Հայաստանի հավաքականի գլխավոր մարզիչ Ալեքսանդր Պետրակովը վերջերս հրապարակել էր ազգային թիմ հրավիրված ֆուտբոլիստների ցանկը, որտեղ փաստացի նոր անուն, գրեթե, չկար։ Միակ նորեկը Սերգեյ Մուրադյանն է՝ «Նոայի» ձախ պաշտպանը, որին խաղալու ժամանակ առաջիկա երկու խաղում ուկրաինացի մասնագետը միանշանակ կտրամադրի։ Կոսովոյի ընտրանին հանելուկային թիմ է, որը ցանկացած պահի կարող է փոխել մարտավարությունը և խաղային սխեման՝ 4 պաշտպանից անցնելով 5 պաշտպանի։
Ալեքսանդր Պետրակովի հրապարակած վերջնական ցանկը թույլ է տալիս ակնկալել, որ կոնսերվատիվ սկզբունքների կողմնակից մասնագետը լուրջ փորձարկումներ չի անի ու խաղադաշտ դուրս կբերի հիմնականում նրանց, որոնց մենք սովոր ենք տեսնել առաջին րոպեներից։
Պաշտպանություն
Դարպասապահի դիրքը, երևի թե, միակն է, որտեղ կա հստակություն․ Օգնյեն Չանչարևիչը եղել է, կա ու դեռ կլինի ազգային թիմի «առաջին» համարը։ Պաշտպանության գծում կարելի է ակնկալել 3 ներկայացուցչի՝ կենտրոնը «բետոնելու» համար։ Վարազդատ Հարոյանը նոր-նոր է սկսել իր ելույթները Չինաստանի առաջնությունում և խաղին պատրաստ է ու դուրս է գալու հիմնական կազմում՝ իհարկե, ավագի թևկապով։ Թեպետ Գեորգի Հարությունյանը խաղային պրակտիկայի հետ խնդիրներ ուներ «Կրասնոդարում», սակայն նրա խաղային որակներն այնքան լավն են, որ Պետրակովը նրան պետք է որ առաջին րոպեներից նետի խաղադաշտ։ Անդրե Չալըշըրը ևս լավ մարզավիճակ է հավաքել։ Վերջին շրջանում «Բրոմապոյկարնայում» մեր ֆուտբոլիստը փակել է հենակետային գոտին։ Չի բացառվում, որ Պետրակովը գնա հետաքրքիր քայլի ու Չալըշըրին օգտագործի որպես «կեղծ հենակետային», ինչպես անում է Գվարդիոլան Սթոունզի պարագայում, որը «Սիթիի» կազմում հաճախ բարձրանում է վերև ու կանգնում Ռոդրիի կողքին՝ հենակետայինի դիրքում։
Եզրային պաշտպանների պարագայում Պետրակովն ունի ընտրություն. Նաիր Թիկնիզյանի բացակայությամբ ձախ թևում հիմնական կազմում խաղալու գլխավոր հավակնորդը Ժիրայր Մարգարյանն է։ «Ուրարտուի» ավագն ունի 5 պաշտպանով խաղի փորձ, երբ Դմիտրի Գունկոն Ժիրայրին հանձնարարում էր փակել եզրն ամբողջությամբ։ Այդ նույն դիրքում կարող է խաղալ նաև Սերգեյ Մուրադյանը։ Աջ թևում ևս կա երկու թեկնածու՝ Դավիդ Դավիդյանն ու Կամո Հովհաննիսյանը։ Դավիդյանը առաջնության գարնանային հատվածում իրեն այդքան էլ լավ չի դրսևորում, իսկ փորձառու Կամո Հովհաննիսյանը «Արարատ-Արմենիայի» վերջին խաղերում փակել է աջ կիսապաշտպանի դիրքը։ Այս հանգամանքը որոշիչ պետք է լինի՝ նրան Կոսովոյի հետ խաղի մեկնարկային կազմում ընդգրկելու համար։
Կիսապաշտպանություն
5 պաշտպանով սխեմայի պարագայում Ալեքսանդր Պետրակովը պետք է կենտրոնում դիտարկի երկու ֆուտբոլիստի։ Դաշյանի և Իվուի վնասվածքների պատճառով ուկրաինացի մասնագետը ստիպված է լինելու օգտագործել Սպերցյան-Հարությունյան ավելի հարձակողական զույգը։ Նրանցից ոչ մեկը հենակետային չէ, «6» համարի դիրքի ֆուտբոլիստ չէ ու պաշտպանվելիս չունեն այն որակները, որոնցով օժտված է Իվուն։ Սակայն, եթե ենթադրենք, որ նրանց կարող է փոխօգնության հասնել նաև Չալըշըրը, այս տարբերակը շատ լավ կարող է աշխատել։
Էդուարդ Սպերցյանն, ինչպես միշտ, «Կրասնոդարի» հիմնական կազմի ֆուտբոլիստ է, ընդգծված առաջատարներից մեկը, իսկ Հովհաննես Հարությունյանը «Փյունիկ» վերադառնալուց հետո ցույց է տալիս կայուն ու գրավիչ ֆուտբոլ։ Ժամանակն է, որպեսզի Հարությունյանը նույն ֆուտբոլը ցուցադրի նաև ազգային թիմի շապիկով։ Եթե հաշվի առնենք, որ առաջիկա հանդիպումն ընկերական բնույթ է կրում և կարելի է խաղալ մի փոքր անկաշկանդ, գուցե, Հովհաննեսը ցույց տա իր ունակությունները լիարժեք կերպով։
Հարձակում
Ընդունված է համարել, որ մեր ընտրանին ամենաքիչ խնդիրներն ունի հարձակման գծում, սակայն իրականում դա այդպես չէ։ Քանակը դեռ որակ չի ապահովում, հետևաբար, առջևի գծի խաղացողների մեծաքանակ լինելը առավելություն չի տալիս Պետրակովին։ Թերևս միայն Լուկաս Սելարայանն է, որի ներկայությունը մեկնարկային կազմում որևէ քննարկման ենթակա չէ։ Լուկասը հավաքականի վերջին ընտրական ցիկլում ամենակայուն ֆուտբոլ ցուցադրած ֆուտբոլիստներից է ու պետք է դուրս գա առաջին րոպեներից։
Ամենայն հավանականությամբ, ուկրաինացի մասնագետը խաղադաշտ դուրս կբերի Հրանտ-Լեոն Ռանոսին։ «Բորուսիայի» հարձակվողն իր թիմում խաղաժամանակ գրեթե չի ստանում, սակայն քանիցս ցույց է տվել, որ հավաքականի մարզաշապիկով ունակ է լուրջ խնդիրներ լուծելու։ Նա կլինի հարձակման կրակագծում։ Հարձակման մյուս կիսաեզրում պետք է տեսնենք Վահան Բիչախչյանին, որը «Պոգոնի» կազմում շարունակում է փայլել կայուն խաղով, գոլերով ու գրագետ գործողություններով։
Պահեստայիններ
Ակնկալվում է, որ խաղն ուժեղացնելու կամ փոխելու ակնկալիքով Պետրակովը դաշտ դուրս կբերի ֆուտբոլիստների, որոնք քիչ խաղաժամանակ են ստանում իր օրոք։ Պետք է որ երկրորդ կեսում տեսնենք «Ֆարուլ Կոնստանցայի» հարձակվող Նարեկ Գրիգորյանին, որը վաստակել է ազգային թիմի շապիկով խաղալու իր իրավունքը։ Բալեկյանն ու Արթուր Սերոբյանը նույնպես փոխարինման դուրս գալու թեկնածու են։ Պաշտպանությունում եթե լինեն փոփոխություններ, ապա միայն անհրաժեշտության դեպքում կամ երբ հաշիվը դա թույլ տա, ու մենք կտեսնենք դաշտում Էրիկ Փիլոյանին ու Ստյոպա Մկրտչյանին, իսկ Սերգեյ Մուրադյանը կփոխարինի Ժիրայր Մարգարյանին։
Ռոբերտ Գասպարյան
