Սպորտային մարմնամարզության Հայաստանի հավաքականի անդամ, Եվրոպայի կրկնակի չեմպիոն, Օլիմպիական խաղերի բրոնզե մեդալակիր Արթուր Դավթյանը ոսկե մեդալ է նվաճել Եգիպտոսում անցկացվող աշխարհի գավաթի խաղարկության չորրորդ փուլում:
Հենացատկի վարժության եզրափակչում Դավթյանը 15,166 միավոր է հավաքել և անհասանելի դարձել մրցակիցների համար:
Նշենք նաև՝ աշխարհի գավաթի խաղարկության չորս փուլերի արդյունքում Դավթյանը երկրորդ տարին անընդմեջ դարձել է բացարձակ գավաթակիր, թեև Բաքվում կայացած երրորդ փուլին հայ մարզիկը չի մասնակցել:
Հիշեցնենք՝ ավելի վաղ աշխարհի գավաթի խաղարկության չորրորդ փուլում Հայաստանի ևս երեք ներկայացուցիչներ դարձել էին մեդալակիրներ:
Երիտասարդ Գագիկ Խաչիկյանը, հանդես գալով նժույգթափեր վարժության եզրափակչում, հավաքել էր 14.733 միավոր և դարձել արծաթե մեդալակիր, իսկ Եվրոպայի կրկնակի չեմպիոն Հարություն Մերդինյանը 14.566 միավորով եզրափակել էր լավագույն եռյակը՝ արժանանալով բրոնզե մեդալի։
Աշխարհի գավաթի խաղարկության բրոնզե մեդալը նվաճել էր նաև Արթուր Ավետիսյանը: Օղակների վարժության եզրափակչում նա 14,666 միավոր էր հավաքել և զբաղեցրել երրորդ հորիզոնականը: Այս վարժության եզրափակչում հանդես էր եկել նաև Արթուր Դավթյանը՝ ցույց տալով 7-րդ արդյունքը:
Նշենք՝ մարմնամարզիկներն աշխարհի գավաթի խաղարկության չորրորդ փուլին մասնակցում էին մարզիչներ Հայկ Նազարյանի և Աշոտ Գասպարյանի գլխավորությամբ։ Հավաքականի գլխավոր մարզիչ Հակոբ Սերոբյանը մրցավարական հանձնաժողովում էր:
Աշխարհի գավաթի խաղարկությունը վարկանիշային է աշնանը Բելգիայում կայանալիք աշխարհի առաջնության համար, որտեղ էլ մարզիկները պայքարելու են Փարիզի 2024 թվականի Օլիմպիական խաղերի ուղեգրերի համար: