2022 թվականի մայիսին Երևանը կընդունի բռնցքամարտի Եվրոպայի մեծահասակների առաջնությունը։ Ըստ նախնական կանխատեսման՝ 40-42 երկրի մոտ 300 մարզիկ կժամանի Հայաստան ու կմասնակցի մայրցամաքի գլխավոր ստուգատեսին։
Իսկ թե ինչպես Հայաստանը շահեց տենդերային մրցույթը, ինչպես են մտադիր կազմակերպել ու անցկացնել առաջնությունը, պատմում են ՀՀ ԿԳՄՍ փոխնախարար Կարեն Գիլոյանն ու Հայաստանի բռնցքամարտի ֆեդերացիայի նախագահ Հովհաննես Հովսեփյանը։
«Թե ինչքան կարևոր է այս մրցույթը, կգնահատեն մասնագետները։ Անգամ Խորհրդային տարիներին նման միջոցառում ՝ նման մակարդակի ու մասշտաբների, Երևանում չի կայացել։ ԱԻԲԱ-ի նախագահ Ումար Կրեմլյովի հետ բանակցությունները տվեցին դրական արդյունք։ Արդեն ստացել ենք պաշտոնական գրությունը։
ՀՀ Կառավարությունը հանձն է առել ամբողջովին աջակցել մրցման անցկացմանը։ Վստահ եմ՝ Հայաստանն իսկապես սպորտային տոն կընդունի։ Շահագրգիռ կողմերի հետ կհամագործակցենք, ՀՀ Օլիմպիական կոմիտեի և Երևանի Քաղաքապետարանի հետ ևս։ Կստեղծվի կառավարական հատուկ հանձնաժողով, և ամեն ինչ կարվի, որ Հայաստանն աշխարհին ներկայանա որպես բարձր մրցում անցկացնող երկիր։
Անցկացվել է քվեարկություն, մենք միջազգային ֆեդերացիային ներկայացրել ենք մեր ծրագիրը ու քվեարկության արդյունքում ընտրվել է Հայաստանի թեկնածությունը։ Մենք մրցակցել ենք Ռուսաստանի և Իսպանիայի հետ ու ստացել ենք 7/2-ի դիմաց քվե՝ առաջնությունը Հայաստանում անցկացնելու համար։ Առաջնությունն անցկացվելու է Կարեն Դեմիրճյանի անվան մարզահամերգային համալիրում։ Ներկայացրել ենք նաև մարզումային համալիրները, հյուրանոցները, որտեղ մասնակիցները կհանգրվանեն։
Հովհաննես Հովսեփյան․ Մեծ աշխատանք ենք տարել այդ ուղղությամբ։ ԱԻԲԱ-ի նախագահ Ումար Կրեմլյովի՝ Հայաստան այցի ընթացքում ներկայացրել ենք, թե ինչպես կարող ենք անցկացնել այս մրցաշարը։ Շատ պատասխանատու և լուրջ քայլ է, որը մենք հանձն ենք առել։ Սպորտի հետ կապված բոլոր կառույցներն այդ պատասխանատվությունը վերցրել են իրենց վրա և պատրաստ են ամեն ինչ անել հավուր պատշաճի մրցաշարն անցկացնելու համար։
-Քանի՞ մասնակից ենք նախատեսում ընդունել։
Կարեն Գիլոյան․ Նախատեսվում է, որ մոտ 40-42 երկիր ներկայացուցիչ կունենա Երևանում կայանալիք Եվրոպայի մեծահասակների առաջնությանը։ Եթե այդպես լինի, ապա մոտավոր հաշվարկներով 280-300 մարզիկ, մոտ 150-200 մարզիչ, բժիշկներ, թիմերի ներկայացուցիչներ ․․․ բռնցքամարտի Եվրոպայի առաջնությունը շատ լուրջ մրցաշար է և շատ մեծ հետաքրքրություն է վայելում նաև երկրպագուների շրջանում։
Հայաստանում ունենք Եվրոպայի գործող չեմպիոն՝ Հովհաննես Բաչկովը, ու հույս ունեմ, որ այս մրցաշարից հետո կունենանք ոչ թե մեկ, այլ մի քանի Եվրոպայի չեմպիոն։
Ինչպե՞ս են ընտրել Հայաստանը․
Հովհաննես Հովսեփյան․ եղել է տենդերային ծրագիր, ցույց ենք տվել այն, թե ինչ կարող ենք անել, ինչ տեսարժան վայրեր ունենք, ինչպիսի մարզահամալիր ունենք։ Գործկոմի 9 անդամներից 7-ը իրենց ձայները տվել են մեզ ու մենք շատ շնորհակալ ենք այդ վստահության համար։ Ամեն ինչ կանենք, որպեսզի չհիասթափեցնենք։
-Ի՞նչ պետք է արվի, որ Երևանում կայանալիք բռնցքամարտի Եվրոպայի առաջնությունը հիշարժան լինի։
Կարեն Գիլոյան․ Պետք է առաջարկենք պայմաններ, որոնք ընդունելի կլինեն բոլորի կողմից։ Այն, որ մենք գիտենք ընդունել հյուրասիրել, դա գաղտնիք չէ։ Մնում է կազմակերպչական հարցերն էլ հավուր պատշաճի իրականացնել։ Առաջիկայում հրավեր ենք ստացել մասնակցելու աշխարհի առաջնության բացման արարողությանը, որը կկայանա Սերբիայում։ Այդ կերպ ԱԻԲԱ-ից մեզ ցանկանում են ցույց տալ, թե ինչ են ուզում ստանալ մեզանից։ Սերբիա գործուղման ընթացքում նաև մեզ հուզող մնացած հարցերը կլուծենք։ Պետք է ամեն ինչ անենք, որպեսզի առաջնության արտասահմանցի հյուրերը հետո ևս ցանկանան վերադառնալ Երևան։
-Տարածաշրջանային լարվածությունը արդյոք խնդիրներ չստեղծե՞ց, որպեսզի ընտրությունը կատարվի Հայաստանի օգտին։
Կարեն Գիլոյան․ Այն, ինչ կատարվում է քաղաքականության մեջ, բնական է՝ իր ազդեցությունը կունենա, բայց մի մոռացեք, որ մենք ևս գնացել ենք Բաքու՝ մասնակցելու սպորտային մրցաշարերի։ Սա սպորտ է։ Մենք բարձր մակարդակով պատրաստ ենք ապահովել բոլորի անվտանգությունը։
-Իսկ ի՞նչ եք կարծում Ադրբեջանի հավաքականը կմասնակցի Երևանում կայանալիք առաջնությանը։
Կարեն Գիլոյան․ Դա իրենց խնդիրն է։ Բայց մենք կապահովենք նրանց անխոչընդոտ մասնակցությունն ու անվտանգությունը։
Հովհաննես Հովսեփյան․ Երբ ներկայացնում էինք Եվրոպայի առաջնությունն ընդունելու ծրագիրը, ունեցել ենք խնդիրներ այդ առումով, բայց կարողացել ենք երաշխավորել, որ պատրաստ ենք բարձր մակարդակով ապահովել մրցաշարի անցկացումն ու թիմերի անվտանգությունը։
-Ի՞նչ է արվելու, որ բռնցքամարտի Հայաստանի հավաքականը լավ հանդես գա Եվրոպայի առաջնությունում։
Հովհաննես Հովսեփյան․ Մենք ամեն օր աշխատում ենք այդ ուղությամբ՝ ոչ միայն Եվրոպայի, այլև աշխարհի առաջիկա առաջնության համար։ Իհարկե ավելի լավ ենք ուզենալու պատրաստվել Եվրոպայի առաջնությանը, քանի որ սա մեր երկրում է անցկացվելու, հարազատ պատերի ներքո։ Նման մրցաշարի Հայաստանում երկար ենք սպասել։ Բռնցքամարտիկները մոտիվացման խնդիր չեն ունենա։ Բոլորն էլ կուզենան մեդալ նվաճել հարազատ պատերի ներքո, որպեսզի բարձրացվի մեր դրոշն ու հնչի ՀՀ օրհներգը։
Կարեն Գիլոյան․ Միայն պարոն Հովսեփյանի խնդիրը չէ լավ հավաքական պատրաստելու։ Այստեղ մեծ է նաև երկրպագուի դերը։ Հորդորում եմ տրիբունաներում ազատ աթոռ չթողնել։
-Արդյոք մյուս մարզաձևերում և”ս նախատեսում եք միջազգային առաջնություններ ընդունել։
Կարեն Գիլոյան․ Պաշտոնապես հայտարարում եմ, որ ամեն տարի նվազագույնը երկու խոշոր մրցում է անցկացվելու Հայաստանում։ 2022-ի համար հայտեր ներկայացնելու համար արդեն մի փոքր ուշ է, իսկ 2023 թվականի համար երկու շատ լուրջ մրցում ծրագրել ենք, ճանապարհի մեծ մասը անցել ենք, բայց թե որ մարզաձևերի մասին է խոսքը, կհայտարարենք ավելի ուշ։