Մեկնարկում է VBET Հայաստանի Գավաթի խաղարկության քառորդ եզրափակիչ փուլը։ Այս փուլում «Արարատի» մրցակիցը Հայաստանի Առաջին խումբը ներկայացնող «Վեստ Արմենիան» է։ Թիմերի միջև առաջին հանդիպումը տեղի կունենա մարտի 11-ին, ժամը 14։00-ին Վաղարշապատի ֆուտբոլի ակադեմիայում։
Ի դեպ, սա նաև երկու թիմերի պատմության ընթացքում առաջին պաշտոնական խաղն է, գրում է «Արարատի» մամուլի քարտուղարությունը:
«Վեստ Արմենիան» Հայաստանի Առաջին խմբի առաջնությունում 34 միավորով 2-րդ տեղում է։ Ձմեռային տրանսֆերային պատուհանի ընթացքում թիմը մի քանի համալրումներ է ունեցել։ Հատկանշական է, որ «Վեստ Արմենիայի» կազմը ուժեղացրել է նաև «Արարատից» հեռացած Ռուսլան Ավագյանը։
Գավաթի խաղարկության 1/8 եզրափակչում Առաջին խումբը ներկայացնող ակումբը հանդիպել էր «Գանձասար-Կապանին»։ Առաջին խաղում «Վեստ Արմենիան» տանը հաղթել էր 3։2 հաշվով։ Պատասխան խաղը չէր կայացել, քանի որ «Գանաձասար Կապանը» որոշում էր կայացրել դադարեցնել ելույթները VBET Հայաստանի Գավաթում և առաջնությունում։ Այս պատճառով «Վեստ Արմենիան» նվաճել է քառորդ եզրափակչի ուղեգիր։
«Արարատը» 1/8 եզրափակչում մրցել է «Սևանի» հետ։ Երկու խաղերի արդյունքում, 6։1 հաշվով հաղթանակ տոնելով, Վարդան Բիչխաչյանի թիմը դուրս է եկել հաջորդ փուլ։ Ի դեպ, Գավաթի խաղարկության լավագույն ռմբարկուն այս պահին Մորի Կոնեն է՝ խփած չորս գոլով։
«Արարատը» VBET Հայաստանի Պրեմիեր լիգայի վերջին տուրում ոչ-ոքի՝ 0։0 խաղաց «Վանի» հետ։ Ընդհանուր առմամբ Վարդան Բիչախչյանի թիմը ներքին առաջնությունում ու Գավաթի խաղարկությունում չի պարտվում արդեն 10 խաղ անընդմեջ։ Վերջին անգամ պարտություն է կրել նախորդ տարվա հոկտեմբերի 10-ին՝ մրցակցի հարկի տակ նվազագույն հաշվով զիջելով «Լոռիին»։
«Վեստ Արմենիա»-«Արարատ» հանդիպումն ուղիղ հեռարձակմամբ կցուցադրվի ATV հեռուստաալիքի եթերում։