Ֆուտբոլային սկաուտ․ Երիտասարդ աղվեսների ոդիսականը շարունակվում է

Վերջերս, ըստ մեր շարքի ավանդույթների, մենք անդրադառնում էինք ամեն լիգայից երկուական թիմերի։ Սակայն, այսօր բացառություն կանենք, քանի որ մեր դիտակետում անգլիական «Լեսթերն» է՝ բավականին ուժեղ թիմ, որը համալրված է հիմնականում տաղանդավոր երիտասարդ ֆուտբոլիստներով։ Հեռանկարային ֆուտբոլիստները շատ են «աղվեսների» թիմում, և մենք առանձնացրել ենք նրանցից ամենահեռանկարայիններին․․․

Բեն Չիլուել

🏴󠁧󠁢󠁥󠁮󠁧󠁿Անգլիա
«Լեսթեր»
23 տարեկան

Չիլուելը «Լեսթերի» ակադեմիայի սան է։ 2014-15 մրցաշրջանում նա ճանաչվել է ակադեմիայի լավագույն ֆուտբոլիստ, իսկ հետո․․․ Հետո նրան ուղարկում են գործուղման «Հադերսֆիլդ», որը, մեղմ ասած, այդքան էլ հաջող չպսակվեց մեր հերոսի համար (ընդամենը 8 անցկացրած հանդիպում)։ Մեկ տարի անց նա վերադարձավ «Լեսթեր», և մոտ երկու մրցաշրջան մնաց Քրիստիան Ֆուխսի ստվերում։ Վերջինս տարիների ընթացքում ավելի երիտասարդ չէր դառնում, և 2017/18 մրցաշրջանից սկսած պաշտպանության ձախ եզրը սկսեցին վստահել Բենին և մարզիչները չսխալվեցին։ Ներկայումս «աղվեսների» պաշտպանությունը ընդհանուր առմամբ լավագույններից է ԱՊԼ-ում, իսկ մեր հերոսն իր դիրքում՝ լավագույններից մեկն աշխարհում։

Հարվի Բարնս

🏴󠁧󠁢󠁥󠁮󠁧󠁿Անգլիա
«Լեսթեր»
22 տարեկան

Բարնսը, ինչպես և մեր նախորդ հերոսը, ևս «Լեսթերի» ակադեմիայի սան է․ համաձայնվե՛ք՝ ի՜նչ հրաշալի կադրեր է տալիս վերջին տարիներին «աղվեսների» ակադեմիան։ Հարվին, ինչպես Բենը, ևս մի քանի անգամ վարձավճարով հանդես է եկել տարբեր ակումբների կազմում և 2018/19 մրցաշրջանում նա պարզապես փայլեց «Վեսթ Բրոմվիչում»։ Վերադառնալով հարազատ ակումբ, նախորդ մրցաշրջանը կիսապաշտպանը հիմնականում անցկացրեց պահեստայինների նստարանին, իսկ այս մրցաշրջանում․․․ եթե կարճ՝ նա պարզապես փայլում է, դառնալով ԱՊԼ-ի այս մրցաշրջանի գլխավոր հայտնություններից մեկը։

Յուրի Տելեմանս

🇧🇪 Բելգիա
«Լեսթեր»
22 տարեկան

«Անդերլեխտի» սանը 2018/19 մրցաշրջանում բավականին լավ հանդես եկավ «Մոնակոյի» կազում, սակայն, կարծես թե մոնեգասկների ղեկավարությունը այդքան էլ հույս չէր դնում երիտասարդ կիսապաշտպանի վրա և նրան վարձավճարով ուղարկեցին մառախլապատ Ալբիոն։ «Լեսթերի» կազմում բելգիացին արագ գտավ իր խաղը, դարձավ թիմի առանցքային ֆուտբոլիստներից մեկը, և «աղվեսները» առանց վարանելու գնեցին նրա ամբողջական տրանսֆերը։ Յուրին այժմ հանդիսանում է թիմի հարձակվողական և կիսապաշտպանական օղակները կապող առանցքային ֆուտբոլիստ և նրա ներդրումը բավականին մեծ է թիմի ներկայիս հաջողություններում։

Վիլֆրեդ Նդիդի

🇳🇬 Նիգերիա
«Լեսթեր»
23 տարեկան

Նդիդին իր պրոֆեսիոնալ կարիերան սկսել է բելգիական «Գենկ» ակումբի կազմում, իսկ 2017 թվականի սկզբին միացել է «աղվեսներին»։ Երբ Կանտեն հեռացավ թիմից, շատերը կարծում էին, որ «Լեսթերը» առաջիկա տարիներին հազիվ թե գտնի նրան համարժեք փոխարինող, և կիսապաշտպանության կենտրոնը կլինի թիմի թույլ օղակներից մեկը։ Սակայն երկրպագուների մտավախությունները հօդս ցնդեցին, երբ հասկացան, թե ինչ «գանձ» է ընկել թիմի մարզիչների ձեռքը։ Նիգերիացին երկու-երեք տարվա ընթացքում չհղկված ալմաստից դարձավ ադամանդ․ ներկայումս 23-ամյա հենակետային կիսապաշտպանը հանդիսանում է լավագույններից մեկը աշխարհում իր դիրքում։ Գրագետ, ֆիզիկապես հիանալի պատրաստված, խաղադաշտը տեսնելու հրաշալի ունակությամբ․․․ հավատացե՛ք, շուտով Վիլֆրեդը դառնալու է համաշխարհային ֆուտբոլի ամենավառ փայլող աստղերից մեկը․․․

Ջեյմս Մեդիսոն

🏴󠁧󠁢󠁥󠁮󠁧󠁿Անգլիա
«Լեսթեր»
23 տարեկան

Իսկ ահա ո՞ւմ կարելի է Վարդիից հետո համարել «Լեսթերի» գլխավոր աստղ․․․ Իհարկե՝ Ջեյմս Մեդիսոնին։ Երկու տարի առաջ «Նորվիչի» կազմում նա դարձավ 14 գոլի հեղինակ՝ ճանաչվելով Չեմպիոնշիփի լավագույն ֆուտբոլիստներից մեկը։ Եվ այդ ամենը չվրիպեց իհարկե «աղվեսների» սկաուտների աչքից․․․ ի դեպ, նկատենք, թե որքան է համապատասխանում թիմի մականունը նրանց սկաուտական բաժնին, ասես իսկապես նրանց սկաուտները ունեն աղվեսներին հատուկ հոտառություն, այս դեպքում՝ ֆուտբոլային հոտառություն։ Լավ, շատ չշեղվենք․․․ Եվ ահա, «աղվեսների» չամբարում հայտնվել է նոր արքայզն, ում շուրջ առաջիկա տարիներին մարզիչները կփորձեն ձևավորել թիմը, և շատերի կարծիքով, հենց նա է Վարդիից հետո լինելու թիմի նոր առաջատարը։

Ամեն դեպքում, անգլիական գրանդները բազմիցս կփորձեն ձեռք բերել Մեդիսոնին և մյուս տղաներին ՝ առաջարկելով նրանց համար բավականին մեծ գումարներ։ Սակայն կա նաև մեդալի հակառակը կողմը․ եթե «Լեսթերը» կարողանա պահպանել այս կորիզը, և նրանց գումարենք ևս մի քանի տաղանդավոր ֆուտբոլիստների, ապա «աղվեսները» երկար տարիներ կկարողանան իրենց դիրքերը պահպանել անգլիական էլիտայում և դա, ինքնին, կլինի ևս շատ մեծ հաջողություն․․․ Ինչո՞ւ և ոչ, մեկ անգամ նրանք կարողացան նվիրել մեզ ֆուտբոլային հեքիաթ՝ 2015/16 մրցաշրջանում դառնալով ԱՊԼ-ի չեմպիոն, միգուցե, ականատե՞ս կլինենք ևս մեկ հրաշքի․․․

Վար Բաբայան

Շարքի նախորդ մասերը

Ֆուտբոլային սկաուտ․ Ռեալ Սոսեյդադ, Սևիլյա

Ֆուտբոլային սկաուտ․ Ատալանտա, Լացիո

Ֆուտբոլային սկաուտ․ Վուլվերհեմփթոն, Էվերտոն

Ֆուտբոլային սկաուտ․ Վերդեր, Այնտրախտ

Էրեդիվիզիի ամենահեռանկարային ֆուտբոլիստները (Մաս 3)

Էրեդիվիզիի ամենահեռանկարային ֆուտբոլիստները (Մաս 2)

Էրեդիվիզիի ամենահեռանկարային ֆուտբոլիստները (Մաս 1)

Պորտուգալիան՝ ցատկահարթակ դեպի մեծ ֆուտբոլ

Բելգիան շարունակում է մնալ ապագա աստղերի դարբնոց (Մաս 2)

Բելգիան շարունակում է մնալ ապագա աստղերի դարբնոց (Մաս 1)