Մայիսի 2-ին Օռլանդո քաղաքին մոտ գտնվող Վինթեր-Գարդեն փոքրիկ թաղամասում (որն ըստ վարչական բաժանման ևս համարվում է քաղաք) անսովոր իրարանցում էր. մի քանի տների բնակիչներ սրտատրոփ սպասում էին ոստիկանության ու շտապ օգնության աշխատակիցների ժամանելուն: Մարդիկ արդեն քանի օր է՝ չէին տեսել իրենց հարևանուհուն, իսկ այդ հարևանուհին այնպիսին էր, որ 2 օրից ավելին չտեսնելն արդեն կասկած ու վտանգ էր հարուցում. նա շատ ակտիվ էր, աղմկոտ, կենսուրախ ու միևնույն ժամանակ․․․ վտանգավոր:
***
Ֆլորիդա նահանգում տեղակայված Օրինջի շրջանն իր բնակչությամբ քիչ է գերազանցում մեր սիրելի Երևանը: Բնականաբար, այնտեղ տեղի ունեցող արտառոց դեպքերն անմիջապես դառնում են բոլորի խոսակցության գլխավոր թեման: Սակայն ամեն օր չէ, որ գտնում են երիտասարդ աղջկա դի: Ոստիկանության աշխատակիցները անարգել մտել են տուն ու այնտեղ հայտնաբերել Ֆրենտորիշ Բոուիի անշնչացած մարմինը: Իսկ մի քանի ժամ անց հարազատներն ու ընկերները հաստատեցին. դատարկ տանը հայտնաբերել են Օլիմպիական չեմպիոն Տորի Բոուիի դին:
Օրինջի շրջանի ոստիկանական բաժանմունքի ղեկավարը կարճ հայտարարություն է արել, ըստ որի, երիտասարդ մարզուհու մահը կասկածելի չէ և «չի էլ կարող լինել»: Այս պահին նոր մանրամասներ չկան, քանի որ դատաբժշկական փորձաքննությունների արդյունքները դեռ պատրաստ չեն: Սակայն հարց է առաջանում. ինչպե՞ս կարելի է վստահորեն ասել, որ 32 տարեկան երիտասարդ աղջկա մահը կասկածելի չէ՝ առանց որևէ փորձաքննության պատասխանի: Ավելին. կասկածելի է, որ ոստիկանը կասկածելի չի համարում այդ տարիքում մարզուհու՝ կյանքից հեռանալը:
Բոուին ամերիկյան աթլետիկայի առաջատարներից մեկն էր
Բոլորովին վերջերս Բոուին համարվում էր կանանց արագավազքի առաջատար դեմքերից մեկը: 2016 թվականին Ռիոյի Օլիմպիկական խաղերում նա հավաքել էր մեդալների ամբողջական հավաքածու՝ 4*100 փոխանցավազքում՝ ոսկե, 100 մետր արագավազքում՝ արծաթե, 200 մետր արագավազքում՝ բրոնզե: Ընդ որում, Բոուին Օլիմպիական ոսկին նվաճել է այն մրցաձևում, որի որակավորումն անցկացվեց 2 անգամ. մրցման ժամանակ ամերիկուհիները կորցրել էին փոխանցափայտը և գրավել էին վերջին տեղը: Եղավ բողոքարկում, և կոմիտեն հաստատեց՝ փոխանցավազքի ժամանակ եղել էր հպում մրցակցին, ինչն էլ ապացուցեց ամերիկուհիների անմեղությունը: Նրանք անցան եզրափակիչ, իսկ Բոուին, վերջինը դուրս գալով մրցապայքարի, պահպանեց թիմակիցների առավելությունն ու դարձավ Օլիմպիական չեմպիոն:
Հաջորդ տարի՝ 2017-ին, Բոուին բարելավեց իր ցուցանիշները՝ գրանցելով ոսկե դուբլ Լոնդոնում կայացած աշխարհի առաջնությունում: Նա անգերազանցելի էր նույն փոխանցավազքում և 100 մետր արագավազքում: Դրան զուգահեռ Բոուին մտել էր մոդելային բիզնես՝ հայտնվելով ESPN ամսագրի Body Issue թողարկման շապիկին: Բոուին նաև Valentino նորաձևության տան գովազդային արշավի դեմքերից մեկն էր:
Վերջին անգամ մեծ մրցաշարերին Բոուին մասնակցել է 2019 թվականին Դոհայում: Աշխարհի առաջնության ժամանակ, սակայն, ամերիկուհին չմասնակցեց արագավազքի մրցումների կիսաեզրափակիչին: Փոխարենը, Բոուին շեշտը դրել էր թռիչք երկարության վրա, և քիչ էր մնում կանգներ պատվո հարթակին. մեդալ նվաճելու համար չբավականացրեց ընդամենը 10 սմ:
Սպորտից հեռանալն ու ֆինանսական սկանդալները
Այն ժամանակ դեռևս անհայտ պատճառներով Բոուին որոշեց հեռանալ մեծ սպորտից ու նույնիսկ չփորձեց մասնակցել Տոկիո-2020-ի որակավորման մրցումներին: Իրականում նրա խնդիրները սկսվել էին դրանից տևական ժամանակ առաջ: Դեռևս 2019 թվականի հունվարին Բոուին ժամանել է Կալիֆորնիայում գտնվող մարզաբազաներից մեկը՝ մրցաշրջանին պատրաստվելու համար, սակայն աշխատակիցները հրաժարվել են նրան ներս թողնել: Պատճառաբանությունն առավել քան պարզ էր. Բոուին կկարողանա մասնակցել մարզումներին միայն 6000 դոլարի պարտավորությունը մարելուց հետո:
«Մենք ընդհանրապես գումարի մասին չէինք խոսել, երբ ես այստեղ էի տեղափոխվում: Ես չեմ կարողանում մարզվել Օլիմպիական կենտրոնում, քանի որ չեմ վճարել 6000 դոլար, որի մասին ես նույնիսկ գաղափար չեմ ունեցել», — հայտարարել էր Բոուին: Ամերիկուհին տեղափոխվել էր Օլիմպիական կենտրոն դեռևս 2018 թվականի ամռանը, սակայն մարզիչը ժամանակի ընթացքում փոխել էր մարզուհու ծրագիրը, ինչը նշանակում էր, որ նա այնտեղ 1 տարի մարզվելու հնարավորություն պետք է ունենար: Բնականաբար, մարզումային պրոցեսը ձախողվեց, իսկ կիսապատրաստ վիճակում գրանցած արդյունքները նրան հոգեբանորեն կոտրեցին:
Գուցե ամերիկուհին տեղին էր բողոքում իր վրա դրված 6000 դոլար պարտավորության վերաբերյալ, սակայն հետագա բացահայտումները պարզեցին, որ այդ մեղադրանքներն ամենևին էլ անհիմն չէին. այդ պրոցեսին զուգահեռ, Բոուիին սեփական առանձնատան առգրավում էր սպառնում, որն արժեր 500 հազար դոլար: Ըստ դատական փաստաթղթերի, մարզուհին պարտք էր մնացել սեփականատերերի արհմիությանն ավելի քան 22 հազար դոլար: 2021 թվականի ապրիլին կազմակերպությունը դատական հայց էր ներկայացրել Բոուիի ու նրա «չբացահայտված ամուսնու» (փաստաթղթային տերմին) նկատմամբ՝ վճարային պարտականություններից խուսափելու մեղադրանքով: Ենթադրվում էր, որ Բոուիի առանձնատան աճուրդը պետք է կայանար 2022 թվականին, սակայն գործարքը չեղարկվեց, իսկ գործը փակվեց անհայտ պատճառներով:
Թեպետ առանձնատունը մնաց Բոուիի մոտ, սակայն «հարևանությունը» միաբերան պնդում էր, որ մարզուհին այնտեղ չէր ապրում. վերջին 3 ամսվա ընթացքում Բոուիի առանձնատան դարպասը միշտ բաց է եղել, իսկ տան շքամուտքն ու պատուհանները երբեք փակ չէին: Տեղի բնակիչները պնդում էին նաև, որ տունը գրավել են «սքվաթերները» (ֆերմերներ, որոնք առանց տան սեփականատիրոջ թույլտվության, գրավում են նրա սեփական տարածքը):
Դանակով վեճեր, աղմուկ-աղաղակ, ձվերով կռիվ ու ենթադրյալ հղիություն
Ինչպես գրեթե միշտ է տեղի ունենում, որևէ մեկի մահից հետո ակտիվանում են տեղի հարևաններն ու սկսում պատմել «տժվժիկի պատմություններ»: Օրինակ, այդ հարևաններից մեկի պնդմամբ, Բոուին, մի օր առանց որևէ պատճառի ձվերով խփել է հարևանությամբ գտնվող տներից մեկին: Ըստ պաշտոնական տվյալների էլ, Բոուին 2019 թվականին 16 անգամ խախտել է երթևեկության կանոնները: Իսկ մեկ այլ սարսափելի դեպքի մասին պատմել է մարզուհու 52-ամյա հարևանուհի Զեհրա Ուգուրլուն:
«Մի անգամ տնից դուրս եկա ու տեսա Տորիին: Նա կանգնած էր մայթեզրին, ձեռքին խոհանոցային մեծ դանակ կար: Նա բղավում էր հակառակ կողմում կանգնած մի երիտասարդի վրա, որը, երևի, նրա ընկերն էր: Իմ ընկերուհուն հաջողվեց խոսել, հանգստացնել նրան, սակայն տեսարանը վախենալու էր: Իմ երեխաները սարսափած նայում էին պատուհանից», — ասել է հարևանուհին:
Նրա հետ նույն փողոցի վրա ապրող մարդիկ պնդում էին, որ մարզուհին ապրում էր անկանոն կյանքով, սակայն նրա մահը շանթահար էր արել բոլորին: «Լավ, ընկերներ չունե՞ր այդ աղջիկը», փսփսում էին հարևանները: Եվ դա այն դեպքում, որ առնվազն 2 հարևան երդվում էին, որ մարզուհին հղի է. արտաքին տեսքից երևում էր, ըստ հարևանների, որ Բոուին 7 կամ 8 ամսական հղի էր (պաշտոնապես այս ինֆորմացիան դեռևս չի հաստատվել):
Բոուին աչքի էր ընկնում հակասական վարքով: Նրա առանձնատնից երբեմն գալիս էին աղմուկի ձայներ, լսվում էր բարձր երաժշտություն, բայց լինում էին օրեր, երբ նա իր առանձնատնից դուրս էր գալիս ժպիտով, ողջունում էր բոլորին և իրեն հիանալի էր զգում: Բոուիի քույրը՝ Տամարան, պնդում է՝ դա պայմանավորված է էմոցիոնալ պոռթկումներով:
«Այն մարդիկ, որոնք ձևացնում են՝ իբրև իրենց մոտ ամեն ինչ կարգին է, իրականում ամենատխուրն են: Իսկ նրանք, ովքեր առանձնապես ոչինչ ցույց չեն տալիս և անկեղծ են՝ ամենաերջանիկն են, քանի որ առավել քան գոհ են իրենց էությունից: Ես դա մանկուց եմ հասկացել, երբ մենք խնդիրներ ունեինք: Ես կարողացա դա հաղթահարել, իսկ իմ քույրը՝ ցավոք, ոչ», — ասել է Տամարան:
Բոուի քույրերն անցել են կյանքի բարդագույն ճանապարհ. նրանց հարազատ մայրը նրանց հանձնել է մանկատուն, իսկ որոշ ժամանակ անց նրանց որդեգրել է հարազատ տատը: Մարզուհու խոսքով, դժվարությունները հաղթահարելու ճանապարհին ծագում էին մտքեր, որ ծնունդով փոքր քաղաքից լինելն ու նման ճակատագիր ունենալը չի կարող հույս ներշնչել, որ ապագայում հնարավոր է հասնել լուրջ բարձունքների:
«Մենք երջանիկ ենք, երբ արթնանում ենք, մեր կյանքն առջևում է. ես ցանկանում եմ ամեն օր մի նոր բանով զբաղվել: Ես զգում եմ, որ այդ ամեն օրն ինձ համար տոն է: Եթե մի օր ես այլևս չլինեմ, կցանկանամ, որ երկնային կյանքում չափսոսեմ ինչ-որ բան չանելու համար», — մի առիթով ասել էր Բոուին:
Տեսնես հիմա ափսոսո՞ւմ է….
Ռոբերտ Գասպարյան
