«Էսպանյոլի» պաշտպան Սերխի Գոմեսը, ով «Բարսելոնայի» երիտասարդական թիմում մի քանի տարի թիմակից է եղել «Գալաթասարայի» հարձակվող Մաուրո Իկարդիին, պատմել է անհավանական և մի փոքր խելահեղ պատմություն այն մասին, թե ինչպես է Իկարդին Լա Մասիա տեղափոխվելուց հետո սպանել աղավնի, խորովել և կերել։
«Ես մի պատմություն ունեմ, որն, իմ կարծիքով, ամենահետաքրքիրն է Իկարդիի մասին։ Լա Մասիայում երեք-չորս մրցաշրջան թիմակիցներ էինք։ Այդ ժամանակ ապրում էինք նույն բնակարանում՝ Մարկ Մունյեսայի, Սերխի Ռոբերտոյի և Իկարդիի հետ։
Երբ նա նոր էր եկել Լա Մասիա, մի օր ասաց. «Սերխի, արի գնանք հարևան այգի»։ Լա Մասիայի կողքին կար այգի՝ բարձր ծառերով։ Տեսա, որ նա բերել է Y-աձև փայտ, որը նախորդ օրը կտրել էր, և դրա վրա կապել էր ամուր ռետին։ Պարզվեց՝ նա խանութից գնել էր ռետին և այլ պարագաներ՝ ձեռքով պարսատիկ պատրաստելու համար։ Ասաց. «Տեսնու՞մ ես այնտեղ, վերևում»։ Տեսա 20-25 մետր բարձրությամբ ծառ։ Ասացի. «Այո, տեսնում եմ սոճի»։ Նա պատասխանեց. «Ոչ, ոչ, ավելի բարձր նայիր»։ Վերևում աղավնի կար, բայց, անկեղծ ասած, այն գրեթե չէր երևում։
Նա վերցրեց քար, ձգեց պարսատիկը և… աղավնին ընկավ 20-30 մետր բարձրությունից։ Վերադարձանք Լա Մասիա։ Իկարդին մաքրեց աղավնու փետուրները, հանեց քարը, որը խրվել էր նրա վզին, մետաղյա կախիչը շտկեց, դրա վրա ամրացրեց աղավնին, կրակ վառեց, խորովեց և կերավ՝ հենց իմ աչքի առաջ։ Ես մտածում էի. «Իսկ ես հիմա ի՞նչ եմ անելու»։ Նա բռնեց աղավնին, պատրաստեց և կերավ», — պատմել է Գոմեսը sport.es-ի հետ զրույցում։
