Ինձ համար կարևորը ուղեգիր նվաճելն էր, և ստացվեց, այդ պատճառով ուղեգրից հետո մարզչական անձնակազմով, ֆեդերացիայի նախաագահի հետ միասին որոշում կայացրեցինք, որ չշարունակեմ կիսաեզրափակիչ մենամարտին, քանի որ Օլիմպիական խաղերին մնացել է շուրջ 40 օր ու չցանկացանք ռիսկի դիմել, որպեսզի վնասվածք չստանամ: Ուղեգիր նվաճած շատ բռնցքամարտիկներ ևս հրաժարվել են մրցաշարի հետագա մասնակցությունից:
Այս մասին ArmSport-ի հետ զրույցում ասաց Փարիզում ընթացող բռնցքամարտի օլիմպիական վարկանիշային մրցաշարում Օլիմպիական խաղերի ուղեգիր նվաճած, 75 կգ քաշային կարգի բռնցքամարտիկ Արման Դարչինյանը:
Բռնցքամարտի եվրոպական գոտու վարկանիշային մրցաշարը մեկնարկել էր նախորդ տարվա ապրիլին՝ Լոնդոնում, սակայն կորոնավիրուսի համավարակի պատճատռով այն ընդհատվել էր: Լոնդոնում Հայաստանցի բռնցքամարտիկներից ՕԽ ուղեգիր էր նվաճել միայն Կորյուն Սողոմոնյանը: Արման Դարչինյանը տարել էր մեկ հաղթանակ, իսկ ուղեգիր նվաճելու համար Ֆրանսիայում Դարչինյանին հարկավոր էր երկու հաղթանակ:
«Առաջին հաղթանակս Լոնդոնում էր: Այստեղ արդեն երկրորդ մրցակիցս չներկայացավ ու հաղթանակը շնորհվեց ինձ, որից հետո հաղթեցի վրացի բռնցքամարտիկին ու փառք Աստծո, կարողացա նվաճել Օլիմպիական խաղերի ուղեգիր:
Կորոնավիրուսի համավարակի թողած բացը, Դարչինյանի խոսքով լրացվել է միջազգային մրցաշարերին մասնակցելով.
«Այս բացը լրացրեցի միջազգային մրցաշարերին մասնակցելով, այսինքն կարելի է ասել, կարանտինի պատճառով բաց թողնվածը կարողացել ենք լրացնել իհարկե նաև հավաքների, մարզումների միջոցով: Այս տարի արդեն 5 մենամարտ եմ անցկացրել միջազգային մրցաշարերում, ուժեղ մրցակիցներ եմ ունեցել՝ հաղթել եմ և պատրաստվել եմ այս մրցաշարին»,-ասաց Դարչինյանը:
Հայ բռնցքամարտիկը 2019-ին նորամուտն էր նշել պրոֆեսիոնալ ռինգում՝ հաղթելով ամերիկացի Քենդել Մեյես-Թեյլորին: Նրա խոսքով, թեև շատ ժամանակ է անցել այդ մարտից, սակայն այն իր դրական հետքն է թողել իր մարզավիճակի վրա.
«Պրոֆեսիոնոալ մի քանի սպարինգ եմ անցկացրել, որը տևել է շուրջ մեկ ամիս: Այսինքն շատ երկար ժամանակ չեմ զբաղվել պրոֆեսիոնալ բռնցքամարտով, բայց այդ ժամանակահատվածն էլ թողել է իր հետքը»,-նշեց բռնցքամարտիկը:
Խոսելով ապագայում պրոֆեսիոնալ ռինգ վերադառնալու մասին Դարչինյանն ասաց.
«Դեռ վաղ է խոսել այդ մասին: Առջևում Օլիմպիական խաղերն են ու հիմա կենտրոնացած եմ միայն դրա վրա: ՕԽ-ից հետո ունենք աշխարհի առաջնություն: Հիմա միայն մտածում եմ այս երկուսի մասին»,-նշեց 26-ամյա բռնցքամարտիկը:
Խոսելով հավաքական թիմում տիրող մթնոլորտի մասին Դարչինյանն ասաց. «Հոգեբանական վիճակը շատ կայուն է: Մի քանի մարտեր կային, որ հավասար էին, սակայն մրցանակը շնորհվեց մեր մրցակիցներին, բայց ընդհանուր առմամբ,, դա ինձ վրա չազդեց»,-եզրափակեց Դարչինյանը: