Մադրիդի «Ռեալի» նախագահ Ֆլորենտինո Պերեսը ակումբի ասամբլեայի ժամանակ հանդես է եկել ծավալուն ելույթով՝ սուր քննադատության ենթարկելով «Բարսելոնային», Լա Լիգայի ղեկավարությանը և իսպանական մրցավարական համակարգը։
Ստորև ներկայացված են Պերեսի ելույթի հիմնական կետերը.
«Բարսելոնայի» դիրքորոշման փոփոխությունը CVC-ի հարցում
Պերեսը հեգնանքով է անդրադարձել այն փաստին, որ կատալոնական ակումբը փոխել է իր դիրքորոշումը Լա Լիգայի և CVC ներդրումային հիմնադրամի միջև կնքված գործարքի վերաբերյալ։
«Շատ ակումբներ հասկացան, որ 50 տարով եկամուտների մի մասից զրկվելը կխաթարի իրենց ապագան։ Մենք վստահ ենք, որ այդ համաձայնագիրը դատարանի կողմից չեղյալ կհայտարարվի։ Եվ «Ռեալը», և «Բարսելոնան», և «Ատլետիկը» դիմել էին դատարան։
Ներեցեք, բայց պետք է հիշեցնեմ, որ «Բարսելոնան» ևս դեմ էր, սակայն զարմանալի զուգադիպությամբ հետ վերցրեց հայցը հենց այն ժամանակ, երբ Լա Լիգան թույլատրեց նրանց գրանցել ֆուտբոլիստներին», — հայտարարել է Պերեսը։
2021 թվականին կնքված գործարքով CVC-ն մոտ 2 մլրդ եվրո վճարեց լիգային՝ փոխարենը ստանալով հեռուստատեսային իրավունքների 11%-ը 50 տարով։ 2024-ին դատարանը մերժել էր «Ռեալի» և «Ատլետիկի» հայցը՝ գործարքը ճանաչելով օրինական:
Մրցավարական անոմալիաներ և Նեգրեյրայի գործոնը
«Ռեալի» նախագահը համեմատել է Լա Լիգայում և Չեմպիոնների լիգայում տիրող իրավիճակը՝ ընդգծելով վիճակագրական տարօրինակությունները։
«Բոլորս կհամաձայնենք, որ հեռացումները ֆուտբոլում ամենասուբյեկտիվ բանն են։ Մինչև 2021 թվականը «Ռեալի» օգտին եղել է ընդամենը երկու հեռացում, մինչդեռ «Բարսելոնայի» օգտին՝ 61։
Նեգրեյրայի ժամանակաշրջանում «Բարսելոնայի» մաքուր հաշվեկշիռը կազմել է +49 (մրցակիցների հեռացումներ), իսկ «Ռեալինը»՝ մինուս 1։ Եզրակացություններն արեք ինքներդ»։
Պերեսը նաև անտրամաբանական է համարել, որ «Ռեալի» ֆուտբոլիստները Եվրոպայում ավելի հաջողակ են, քան ներքին առաջնությունում.
«Ինչպե՞ս եք կարծում, նորմա՞լ է, որ «Ռեալի» որոշ խաղացողներ ավելի շատ հաղթանակ ունեն եվրոգավաթներում, քան Իսպանիայի առաջնությունում։ Ոմանք ունեն Չեմպիոնների լիգայի 6 գավաթ, բայց ոչ ոք չունի Լա Լիգայի 5 տիտղոս։ Սա նորմա՞լ է։ Ոչ»։
«Բարսայի» հաջողությունները և վճարումները մրցավարական կորպուսին
Պերեսը ուղիղ կապ է տեսել «Բարսելոնայի» հաջողությունների և մրցավարական կոմիտեի նախկին փոխնախագահ Խոսե Մարիա Էնրիկես Նեգրեյրային կատարված վճարումների միջև։
«Իսպանական մրցավարության մակարդակն անընդունելի է։ Ամոթ է, որ ՖԻՖԱ-ն վերջին ակումբային աշխարհի առաջնությանը ոչ մի իսպանացի մրցավարի չէր ընտրել։
Եվ, իհարկե, աննորմալ է, որ «Բարսելոնան» մրցավարական կորպուսի փոխնախագահին վճարել է ավելի քան 8 միլիոն եվրո՝ առնվազն 17 տարվա ընթացքում։ Ինչ պատճառ էլ որ լինի։ Դա մրցավարության գծով փոխնախագահն էր, ով ուներ կարևոր պարտականություններ։ Այդ ժամանակաշրջանը «պատահաբար» համընկնում է Իսպանիայում «Բարսելոնայի» լավագույն արդյունքների հետ», — եզրափակել է Ֆլորենտինո Պերեսը։
