«Լոս Անջելես Լեյքերս» բասկետբոլային ակումբի լեգենդար մարզիկ Կոբի Բրայանթի կինը՝ Վանեսան, ամուսնու և 13-ամյա դստեր ողբերգական մահից հետո առաջին ինստագրամյան գրառումն է արել՝ խոսելով ողբերգության մասին:
Կինն ընտանեկան լուսանկար է հրապարակել ամուսնու և չորս դուստրերի հետ՝ նշելով, որ «անսպասելի կորուստն ամբողջովին կոտրել է իրենց»:
«Աղջիկներս ու ես ցանկանում եմ շնորհակալություն հայտնել այն միլիոնավոր մարդկանց, ովքեր իրենց աջակցությունն ու սերն են ցույց տվել այս սարսափելի ժամանակում: Շնորհակալ եմ բոլորիդ աղոթքների համար: Մենք իսկապես ունենք դրա կարիքը: Մենք ամբողջովին թևաթափ ենք եղել իմ պաշտելի ամուսնու` Կոբիի և իմ գեղեցիկ դստեր`Ջիանայի անսպասելի մահվանից: Կոբին հրաշալի հայր էր մեր երեխաների համար, իսկ Ջիանան`սիրող, հոգատար ու հրաշալի քույր Նատալիայի, Բիանկայի և Կապրիի համար:
Չկան բավարար բառեր, որպեսզի նկարագրեմ մեր ցավը: Ինձ միայն մխիթարում է այն միտքը, որ Կոբին ու Ջիջին միշտ իմացել են, որ շատ սիրված են: Մենք շատ օրհնված ենք եղել նրանց մեր կյանքում ունենալու համար: Նրանք չափազանց շուտ լքեցին մեզ: Անհնարին է թվում կյանքն առանց նրանց: Բայց մենք ամեն առավոտ արթնանում ենք փորձելով դիմանալ, քանի որ Կոբին ու Ջիջին իրենց լույսը տարածում են մեզ վրա: Մեր սերը նրանց հանդեպ անսահման է, ու անչափելի:
Ես միայն ցանկանում եմ գրկել ու համբուրել նրանց, ու ընդմիշտ նրանց մեր կողքին տեսնել: Շնորհակալ եմ, որ մեզ հետ կիսում եք ձեր սերը, վիշտն ու աջակցությունը»,- գրել է Վանեսան:
Բացի այդ, Վանեսա Բրայանտը ցավակցություն է հայտնել տեղի ունեցած ավիաաղետի հետևանքով մյուս յոթ զոհերի ընտանիքներին:
Ինչպես ավելի վաղ հայտնել էինք, Լոս Անջելեսում խիտ մառախուղի հետևանքով տեղի ունեցած ավիաաղետը խլել է 41-ամյա Բրայանթի, նրա 13-ամյա դստեր և ևս 7 մարդու կյանք: Ուղղաթիռի ղեկին եղել է փորձառու օդաչու Արա Զոբայանը, որն ունեցել է Բրայանթի վստահությունն ու հաճախակի է սպասարկել մարզիկին, նրա ընտանիքին: