«Բարսելոնայի» գերմանացի մասնագետ Հանսի Ֆլիկը խոսել է Չեմպիոնների լիգայի խաղարկության նախավերջին տուրում՝ Պրահայում «Բարսելոնայի» տարած հաղթանակից հետո։
Ֆլիկը մամուլի ասուլիսի ժամանակ անդրադարձել է թիմի հաջողությանը, որը մոտեցնում է կատալոնացիներին լավագույն ութնյակին, սակայն նշել է նաև Պեդրիի վնասվածքի հետ կապված տհաճ լուրը։
— Ինչպե՞ս կգնահատեք խաղը։
— Ստանդարտ դիրքերից երկու գոլ բաց թողնելուց հետո մենք կարողացանք բեկել հանդիպման ընթացքը, ինչը լավ է։ Այսօր հեշտ չէր խաղալը, շատ ցուրտ էր, իսկ «Սլավիան» հիանալի էր գործում անցումների ժամանակ՝ կատարելով վտանգավոր փոխանցումներ։ Նրանք ֆիզիկապես շատ ուժեղ թիմ են։ Երկրորդ խաղակեսում մենք զգալիորեն բարելավեցինք մեր խաղը։
— Ի՞նչ ասացիք ֆուտբոլիստներին ընդմիջմանը։ Արդյոք եղանակը ազդե՞ց։
— Ինչպես արդեն ասացի, մենք սպասում էինք բարդ հանդիպման․ նրանք հինգ շաբաթ ունեին պատրաստվելու համար։ «Սլավիան» ֆիզիկապես ուժեղ, դինամիկ թիմ է՝ հզոր ֆուտբոլիստներով։ Դա երևաց ստանդարտ դիրքերի ժամանակ, և դժվար էր պաշտպանվել։ Մենք արժանի էինք երեք միավորի։
— Հայտնի՞ է, թե ինչ է պատահել Պեդրիին։
— Չգիտեմ, թե կոնկրետ ինչ վնասվածք է և որքան ժամանակ նա բաց կթողնի։ Սա լավ լուր չէ։ Վաղը պարզ կլինի։ Նրան փոխարինած Օլմոն գոլ խփեց։ Փոփոխությունը հաջողված էր, իսկ չորրորդ գոլը ճիշտ պահին եղավ, ինչը շատ կարևոր էր։
— Լավ է, որ Ֆերմինը չհեռացավ, այնպես չէ՞։
— Նա ֆանտաստիկ խաղացող է։ Որոշումը նրանն էր, և ես երջանիկ եմ, որ նա մնաց։ Նա այն ֆուտբոլիստն է, ով շնչում է «Բարսելոնայով» և կրում է ակումբի ԴՆԹ-ն։ Շատ եմ գնահատում նրա այսօրվա խաղը։
— Հնարավո՞ր է հաղթել Չեմպիոնների լիգան նման սխալներով։
— Երկու անկյունային և երկու սխալ։ Սա ընդամենը մեկ խաղ էր, և մենք կարող ենք բարելավել մեր խաղը։ Մենք և՛ ցանկանում ենք, և՛ կարող ենք դա անել։
— Որքանո՞վ է կարևոր հաջորդ փուլ դուրս գալը՝ առանց փլեյ-օֆֆի լրացուցիչ խաղերի։
— «Կոպենհագենին» հաղթելը հեշտ չի լինի։ Չգիտենք՝ ինչ վիճակում կլինի Ֆեռանը, գուցե Պեդրին չխաղա։ Լամինը վերադառնում է, իսկ Դե Յոնգը բաց կթողնի։ Մենք լավ հնարավորություն ունենք լավագույն ութնյակում հայտնվելու համար։ Թեև մրցաշրջանն այդքան էլ լավ չէինք սկսել Չեմպիոնների լիգայում, բայց այժմ ունենք այդ հնարավորությունը։
— Ինչպե՞ս կգնահատեք Արաուխոյի խաղը։
— Պայքարների ժամանակ նա ցույց տվեց իր արագությունը։ Ուզում եմ գովել նրան, ուրախ եմ նրա ցուցադրած խաղի համար։ Նրա համար հեշտ չէր, բայց քայլ առ քայլ նա ավելի լավ է ինտեգրվում։
— Դե Յոնգն այսօր շատ լավ տեսք ուներ։
— Ֆրենկին այսօր լավ խաղաց։ Նրա մակարդակը շատ բարձր է՝ ոչ միայն պաշտպանությունում, այլև հարձակման գծում։
