Ինչպես արդեն տեղեկացրել էինք, այսօր անցկացվեց բռնցքամարտի Հայաստանի ֆեդերացիայի նախագահի ընտրությունները, որտեղ ձայների մեծամասնությամբ նախագահ ընտրվեց Հովհաննես Հովսեփյանը: Ընտրությունների անաչառ անցկացումը հանձն առավ ԿԳՄՍ փոխնախարար Կարեն Գիլոյանը:
Ընտրության անցկացումից հետո արդյունքների ու բռնցքամարտի ապագայի մասին իր խոսքն ասաց Կարեն Գիլոյանը.
«Ինձ համար անընդունելի էր հայկական բռնցքամարտի վիճակը: Այսպես պառակտված ու ծնկած չի կարող լինել մեր բռնցքամարտը: Հայկական բռնցքամարտն այնպիսի ավանդույթներ է ունեցել, որ մենք մեր ջանք ու եռանդը չպիտի խնայեինք դրական արդյունքի հասնելու համար: Շնորհակալ եմ նախորդ ֆեդերացիայի նախագահ Արթուր Գևորգյանին, որ վստահեց ինձ ընտրության անցկացումը: Ինձ համար ամենևին կարևոր չէ, թե ով է ֆեդերացիայի նորընտիր նախագահը: Ինձ համար կարևոր է, թե ինչ վիճակում է սպորտն ու ինչ հաղթանակներ են պարգևում այդ ֆեդերացիաները: Հուսամ, որ նորընտիր նախագահն ի վիճակի կլինի լուծելու առկա խնդիրները, իսկ պետությունը կլինի ֆեդերացիայի կողքին: Այն գումարը, որ պետք է ստանա ֆեդերացիան, կստանա: Ավելին, Օլիմպիական տարի է, ավել գումար կտրամադրվի: Բոլորիս շնորհավորում եմ՝ միավորման առաջին քայլը կատարելու կապակցությամբ:
Իսրայել Հակոբկոխյանը ընդունեց մրցակցի հաղթանակն ու շնորհավորեց վերջինիս: Սա նշանակում է, որ ամեն ինչ անցկացվեց ազնիվ ու բռնցքամարտի ֆեդերացիայի կանոններին համաձայն:
Իհարկե, կարող էինք սկզբում անցկացնել կանոնադրության փոփոխության համար նախատեսված համաժողով, հետո նոր՝ ընտրություններ, բայց մենք պատրաստվում ենք ոչ թե Փարիզ-2024-ին, այլ Տոկիո-2020-ին. ժամանակը սուղ է:
AIBA-ն պայման ունի, որ չի կարելի 6 ամսից ավելի ժամանակ որևէ ֆեդերացիա մնա առանց գործող նախագահի: Իրենք պարզապես կդադարեցնեին մեր ֆեդերացիայի անդամակցությունը:
Միայն մեկ վարկանիշ ունենք մենք: Երբ ես նոր էի նշանակվել նոր պաշտոնում ու մտա Ծաղկաձորի մարզաբազա, տեսա, որ Կորյուն Սողոմոնյանն ու Հովհաննես Բաչկովը տարբեր դահլիճներում են աշխատում, ես ավելի խայտառակ բան չէի կարող պատկերացնել: Սա համարում էի ինձ համար պատվի խնդիր: Ամեն ինչ արել եմ կարգ ու կանոնի համաձայն:
Ինչ վերաբերում է երկրորդ ֆեդերացիային, ապա ասեմ, որ չի լինելու այլ ֆեդերացիա: Մենք մեր ընտրությունների լեգիտիմությունն ապահովեցինք նաև Միջազգային ֆեդերացիայի իրավական փորձագետներով: Նրանք եկան, իրենց խոսքն ասացին, որ տպավորված են արդար ընտրությունների անցկացումով:
Այս պահից սկսած ձեռքներս կպահենք բռնցքամարտի զարկերակին, որպեսզի այլևս քանդման աշխատանքներ չլինեն, միայն՝ կառուցողական»,-հավելեց Գիլոյանը:
