Դանիայի հավաքականի լեգենդար դարպասապահ Պետեր Շմեյխելը հայտնել է՝ հավաքականի ֆուտբոլիստներն այլ տարբերակ չեն ունեցել, քան շարունակել Ֆինլանդիայի հետ Եվրո-ի խաղը կիսապաշտպան Քրիստիան Էրիկսենի հետ տեղի ունեցածից հետո։
Շմեյխելին հարցրել են՝ արդյոք խաղը շարունակելու որոշումը ֆուտբոլիստների՞նն էր․
«Տեսա ՈՒԵՖԱ-ի պաշտոնական հաղորդագրությունը, որում ասվում էր, թե իրենք ընդառաջել են ֆուտբոլիստների ցանկությանը, որ ֆուտբոլիստներն իրենք են պնդել խաղալ ․․․ գիտեմ, որ դա ճիշտ չէ։
Կամ հարցն այն է, թե դուք ինչպես եք տեսնում ճշմարտությունը։ Նրանց երեք տարբերակ էր մնացել․ կամ անմիջապես խաղալ ու անցկացնել վերջին 50 րոպեն։
Հաջորդ տարբերակը խաղը հաջորդ օրը՝ 12 ժամվա ընթացքում անցկացնելն ու այդ 50 րոպեն ավարտվելն էր, իսկ երրորդ տարբերակը 0-3 հաշվով տեխնիկական պարտություն գրանցվելն էր։
Հիմա ձեզ եմ հարցնում․ խաղալը ֆուտբոլիստների՞ ցանկությունն էր։ Արդյոք նրանք ընտրության այլ տարբերակ ունե՞ին։ Չեմ կարծում, թե ունեին։
Երեկվա մամուլի ասուլիսի ընթացքում գլխավոր մարզիչն էլ նշեց, որ լրջորեն ափսոսում է, որ ֆուտբոլիստներին դուրս է բերել խաղադաշտ»,- Շմեյխելի խոսքերն է փոխանցում Daily Mail-ը։
Ավելի վաղ Շմեյխելը ՈՒԵՖԱ-ի՝ խաղը վերսկսելու որոշումն անհեթեթ էր որակել ու նշել, որ ՈՒԵՖԱ-ն պետք է կարեկցանք դրսևորեր իրենց հանդեպ։
Հիշեցնենք՝ հանդիպման վերսկսումից հետո Դանիայի հավաքականը նվազագույն հաշվով պարտություն կրեց Ֆինլանդիայից։