VBET Հայաստանի Պրեմիեր լիգայի 18-րդ տուրում «Արարատը» Վազգեն Սարգսյանի անվան «Հանրապետական» մարզադաշտում կընդունի «Լոռիին»։ Հանդիպման մեկնարկը՝ժամը 18։00։
«Արարատի» մամուլի ծառայությունը ներկայացրել է խաղի անոնսը։
Դիրքը մրցաշարային աղյուսակում
«Արարատը» անցկացրած 13 խաղերից հետո վաստակած 25 միավորով կիսում է առաջին հորիզոնականը «Ալաշկերտի» հետ։ Վարդան Բիչխաչյանի թիմը նախորդ տուրի խաղում ոչ-ոքի՝ 0։0 խաղաց «Վանի» հետ ու գերազանցեց «Արարատ-Արմենիայի» անպարտելիության շարքը, որը բաղկացած էր 9 խաղից։ «Լոռին» այս մրցաշրջանում անցկացրել է 15 խաղ ու վաստակած 23 միավորով 3-րդ տեղում է։
Դիմակայության պատմություն
Նոր ժամանակաշրջանում «Լոռիի» հետ «Արարատը» հանդիպել է 2018 թվականի օգոստոսի 29-ին։ Այդ խաղում վանաձորյան ակումբը հացթեց Ջոնել Դեսիրեի խփած միակ գոլի շնորհիվ։
Ընդհանուր առմամբ թիմերը միմյանց դեմ հանդես են եկել 8 անգամ` երկու հաղթանակ տոնել է «Լոռին», չորս հանդիպում ավարտվել է ոչ-ոքի, երկու անգամ էլ առավելության է հասել «Արարատը»։
Ի դեպ, «Արարատն» այս մրցաշրջանում վերջին պարտությունը կրել է հենց Վանաձորը ներկայացնող թիմից՝ հյուրընկալվելիս զիջելով 0։1 հաշվով։
Մարզավիճակ
«Արարատը» առաջնությունում անպարտելի է նախորդ տարվա հոկտեմբերից։ Թիմը կայուն ելույթներ է ունենում ու շարունակում է ընթանալ մրցաշարային աղյուսակի առաջին հորիզոնականով։ «Արարատը» ձմեռային դադարից հետո երկու հաղթանակ է տոնել ու մեկ ոչ-ոքի խաղացել։ Բոլոր հանդիպումներում Վսևոլոդ Երմակովը դարպասն անառիկ է պահել։
«Լոռին» 2021 թվականին 5 հանդիպում է անցկացրել՝ տարել 2 հաղթանակ ու 3 պարտություն կրել։ Ալբեր Սոլոմոնովի թիմը վերջին երկու արտագնա խաղերում պարտություն է կրել՝ զիջելով «Նոային» և «Ալաշկերտին»։
«Արարատի» դեմ խաղն էլ բաց է թողնելու վանաձորյան ակումբի բրազիլացի ֆուտբոլիստ Կլաուդիրը, որը կարմիր քարտ էր ստացել «Նոայի» դեմ վերջին խաղում։
Երկրպագուները մուտքը մարզադաշտ ազատ է լինելու։ Հանդիպումը ֆուտբոլասերները կարող են հետևել ՀՖՖ Youtube-ի պաշտոնական ալիքով։