Հայաստանի ազգային հավաքականի կիսապաշտպան Վահան Բիչախչյանը, որն օրերս «Ժիլինայից» տեղափոխվեց «Պոգոն», առաջին հարցազրույցն է տվել լեհական ակումբի պաշտոնական կայքին։
«Առաջին օրերը «Պոգոնում» ֆանտաստիկ են։ Անձնակազմն ու խաղացողներն ինձ իսկապես ջերմ ընդունեցին, ինչի շնորհիվ առաջին իսկ օրվանից ինձ այս թիմի մասնիկը զգացի»,- հայ ֆուտբոլիստի խոսքերն է փոխանցում ակումբի մամուլի ծառայությունը։
Վահանը խոսել է նաև Թուրքիայում անցկացվող ուսումնամարզական հավաքից․
«Հիանալի պայմաններ են Թուրքիայում։ Հանգրվանել ենք պրոֆեսիոնալ հյուրանոցում, որը բարձր ստանդարտներ ունի։ Սա այն է, ինչ մեզ պետք է հիմա։ Տասը օր ունենք առջևում քրտնաջան աշխատելու համար, որի ընթացքում նաև 3 խաղ ենք անցկացնելու։ Ուրախ եմ, որ միացել եմ այս թիմին։ Այստեղ բոլորը պրոֆեսիոնալ են ու գիտեն՝ ինչ են ուզում։ Մենք նաև մեծ աջակցություն ենք ստանում անձնակազմի բոլոր անդամներից, որոնք միշտ պատրաստ են օգնել։
Երբ հանդես էի գալիս «Ժիլինայում», միշտ Դուբայում էինք անցկացնում ուսումնամարզական հավաքները։ Միայն մեկ անգամ էի եղել Թուրքիայում, երբ դեռ «Շիրակում» էի խաղում։ Բայց դա կարևոր չէ, որովհետև երկու տեղում էլ պայմանները նույնն են»։
Հիշեցնենք՝ Վահանը նոր ակումբի հետ կնքել է 3,5 տարվա պայմանագիր։