Ռիկարդո Իզեքսոն դոս Սանտոս Լեյտեն, նույն ինքը՝ Կական, այսօր նշում է ծննդյան 38-րդ տարեդարձը: Համաշխարհային ֆուտբոլի ամենավառ դեմքերից մեկի կյանքն ու ֆուտբոլային կարիերան հարուստ են հետաքրքիր իրադարձություններով:
Մանուկ Ռիկարդոն մեծացել է ինժեներ-շինարարի և ուսուցչի ընտանիքում: Ծնողները մանկուց նրան դաստիարակել են աստվածաշնչյան արժեքներով, սակայն 18 տարեկանում նրա հետ կատարված դեպքը ստիպեց Կակային, որ նա ավելի խորանա իր հավատքի մեջ:
Ֆուտբոլիստին Կակա անվանել է կրտսեր եղբայրը, քանի որ չէր կարողանում արտաբերել Ռիկարդո անունը: Ռիկարդո Իզեքսոն դոս Սանտոս Լեյտեն ֆուտբոլում առաջին քայլերը սկսել է 7 տարեկանից՝ մարզվելով Սան Պաուլոյի «Ալֆավիլի» թիմում: Ապագա աստղը 15 տարեկանում պայմանագիր կնքեց «Սան Պաուլոյի» հետ:
2000 թ․ Կական խաղում էր «Սան Պաուլոյի» երիտասարդական թիմում: Հենց այդտեղ էլ սկսվեց 18-ամյա տղայի կյանքի ամենաբարդ ժամանակահատվածը: Կակայի ընտանիքը մեկնել էր հանգստի: 18-ամյա ֆուտբոլիստն անհաջող ցատկ կատարեց լողավազանի մեջ, ինչի հետևանքով քիչ էր մնում ամբողջությամբ պարալիզացվեր՝ գլխին ստացած հարվածից:
Հիվանդանոցում բժիշկներն ասել են, որ հրաշք է տեղի ունեցել, քանի որ կարող էր ամեն ինչ ավելի վատ լինել: Մի քանի օր հիվանդանոցում մնալուց հետո ֆուտբոլիստին դուրս գրեցին:
Սակայն այսքանով ամեն ինչ չվերջացավ: Հետագա մարզումների ընթացքում ֆուտբոլիստի վնասվածքը զգացնել տվեց: Ցավը գնալով դառնում էր ավելի անտանելի: Արդեն դժվար էր դարձել նույնիսկ քայլելը:
Կակայի խոսքով՝ ինքը բուժվել է աղոթքների շնորհիվ․
«Ես գիտեմ, որ Հիսուսի համար ոչինչ չարժե փողն ու փառքը: Այս ամենը նա է ինձ տվել: Ես հասել եմ այնպիսի հաջողությունների, որ նույնիսկ չէի կարող երազել»:
Հենց այս դեպքից հետո էլ բրազիլացին ստացավ իր՝ «ոսկե տղա» անվանումը: Աշխարհում նրան սկսեցին ճանաչել որպես աստվածապաշտ ֆուտբոլիստ: Ամեն գոլ խփելուց հետո Կական ձեռքերը վեր էր պարզում՝ այսպիսով շնորհակալություն հայտնելով Աստծուն: Բացի այդ, բրազիլացին գոլ խփելուց հետո հաճախ էր ցուցադրում՝ «Ես պատկանում եմ Հիսուսին» գրությամբ շապիկը:
Վնասվածքից վերջնականապես վերականգնվելուց հետո բրազիլացի տաղանդը պետք է գրավեր ֆուտբոլային աշխարհը: Մինչև 2003 թ․ հանդես գալով «Սան Պաուլոյում»՝ Կական 8.5 միլիոն եվրոյով տեղափոխվեց իտալական «Միլան», որտեղ էլ սկսվեց ֆուտբոլիստի աստեղային ժամը: 2003-2009 թթ․ հանդես գալով իտալական թիմում՝ Կական դարձավ Իտալիայի չեմպիոն, սուպերգավաթակիր, Չեմպիոնների լիգայի հաղթող: Նվաճեց մի շարք անհատական մրցանակներ: 2007-ին դարձավ նաև «Ոսկե գնդակի» հաղթող:
«Միլանում» ֆանտասիկ տարիներ անցկացնելուց հետո բրազիլացին հայտնվեց Մադրիդի «Ռեալի» ուշադրության կենտրոնում: Երկար բանակցություններից հետո Կական 68,5 միլիոն եվրոյով տեղափոխվեց «Ռեալ»։ Մունդիալ-2010-ից հետո հայտնի դարձավ Կակայի բավականին լուրջ վնասվածքի մասին։ Նա վնասել էր ծնկի խաչաձև մկանները։ Վիրահատությունից մի քանի ամիս անց Ռիկին կրկին վերադարձավ խաղադաշտ և նորից սկսել խաղալ «Ռեալում», սակայն վնասվածքից հետո բրազիլացին այդպես էլ չկարողացավ վերգտնել իր խաղը։
Երկար ժամանակ լինելով պահեստայինների նստարանին՝ Կական 2013-ին վերադարձավ հարազատ «Միլան»։ Մեկ մրցաշրջան անցկացնելուց հետո 2014-ին տեղափոխվեց «Օռլանդո Սիթի» և սկսեց վարձավճարով հանդես գալ «Սան Պաուլո» ակումբում, որտեղ սկսել էր իր առաջին քայլերը։ 2017 թվականին 35-ամյա ֆուտբոլիստն ավարտեց կարիերան:
Երվանդ ՀԱԿՈԲՅԱՆ
