Ֆուտբոլի ամենատիտղոսակիր պաշտպաններից մեկը՝ Սերխիո Ռամոսը, լիովին մոտիվացված է «Մոնտերեյի» կազմում մասնակցելու 2025 թվականի Աշխարհի ակումբային առաջնությանը։ Իսպանացի աստղը միացել է մեքսիկական թիմին 2025 թվականի փետրվարին։
«Աշխարհի ակումբային առաջնությունը մեծ հնարավորություն է՝ կարիերաս հաղթանակով ավարտելու համար։ Մեր թիմը մեծ ոգևորությամբ է պատրաստվում և ձգտում է ապացուցել, որ կարող է արժանի մրցակցություն ցուցաբերել աշխարհի լավագույն ակումբների հետ», – նշել է Ռամոսը ՖԻՖԱ-ի պաշտոնական կայքին տված հարցազրույցում։
«Մոնտերեյը» խմբային փուլում կմրցի «Ինտերի», «Ռիվեր Փլեյթի» և «Ուրավա Ռեդ Դայմոնդսի» հետ։ Բոլոր երեք խաղերը կկայանան Կալիֆորնիայի «Ռոուզ Բոուլ» մարզադաշտում։
Ռամոսը կրում է 93 համարը՝ ի հիշատակ 2014 թվականի Չեմպիոնների լիգայի եզրափակչում «Ատլետիկոյի» դարպասին խփած իր լեգենդար գոլի։ Նորամուտից հետո նա արագ դարձել է թիմի առաջնորդ՝ ինչպես խաղադաշտում, այնպես էլ դրանից դուրս։
«Ես միշտ հավատում եմ ներկայով ապրելու կարևորությանը։ Առաջին նպատակը խմբից դուրս գալն է։ Հետո ամեն ինչ հնարավոր է։ Մեր մոտեցումը պարզ է՝ աշխատել ամբողջ ներուժով և ուժերը չխնայել», – ասել է Ռամոսը։
Նա նաև ընդգծել է մեքսիկացի երկրպագուների հզոր աջակցությունը․ «Նրանց նվիրվածությունն ու կիրքն ինձ զարմացրին։ Սա երկիր է, որտեղ ֆուտբոլը կյանքի անբաժան մասն է»։
