայել Ֆիզիևը, ես, Չարլզ Օլիվեյրան, Մաքս Հոլոուեյը․․․ բոլորը կարող են նրան հաղթել։ Դեն Հուքերը նրան կհաղթի 100 տոկոսանոց հավանականությամբ։ Ես կցանկանայի, որ նրան հեռացնեին UFC-ից»,-Yahoo Sport-ին տված հարցազրույցում նշել է Ծառուկյանը։
Հավելենք, որ Արմանը վերջին անգամ օկտագոն է դուրս եկել 2025 թվականի նոյեմբերին՝ UFC Fight Night 265 մրցաշարի շրջանակներում մենամարտելով Դեն Հուքերի դեմ։ Այդ մենամարտն ավարտվել է հայ մարտիկի հաղթանակով՝ երկրորդ ռաունդում կիրառված խեղդող հնարքով։ Ներկայումս Ծառուկյանի ակտիվում կա 23 հաղթանակ և 3 պարտություն։
