«Այսօր հայկական ֆուտբոլի և ազգային հավաքականի համար տխուր օր է»,- ասաց Հայաստանի հավաքականի գլխավոր մարզիչ Խոակին Կապառոսը՝ մեկնաբանելով Մխիթարյանի՝ հավաքականում կարիերան ավարտելու մասին: Եվ, իսկապես, Մխիթարյանի որոշումը որքան էլ՝ տրամաբանական էր, ու շատերի համար, գուցե, սպասելի, բայց միանշանակ շատ ցավալի էր:
Մխիթարյանի «հրաժեշտի» նամակը բուռն արձագանքներ գտավ երկրպագուների ու ֆուտբոլային աշխարհի շրջանում:
«Հաջողություն Հենո ջան: Բազում հիանալի հիշողություններ կան մեր Ազգային հավաքականի հետ».- գրել է հավաքականում Մխիթարյանի նախկին թիմակից Յուրա Մովսիսյանը:
«Քեզ շատ կկարոտենք հանդերձարանում, և հատկապես խաղադաշտում, եղբայրս»,- գրել է Տիգրան Բարսեղյանը:
Հայաստանի հավաքականի նախկին ֆուտբոլիստ Լևոն Պաչաջյանը գրել է՝ Մխիթարյանի որոշումն անսպասելի էր իր համար.
«Չէի սպասում, որ Հայաստանի ֆուտբոլի նորագույն պատմության լավագույն ֆուտբոլիսը՝ Հայաստանի Ազգային Հավաքականի ավագ Հենրիխ Մխիթարյանը , այս ժամանակահատվածում կավարտի իր ելույթները հավաքականի կազմում: Բայց ամեն դեպքում ուզում եմ նշել, որ Հենոն կմնա պատմության մեջ որպես լավագույներից մեկն (մինչև այս պահը լավագույնը) ով կրել է հավաքականի մարզաշապիկը՝ դառնալով հավաքականի բոլոր ժամանակների գլխավոր ռմբարկուն: Հաջողություններ եմ մաղթնում նրան և հուսով եմ դեռ երկար կվայելենք նրա ցուցադրած խաղը ակումբային ֆուտբոլում»:
Հայաստանի հավաքականի և Գյումրիի «Շիրակի» նախկին ֆուտբոլիստ Կարեն Ալեքսանյանն էլ լուսանկար է հրապարակել Մխիթարյանի՝ հավաքականի մարզաշապիկով առաջին խաղից՝ Պանամայի դեմ.
Մխիթարյանին հաջողություն է մաղթել նաև գերմանական adidas ընկերության Instagram-ի պաշտոնական էջը. «Հաջողություն ենք մաղթում քեզ ապագայում: Մենք միշտ քո կողքին ենք»:
Շատերը ցավում են Մխիթարյանի այս որոշման համար.
«Ափսոս, Հենո ջան»,-գրել է բռնցքամարտիկ Արթուր Աբրահամը:
«Ափսոս … նորանոր հաջողություններ քեզ Հենո ջան»,- գրել է քաղաքական գործիչ Էդմոն Մարուքյանը:
«Շնորհակալ ենք քեզ ամեն ինչի համար: Շնորհակալ ենք այն բոլոր ձեռքբերումների համար, որոնք դարձրեցիր ոչ միայն քոնը, այլ նաև քո երկրինը: Շնորհակալ ենք, որ քեզնով միլիոնավոր մարդիկ ճանաչեցին մեզ: Աբրիս!!!!»,- գրել է պրոդյուսեր Ռուբեն Մխիթարյանը:
«Հենրիկ ջան, թող յուրաքանչյուր հայ այնքան հայ լինի, որքան՝ դու ես: Շնորհակալություն մեր ազգի նվիրված որդին լինելու համար: Երախտապարտ ենք, որ հնարավորություն ենք ունեցել կիսելու քո յուրաքանչյուր հաջողություն, շնորհակալություն մեր երիտասարդ ֆուտբոլիստների համար խորհրդանիշ լինելու համար: Լավագույն մաղթանքներս»,- Մխիթարյանի գրառման մեկնաբանություններում գրել է օգտատեր Անուշիկ Մազմանյան Շքոթը:
«Միանգամայն վստահ եմ, որ սա շատ բարդ որոշում էր քեզ համար: Ինքս աջակցում և հարգում եմ քո որոշումը: Շնորհակալ եմ երջանիկ պահերի և այն գոլերի համար, որ նվիրել ես մեր ազգին: Խաչում ենք մատներս, քեզ համար և լավագույնն ենք մաղթում հետագա կարիերայում»,- գրել է ֆեյսբուքյան օգտատեր Աննա Ստեփանյանը:
«Թեև շատ ցավալի նորություն էր, բայց մենք պետք է շնորհակալություն հայտնենք քեզ մեր երկրի անունը բարձր պահելու և մեր երկրի լավագույն դեսպաններից մեկը լինելու համար: Կցանկանանք, որ մի օր վերադառնաս ու աջակցես մեր ազգային թիմին: Միևնույն ժամանակ, քեզ հաջողություն եմ մաղթում»,- գրել է օգտատեր Սիլվա Ջիկերիանը:
Մխիթարյանի գրառման տակ երկրպագուներն ավելի քան 1200 մեկնաբանություն են թողել՝ շնորհակալություն հայտնելով թիմի ավագին և հաջողություն մաղթելով նրան հետագա կարիերայում:
