Միջազգային թենիսն օրեցօր մեծ քայլերով շարժվում է առաջ: Թենիսին էլ, արդեն, կարելի է տալ միլիոնների խաղ անվանումը:
US OPEN, WIMBLEDON, ROLAND GARROS, AUSTRALIAN OPEN, DAVIS CUP․ Մրցաշարերի անցկացման օրերին մրցավայրում են մեկտեղվում միլիոնավոր երկրպագուներ աշխարհի տարբեր անկյուններից: Վերջին 15-16 տարում թենիսի աշխարհում 2 ուժեղագույններ անընդհատ պայքարի մեջ են. Ռաֆայել Նադալ և Ռոջեր ֆեդերեր:
Չնայած նրան, որ երկու լեգենդներն էլ հասնում են իրենց կարիերայի մայրամուտին, այնուամենայնիվ շարունակում են ակնահաճո և անկասելի խաղ ցուցադրել: Շատերն են այս ընթացքում աչքի ընկել կարճ ժամանակահատվածով. Կիրխիոս, Գոֆեն, Զվերև, Մարեյ, Ցոնգա, Վավրինկա: Նրանց մասնագետները տվել են հետևյալ գնահատականը. «Նրանք եկան զավթելու Նադալի և Ֆեդերերի գահը»: Բայց նրանցից ոչ ոք չկարողացավ դիմանալ մրցակցությանը՝ տարբեր պատճառներով:
Հայաստանը նույնպես աստղային թենիսիստներ է տվել: Ցավոք, նրանց Հայաստանի հետ կապել է միայն արյունակցական կապը: Մեծ սաղավարտի մրցաշարերի 7-ակի հաղթող Անդրե Աղասի, Դավիթ Նալբանդյան, այժմ Ռուսաստանի դրոշը ներկայացնող Կարեն Խաչանով, Ռուսաստանի դրոշի տակ հանդես եկող Մարգարիտա Գասպարյան. նրանք բոլորն էլ հայազգի են, բայց ինչ-ինչ պատճառներով նրանք չեն ցանկացել ու չեն ցանկանա հանդես գալ Հայաստանի դրոշի ներքո: Մեր երկրում նույնպես շատ են թենիսով հետաքրքրվողները: Սակայն մեծ գումարներ պահանջող մարզաձևը ֆինանսական լուրջ աջակցության կարիք ունի, եթե, իհարկե, մենք ցանկանում ենք մի օր ունենալ Հայաստանի դրոշի տակ հանդես եկող Կարեն Խաչանովներ ու Մարգարիտա Գասպարյաններ:
Armsport.am-ը թենիսի տղամարդկանց ազգային հավաքականի գլխավոր մարզիչ Վահե Ավետիսյանի հետ զրույցում փորձեց հասկանալ հայկական թենիսում տիրող իրավիճակը:
-Պարոն Ավետիսյան, սկսենք երևի թե ամենակարևորից, հայկական թենիսը ի՞նչ աջակցություն է ստանում:
-Կառավարությունն ամեն տարի տրամադրում է 5 մլն դրամ աջակցություն, որով կազմակերպվում է Հայաստանի առաջնությունը, միջազգային մի շարք մրցաշարեր: Իսկ տղամարդկանց թիմային աշխարհի առաջնությունը՝ Դեյվիսի գավաթը և կանանց թիմային աշխարհի առաջնությունը՝ Ֆեդերացիայի գավաթը կազմակերպվում ու ֆինանսավորվում է Ֆեդերացիայի նախագահ Հարություն Փամբուկյանի կողմից:
-Խոսեցիք միջազգային մրցաշարերի մասին, խնդրում ենք, մի փոքր մանրամասնել, թե ի՞նչ մրցաշարերի մասին է խոսքը, և ի՞նչ է դա տալիս մասնակիցներին:
-2019թ-ին 10 միջազգային վարկանիշային մրցաշար է կազմակերպվել Հայաստանում, որոնց միջոցով մասնակիցները բարձրացնում են իրենց միջազգային վարկանիշը: Անցկացվել է երկու Մ-12, երեք Մ-14, երկու Մ-16 և երեք Մ-18 մրցաշարեր: Այս տարի կլինի նաև վետերանների 2 միջազգային մրցաշար: Կայացած մրցաշարերում հայ մասնակիցները լավ են հանդես եկել Մ-12, Մ-16 և Մ-18 տարեկանների պայքարում: Աղջիկների մեջ 2 չեմպիոն ենք ունեցել: Տղաների Մ-12 տարեկանների մրցաշարերից մեկում նույնպես ունեցել ենք չեմպիոն: Մեր մասնակիցների ելույթը գնահատում եմ բավարար:
-Ի՞նչ է անհրաժեշտ լավ հանդես գալու և բարձր արդյունքներ գրանցելու համար:
-Լավ հանդես գալու համար մեծ գումարներ են հարկավոր: Գումար հարկավոր է ոչ միայն մարզումների կամ հավաքների համար, այլ մրցաշարերին մասնակցելու համար: Հենց այդտեղ են ծախսվում մեծ գումարներ: Վարկանիշ բարձրացնելու համար անհրաժեշտ է շատ մրցումների մասնակցել, իսկ շատ մրցումների մասնակցելու համար, արդեն նշեցի, շատ գումար է անհրաժեշտ:
—Մեր դրոշի տակ հանդես եկող թենիսիստները Հայաստանու՞մ են մարզվում:
-Բոլորը, բացի Խաչատրյան Միքայելից, մարզվում են Հայաստանում: Միքայելը ԱՄՆ-ում է մարզվում և Հայաստանի հավաքականի կազմում մասնակցել է Davis Cup-ին:
-Կա՞ն արտերկրում հանդես եկող թենիսիստներ, որոնք կարող են ուժեղացնել մեր տարբեր տարիքային հավաքականները:
-Դրսում հանդես եկող լավ մարզիկներ կան, որոնց ես անընդհատ հետևում եմ: Բայց կա մի մեծ խնդիր. բանակի հարցը: Տալով քաղաքացիություն՝ Կառավարությունը տալիս է 3 տարի տարեկետում: Հետո արդյունք են պահանջում միջազգային ասպարեզում, իսկ այսպիսի պայմաններում լուրջ արդյունքներ գրանցել հնարավոր չէ: Տարիներ առաջ Էստոնիայից հայազգի թենիսիստ է հրավիրվել, տրվել է քաղաքացիություն, բայց հետագայում բանակի հետ կապված խնդիր է եղել, այդ պատճառով հայազգի մարզիկները չեն ցանկանում հանդես գալ Հայաստանի հավաքականի կազմում: Նույնիսկ Հայաստանի չեմպիոն դառնալը բավարար չէ: Միքայել Ավետիսյանը հռչակվեց Հայաստանի չեմպիոն ու մեկնեց ծառայության. արդարացի չէ: Իսկ 2 տարի չմարզվելուց հետո շատ դժվար է վերադառնալ նախկին մակարդակին, և շատերը թողնում են թենիսը: Կա Կառավարության հստակ որոշում, ըստ որի մարզիկը պետք է միջազգային ասպարեզում լինի 6-րդը: Շատ լավ կլինի, որ Հայաստանի չեմպիոնին տանեն սպորտային վաշտ ու տան հնարավորություն նրան մարզվելու՝ մարզավիճակը կիսով չափ պահպանելու համար:
-Ի՞նչ մարզավիճակում է հիմա Անի Ամիրաղյանը:
-Անի Ամիրաղյանը մինչ ամուսնանալը լավ մարզավիճակում է եղել է և միջազգային դասակարգման աղյուսակում եղել է նույնիսկ 410-րդը: Ամուսնանալուց հետո վերսկսել է մարզումները և մասնակցել է մի քանի մրցաշարի: Անին ամուսնու հետ ապրում է Ռուսաստանում, բայց ժամանակ առ ժամանակ լինում է նաև Հայաստանում: Այս պահին մարզվում է Երևանում: Անին շարունակում է մնալ մեր առաջին համարը:
-Մոսկվայից՝ Կրեմլի գավաթից նոր եք վերադարձել : Ի՞նչ նպատակով էիք այնտեղ:
— Կրեմլի գավաթին ժյուրիի կարգավիճակում էի գնացել: Հրավերը ստացել էի Ռուսաստանի թենիսի ֆեդերացիայի նախագահ Սամվել Կարպիշևի կողմից: Վերջինիս հետ շատ լավ հարաբերություններ ունենք: Նայեցի Խաչանովի խաղը, որը ցավոք չհասավ եզրափակիչ: Մրցաշարում հաղթեց Ռուբլյովը: Ի դեպ, 2-ն էլ ժամանակին մասնակցել են Երևանյան միջազգային մի քանի մրցաշարի:
-Կ՞ան ապագայի հետ կապված ծրագրեր:
Ծրագրեր կան, և գումար է անհրաժեշտ, բայց այնպես էլ չէ, որ գումարը կա ու Կառավարությունը չի տալիս: Ամեն ինչ իր ժամանակին կլինի: Համագործակցում ենք Սպորտի նախարարության, Օլիմպիական կոմիտեի հետ: Այս տարի մարզչական վերապատրաստման դասընթացներ են կազմակերպվել: Կա նաև ծրագիր, որի նպատակը որոշ դպրոցներում թենիսը ֆիզկուլտուրայի բաղկացուցիչ մաս դարձնելն է:
