Հայաստանի ազգային հավաքականի և «Տոբոլի» կիսապաշտպան Պետրոս Ավետիսյանը ArmSport-ի հետ զրույցում արդեն պատմել է ղազախական ակումբ տեղափոխության մասին: Հայ ֆուտբոլիստը նաև խոսել է Հայաստանի հավաքականի ավագ Հենրիխ Մխիթարյանի հետ համեմատության, Ազգային հավաքականում ամրապնդվելու հեռանկարների ու ՀՖՖ-ի կողմից «Տարվա լավագույն ֆուտբոլիստի» կոչման հավակնորդների թվում ընդգրկվելու մասին.
«Մխիթարյանի հետ համեմատությո՞ւնը. դա միշտ հաճելի է, բայց յուրաքանչյուր խաղացող ունի իր ուղին ու Հենրիխի ճանապարհը կրկնելը դժվար կլինի ցանկացածի համար: Ես միայն գիտեմ այն, որ պետք է աշխատել առանց ինքդ քեզ խնայելու, պետք է ամբողջովին նվիրվել ֆուտբոլին, որպեսզի հետո չզղջաս, որ չես արել մի բան, ինչը քեզնից էր կախված: Իսկ հետո ժամանակը ցույց կտա, թե ինչ կստացվի»,- ասում է Պետրոս Ավետիսյանը:
23-ամյա ֆուտբոլիստի խոսքով, կարևոր է` խաղացողներն անձամբ զարգանան.
«Երիտասարդ ֆուտբոլիստները պետք է անձամբ զարգանան, ու իրենց դրսևորելու հնարավորություն ստանան: Երբ նրանք հասնում են որոշակի մակարդակի, պետք է նրանց վստահել, ավելի բարձր մակարդակում խաղալու հնարավորություն տալ, որպեսզի ճիշտ պահը բաց չթողնվի»:
Տարիներ առաջ տված հարցազրույցներից մեկում Պետրոս Ավետիսյանը, խոսելով այն մաքսիմալի մասին, որին ձգտում է ֆուտբոլում, նշել էր, որ ցանկանում է խաղալ Հայաստանի ազգային հավաքականում ու ազգային թիմի հետ հայտնվել որևէ մեծ մրցաշարի խմբային փուլում, ինչպես նաև խաղալ գրանդ ակումբներից մեկում: Ֆուտբոլիստն ասում է` ձգտումների ցանկն այս ընթացքում փոփոխություն չի կրել, ու նշում, որ կան մի շարք երիտասարդ խաղացողներ, ովքեր աստիճանաբար կարող են օգտակար լինել ազգային թիմին:
Լուսանկարը` Sputnik-ի
ՀՖՖ-ն օրերս հրապարակեց 2019 թվականի Հայաստանի լավագույն ֆուտբոլիստների հավակնորդների ցանկը, որում ընդգրկված է նաև Պետրոս Ավետիսյանը: Ֆուտբոլիստն ասում է` իր համար հաճելի է այդ ցանկում ներառվելը, բայց ավելիի մասին չի ցանկանում մտածել.
«Իմ աշխատանքը դաշտում խաղալն ու թիմին օգնելն է հասնել հաղթանակների: Հաճելի է, որ ընդգրկվել եմ հավակնորդների ցանկում, բայց հավակնությունների մասին չեմ մտածում»,- եզրափակեց իր խոսքը Պետրոս Ավետիսյանը:
Հիշեցնենք` Պետրոս Ավետիսյանը Հայաստանի ազգային հավաքականի կազմում 5 հանդիպման է մասնակցել:
Նարե Հովհաննիսյան
