ArmSport-ը շարունակում է ներկայացնել այն հայ ֆուտբոլիստներին, ովքեր ձմեռային տրանսֆերային պատուհանի ընթացքում խզել են պայմանագիրը և ազատ խաղացողի կարգավիճակում են:
Արսեն Բեգլարյան. դիրքը՝ դարպասապահ, տարիքը՝ 26
Բեգլարյանի հետ հույսերը մեծ են: Նա հավաքականի հիմնական դարպասապահն էր, իսկ վերջին ժամանակահատվածում ազգային թիմում «1-ին համարը» զիջեց Արամ Հայրապետյանին:
Բելառուսական «Դնեպրի» կազմում Բեգլարյանը մասնակցել է գավաթային 2 հանդիպման, իսկ օրերս հեռացել է թիմից: Sports.kz-ն հայտնել է, որ Բեգլարյանը փորձաշրջանը չի անցել ղազախական «Կիզիկ-Ժարում»:
Բեգլարյանի բարձր կարգը միմիայն դրական կարող են լինել հայկական թիմերի համար: Ներկա իրավիճակում նա իսկական «նվեր» կարող է լինել առաջատարների համար, և եթե արագորեն նոր թիմ չունենա, ապա Արսենի համար «որս» կսկսվի:
Հայկ Գալստյան. դիրքը՝ կիսապաշտպան, տարիքը՝ 21
Հայաստանի ամենահեռանկարային ֆուտբոլիստներից մեկի կարիերան վերջին տարիներին անկման ուղով զարգացավ: Լինելով «Հոֆենհայմի» ակադեմիայում՝ Հայկը լավ ելույթներ էր ունենում, այնուհետև տեղափոխվեց «Բոխում», այդտեղից էլ «Շտուտգարտ»: Հնչեղ անուններ ունեցող թիմերում Գալստյանը չհաստատվեց և նախորդ տարվա սկզբից մնաց առանց ակումբ:
ArmSport-ի աղբյուրների համաձայն՝ երիտասարդ ֆուտբոլիստն այժմ «Ալաշկերտում» է, բայց պայմանագիր դեռ չի ստորագրվել:
Վիուլեն Այվազյան. դիրքը՝ հարձակվող, տարիքը՝ 25
«Փյունիկի» սանը Հայաստանում իր ժամանակի լավագույն գոլահարներից մեկն էր: Հեռանկարային համարվող ֆուտբոլիստի կարիերան անկում ապրեց երևանյան թիմից հեռանալուց հետո: Վիուլենը վերգտավ իր խաղը «Շիրակում», այնուհետև տեղափոխեց «Վենսպիլս», Մոգիլևի «Դնեպր»:
Մրցաշրջանի մեկնարկում Վիուլենը համալրեց ԲԽ-ի հետնապահի՝ «Երևանի» կազմը: 7 հանդիպումներում Այվազյանը գոլ չի խփել. այս ցուցանիշը, հասկանում ենք, կապված է թիմի անհասկանալի լինելու հետ:
Ամեն դեպքում, Բարձրագույն խմբում Վիուլենի փորձը և գոլային հոտառությունը կարող են օգտակար լինել իրեն «հարմար» թիմերի համար:
Սեմյոն Մուրադյան. դիրքը՝ հարձակվող, տարիքը՝ 31
Կարիերայի մայրամուտին Սեմյոնը հանդես էր գալիս «Դիլիջանում», որից հեռացել է օրերս: Սեմյոնը հարուստ կարիերա ունի՝ «Բանանց», «Ուլիս», «Գանձասար-Կապան», «Միկա», «Ալաշկերտ»… այնուհետև նա ավարտել է պրոֆեսիոնալ ֆուտբոլիստի կարիերան, բայց խաղացել ֆուտզալում: «Դիլիջան» վերադարձից հետո դարձել է թիմի առաջատարը և լավ արդյունավետություն ցույց տվել. 8 խաղ, 6 գոլ:
Սեմյոնի հարուստ փորձը կարող է օգտակար լինել Առաջին խմբում հանդես եկող այն թիմերի համար, որոնք մեծ հավակնություններ ունեն:
Հայ ֆուտբոլիստներ, որոնք ներկայում ազատ են (Մաս 2)
Հայ ֆուտբոլիստներ, որոնք ներկայում ազատ են (Մաս 1)
Արման Առաքելյան
