«Արարատի» կիսապաշտպան Կարեն Մուրադյանը երևանյան ակումբի հետ առաջին տիտղոսը նվաճելուց հետո ArmSport-ի հետ զրույցում կիսվել է զգացողություններով․
«Շատ ուրախ եմ, իրոք շատ կարևոր հաղթանակ էր ու անմոռանալի օր ինձ համար։ 13 տարվա դադարից հետո կարողացանք այդպիսի պատմություն ունեցող ակումբի համար գավաթ նվաճել, մեծ պատիվ է խաղալ և հաղթել այս ակումբում։
Ինչ վերաբերում է «Ալաշկերտի» հետ եզրափակիչ խաղին, ապա կարող եմ ասել, որ շատ լավ տեսք ունեինք ու լավ ֆուտբոլ խաղացինք՝ կատարելով առաջադրանքն ու որ ամենակարևորն է՝ մեր գոլային պահերը օգտագործելով»,- ասում է Կարեն Մուրադյանը։
28-ամյա գյումրեցի ֆուտբոլիստն «Արարատի» ավագի կարգավիճակում գլխավերևում պահեց Հայաստանի Գավաթը․ ասում է՝ իր համար դա մեծ պատիվ էր․
«Մեծ պատիվ էր բարձրացնել Հայաստանի Գավաթը, անմոռանալի պահ էր։ Շատ ուրախ եմ ամբողջ թիմի համար։ Մեծ մոտիվացիա կար հաղթելու, քանի որ թե՛ ակումբի համար այս հաղթանակը մեծ նշանակություն ուներ, թե՛ իմ, քանի որ 9 տարի անց նորից հաղթեցի Գավաթի եզրափակչում»։
Նվաճելով Հայաստանի Գավաթը՝ «Արարատը» լուծեց նվազագույն խնդիրը, այն է՝ ապահովեց իր մասնակցությունը եվրագավաթներում, բայց թիմը շարունակում է պայքարը նաև Հայաստանի առաջնությունում, որտեղ չեմպիոնի հիմնական հավակնորդներից մեկն է։ Իսկ որքանո՞վ կհաջողվի դուրս գալ գավաթային էյֆորիայից և ըստ արժանվույն ներկայանալ առաջնության վերջին 4 խաղերին, որոնցից յուրաքանչյուրը եզրափակչի արժեք ունի՝ չեմպիոնության տեսանկյունից․
«Կարծում եմ՝ քանի ունես չեմպիոն դառնալու իրական հնարավորություն, իրավունք չունես մինչև վերջ չպայքարելու։ Ու նշանակություն չունի՝ նվազագույն խնդիրը լուծել ես, թե ոչ։
Մնացած բոլոր 4 խաղերին պետք է նույն կերպ մոտենանք ու պայքարենք մինչև վերջ։ Իհարկե, բոլոր հանդիպումները դժվար են լինելու, չեմ ցանկանա գնահատել մեր շանսերը, բայց մի բան գիտեմ՝ եթե մենք հաղթենք մեր մնացած բոլոր խաղերում, կդառնանք չեմպիոն, իսկ դա նշանակում է, որ պետք է ձգտենք դրան ու պայքարենք մինչև վերջ, իսկ թե դա որքանով կստացվի, ժամանակը ցույց կտա»։
Կարեն Մուրադյանը բարձր է գնահատում երկրպագուների դերակատարությունն իրենց թիմի հաջողություններում ու առանձնակի շնորհակալություն է հայտնում գավաթային եզրափակչում ցուցաբերած աջակցության համար․
«Երկրպագուներին կուզեմ ասել շնորհակալություն իրենց մեծ աջակցության համար, իրենք հրաշալի էին այդ օրը։ Երկրպագուները թիմի մեծ ուժն են։ Վերջին 4 խաղերում էլ իրենց դերը շատ կարևոր է լինելու»։
Կարեն Մուրադյանի խոսքով՝ եվրագավաթների մասին մտածելու համար դեռ շուտ է, ավելին Կոնֆերենցիաների Գավաթի մասին դեռևս լիարժեք պատկերացում կազմելը դժվար է․
«Ընդհանուր առմամբ դեռ շուտ է եվրագավաթների մասին մտածելը։ Դեռ պետք է ավարտել մրցաշրջանը։ Կոնֆերենցիաների Գավաթը նոր մրցաշար է, ու դժվար է հիմա ասել, թե այն ինչպիսին կլինի, ինչպես կստացվի։ Այնտեղ կարգով համեմատաբար ավելի ցածր թիմերն են հանդես գալիս։ Տեսնենք։ Համենայն դեպս նորություն է, ժամանակը ցույց կտա»,- ասում է 28-ամյա խաղացողը ու երկրպագուներին միայն մի բան հորդորում՝ «Եկե՛ք մարզադաշտ»։
Հիշեցնենք՝ 2021/2022 մրցաշրջանին կկայանա եվրոպական ակումբային ֆուտբոլում հեղինակությամբ 3-րդ մրցաշարի՝ Կոնֆերենցիաների Գավաթի առաջին խաղարկությունը։ ՈւԵՖԱ-ի վարկանիշային աղյուսակում 15-ից ցածր հորիզոնականներում գտնվող ֆեդերացիաները ներկայացնող ակումբներն ու ներքին առաջնություններում ոչ չեմպիոնական տեղը զբաղեցրած ակումբները, երկրներիի գավաթակիրներն այսուհետ հանդես կգան ոչ թե Եվրոպա լիգայում, այլ Կոնֆերենցիաների գավաթում:
