Հայկական թիմերը շարունակում են նախապատրաստվել մրցաշրջանի 2-րդ կեսին: Որոշ թիմեր արդեն ակտիվ տրանսֆերային քաղաքականություն են վարում։
ArmSport.am-ը ներկայացնում է անցուդարձը հայկական տրանսֆերային շուկայում:
«Լոռի»
Բարձրագույն խմբի առաջին հատվածի չեմպիոնը դեռևս պասիվ է: Դեկտեմբերին թիմից հեռացել է Մուսա Դիակիտեն, հայտարարվեց նաև Լևան Մատչարաշվիլիի հետ պայմանագրի խզման մասին : Վանաձորյան ակումբը ձեռքբերում դեռևս չունի:
«Արարատ-Արմենիա»
Մինչև այժմ տրանֆերային գլխավոր «բումը» կատարել է «Արարատ-Արմենիան»՝ ձեռք բերելով Մարկոս Պիզելիին: «Ամենահայ բրազիլացուն» հայ ֆուտբոլիստները մեծ սիրով կընդունեն. դա հաստատ է: Մարկոսի կարիերայի տեսանկյունից գործող չեմպիոնի կազմը համալրելը ճիշտ քայլ է: Պիզելիի փորձը և հայկական ֆուտբոլին քաջածանոթ լինելը կարող է երկկողմանի դրական ազդեցություն ունենալ:
Ի դեպ, Վարդան Մինասյանի գլխավորած թիմը հունվարի 7-ից վերսկսել է մարզումները:
«Ալաշկերտ»
Թիմը դեռևս արձակուրդում է: «Ալաշկերտի» առաջին ձեռքբերումը «Ուրարտուի» նախկին կիսապաշտպան Պապե Աբդու Կամարան է: 28-ամյա ֆուտբոլիստը Լիեժի «Ստանդարդում» և ֆրանսիական «Վալանսյենում» խաղալու փորձ ունի:
Ավելի վաղ թիմից հեռացել էին Արթուր Եդիգարյանը, Գեղամ Ղադիմյանը, Դավիթ Ղանդիլյանը, Միհրան Մանասյանը, Ղուկաս Պողոսյանը, Մլադեն Զելկովիչը և Սարգիս Շահինյանը:
«Արարատ»
Երևանյան թիմն օրերս հայտնեց նոր գլխավոր մարզչի նշանակման մասին: Ուկրաինացի Վադիմ Լազորենկոյին փոխարինեց ռուս Իգոր Կոլիվանովը:
Փորձառու մասնագետը մարզչական կարիերայի ընթացքում աշխատել է «Ուֆայում» , Մոսկվայի «Տորպեդոյում», մարզել է Ռուսաստանի Մ17, Մ19 և երիտասարդական հավաքականները։ Ռուսաստանի մինչև 17 տարեկանների հավաքականի հետ դարձել է Եվրոպայի չեմպիոն։
«Արարատի» առաջին ձեռքբերումը «Երևանի» հարձակվող Ռամազան Իսաևն է: Կա ևս մեկ համալրում. «Արարատը» պայմանագիր է կնքել նիգերիացի 29-ամյա կիսապաշտպան Հարունա Լուկմանի հետ: Կարիերայի ընթացքում նա հանդես է եկել ֆրանսիական «Մոնակոյում», որի կազմում մասնակցել է ավելի քան 50 հանդիպման։ Երկար տարիներ խաղացել է Կիևի «Դինամոյում» ու դարձել Ուկրաինայի սուպերգավաթակիր։ Պաշտպանել է ղազախական «Աստանայի» գույները՝ 2016 թվականին դառնալով Ղազախստանի չեմպիոն։
«Շիրակ»
«Շիրակից» հեռացել է առաջատարներից մեկը՝ Փոլ Մուսա Բակայոկոն: Դեռևս հայտնի չէ, թե աֆրիկացի կիսապաշտպանը որտեղ է շարունակելու կարիերան: «Շիրակի» կազմում Բակայոկոն կազմում հանդես էր գալիս 2017 թվականից։ Այս տարիների ընթացքում Մուսան մասնակցել է 82 հանդիպման և խփել 20 գոլ:
Գյումրիի թիմը հայտնել է «Արարատի» և «Գանձասար-Կապանի» նախկին պաշտպան Վարդան Արզոյանին ձեռք բերելու մասին: Վարդանին խաղաժամանակ է հարկավոր և մնում է հուսալ, որ «Շիրակում» երիտասարդ ֆուտբոլիստը կգտնի իր տեղը:
«Շիրակը» նույնպես հունվարի 7-ին վերսկսել է մարզումները:
«Նոա»
«Նոան» դեռևս պասիվ է: Աշնանային հատվածի ավարտից հետո «Նոան» հայտնել է երեք ֆուտբոլիստների հետ պայմանագիրը խզելու մասին. նրանք են Ալեքսեյ Տուրիկը, Դավիթ Մանոյանը և Արման Մելիքսեթյանը:
«Փյունիկ»
Գործող փոխչեմպիոնի կազմը պաշտոնապես գլխավորեց Ռոման Բերեզովսկին: Ըստ երևույթին՝ «Փյունիկը» նոր ժամանակաշրջան կսկսի. թիմի խաղում էական փոփոխություններ են սպասվում: Այս կազմից սպասելիքները շատ ավելի մեծ են:
Երևանյան թիմից հեռացել են Էդգար Մանուչարյանը, Մաքսիմ Ժեստոկովը: Ավելի վաղ հեռացել էին նաև 5 ֆուտբոլիստներ՝ Եվգենի Կոբոզևը, Մարկո Բուրզանովիչը, Հովհաննես Պողոսյանը, Դմիտրի Սիչյովը և Հովհաննես Իլանգյոզյանը:
Պայմանագիրը երկարաձգվել է դարպասապահ Սևակ Ասլանյանի հետ, պրոֆեսիոնալ պայմանագիր է կքնվել 16-ամյա Լևոն Վարդանյանի հետ:
«Ուրարտու»
Ալեքսանդր Գրիգորյանի գլխավորած թիմը վերսկսել է մարզումները:
«Ուրարտուն» նախապատրաստական ծավալուն ընթացք է նախագծել: Կիպրոսում հավաքից առաջ թիմը Երևանում 4 ստուգողական հանդիպում է անցկացնելու. մրցակիցներն են Երևանի «Լոկոմոտիվը», «Վեսթ Արմենիան», ռուսական «Արմավիրը» և «Ալաշկերտը»:
Թիմը աշնանային հատվածի ավարտից հետո արդեն կողմնորոշվել էր տրանսֆերային անելիքների հարցում, իսկ դրանից հետո դեռ նորություն չկա:
«Գանձասար-Կապան»
Տեղական տրանսֆերային շուկայում «Գանձասար-Կապանը» բավականին ակտիվ է: Թիմը շարունակում է հայ ֆուտբոլիստներով համալրվելու գործընթացը: «Գանձասարի» կազմն են համալրել «Լոռիից» հեռացած երիտասարդներ Գրիգոր Աղեկյանը և Աշոտ Քոչարյանը:
Թիմից հեռացել են 6 ֆուտբոլիստներ՝ Վարդան Արզոյանը, Մարտին Գրիգորյանը, Գագիկ Մաղաքյանը, Ստեֆան Աջումանին, Ալեքսանդր Հովհաննիսյանը և Գևորգ Օհանյանը:
5 խաղացողների հետ երկարաձգվել են պայմանագրերը. նրանք են Գեղամ Հարությունյանը, Նարեկ Ասլանյանը, Դավիթ Մինասյանը, Աշոտ Ադամյանը և Համլետ Ասոյանը:
«Երևան»
Դեռևս ոչ մի լավ նորություն «Երևանից»: Հայտնի է, որ թիմից հեռացել է Ռամազան Իսաևը՝ տեղափոխվելով «Արարատ»:
Թիմի լուսավոր կետերից մեկը՝ Աբրահամ Պորտուգալյանը հնարավոր է հեռանա թիմից՝ տեղափոխվելով բելառուսական թիմ: Կազմի վերաբերյալ դեռևս տոտալ անորոշություն է:
Արման Առաքելյան
