Հայաստանի ազգային հավաքականն այսօր կանցկացնի ԱԱ–2022–ի ընտրական փուլի հերթական հանդիպումը։ Կապառոսի թիմն արտագնա խաղում կմրցի Ռումինիայի ընտրանու հետ։ Այս հանդիպումը թիմերի համար կլինի 5–րդը։
Մրցակիցը՝ Ռումինիայի հավաքական
Հայաստանի հավաքականի հաղթական մեկնարկից հետո նրանից միայն հաղթանակ էլ ակնկալվում էր, հատկապես մրցաշարային աղյուսակի հետնապահների հետ խաղերում։ Բայց Լիխտենշտեյնի դեմ տնային ոչ-ոքին, ապա նաև Իսլանդիայի դեմ արտագնա ոչ-ոքին եկան սթափեցնելու երկրպագուներին՝ հիշեցնելով, որ պետք է չկորցնել իրատեսությունը։
Հիմա մեր Ազգային թիմը, որն առաջին 3 խաղից հետո գլխավորում էր J խմբի մրցաշարային աղյուսակը, նահանջել է 3-րդ հորիզոնական ու ընդամենը 2 միավորով է առաջ այսօրվա մրցակից Ռումինիայի ընտրանուց։ Սա նշանակում է, որ գոնե այսօր ոչ մի հետ քայլ անելու իրավունք չունենք։ Պետք է անպայման հիշել, որ այս ընտրական փուլում մենք այս հավաքականին արդեն մեկ անգամ կարողացել ենք հաղթել Երևանում և նույնը կարող ենք անել նաև այսօր։
Ռումինիայի համար ընտրական փուլի մեկնարկն այնքան լավը չէր, որքան մեզ համար․ նախ նրանք հաղթեցին Հյուսիսային Մակեդոնիային, ապա իրար հետևից պարտվեցին Գերմանիային, Հայաստանին, հետո նորից հաղթանակ տարան իսլանդացիների նկատմամբ, օրեր առաջ կրկին պարտվեցին Գերմանիայի ընտրանուն և հիմա հերթը էլի մերն է։
Առավելությունը ռումինացիների կողմն է
Հայաստանի և Ռումինիայի հավաքականները նախկինում հանդիպել են 4 անգամ։ Այդ խաղերից միայն մեկում է հաղթանակ տոնել Հայաստանի ընտրանին և դա հենց այս ընտրական փուլի տնային խաղում էր՝ 3-2 հաշվով։
Մյուս 3 խաղերում հաղթել են ռումինացիները․ 2005 թվականին 3-0, 2016-ին՝ 5-0 և 2017-ին՝ 1-0 հաշիվներով։
Բուքմեյքերների գործակիցները
Այս խաղում բուքմեյքերները նախապատվությունը տալիս են տանտերերին․ նրանց հաղթանակի գործակիցը գնահատվում է միջինը 1,55 գործակցով։ Հայաստանի հավաքականի հաղթանակի միջին գործակիցը 5,70 է։
Հիշեցնենք՝ Ռումինիա-Հայաստան հանդիպման մեկնարկը Երևանի ժամանակով 22:45-ին է։
J խմբի՝ այսօր կայանալիք մյուս խաղերում Հյուսիսային Մակեդոնիան կհյուրընկալի Գերմանիայի հավաքականին, իսկ Իսլանդիայի ընտրանին կընդունի Լիխտենշտեյնի թիմին:
Ստելլա Բաբլոյան