«Արմավիրը», ինչպես և սպասվում էր, այլևս հանդես չի գա Ռուսաստանի Ֆուտբոլի Ազգային Լիգայում: Այս մասին հայտարարել է ակումբի նախագահ Վալենտին Կլիմկոն:
«Հարգելի «Արմավիր» ՖԱ-ի երկրպագուներ, ակումբի անձնակազմ, ֆուտբոլիստներ, գլխավոր մարզիչ և նրա շտաբ: Ես ստիպված եմ տեղեկացնել՝ այն պատճառով, որ «Արմավիր» ՖԱ-ն չի կարող լիարժեք կատարել լիցենզիայի բոլոր պայմանները 2020/21 մրցաշրջանի համար՝ ներառյալ ակումբի ակադեմիայի սերտիֆիկացումը, ինչպես նաև առաջնության շարունակության հետ կապված անկանխատեսելի իրավիճակի պատճառով, ակումբի սեփականատեր Ջևան Չելոյանցը որոշում կայացրեց դուրս բերել «Արմավիրը» ՖԱԼ-ի առաջնությունից: Ակումբը գոյություն ունի բացառապես Ջևան Չելոյանցի կողմից կատարված նվիրատվությունների հաշվին: Շնորհակալ եմ, նախևառաջ, Ջևան Չելոյանցին ՝ գրեթե հինգ դժվար, բայց հիանալի մրցաշրջանների համար, ֆուտբոլային ենթակառուցվածքի համար, որը հիմնականում կառուցվել է իր անձնական փողերով, ինչպես նաև Օլեգ Մկրտչանից ստացված միջոցներով:
Ցանկանում եմ նաև շեշտել, որ «Արմավիր» ՖԱ-ն ամբողջությամբ կկատարի իր բոլոր ֆինանսական պարտավորությունները և կավարտի մրցաշրջանը առանց պարտքերի: Այս բոլոր տարիների ընթացքում մեր հիմնական չափանիշը ֆինանսական թափանցիկությունն է, ֆուտբոլիստների, թիմի անձնակազմի և ակումբի հաշվեկշռում պարտքերի բացակայությունը: Մենք հաղթահարեցինք այս խնդիրը: Այս պահին մենք անում ենք ամեն ինչ, որպեսզի «Արմավիր» ՖԱ-ն շարունակի գոյություն ունենալ պրոֆեսիոնալ ֆուտբոլում: Ակումբը, հավանաբար, կսկսի նոր մրցաշրջանը ՊՖԼ-ում: Քաղաքապետարանը խոստացավ օգնել ակումբին պահպանել պրոֆեսիոնալ ակումբի կարգավիճակը:
Ես շնորհակալություն եմ հայտնում խաղացողներին, մարզիչներին, բժիշկներին, թիմի աշխատակազմին, ակումբի գրասենյակի աշխատակիցներին կատարված աշխատանքի համար: Կցանկանայի նաև շնորհակալություն հայտնել ակումբի երկրպագուներին: Այս ամբողջ ընթացքում մենք աշխատել ենք ձեզ համար: Շատ շնորհակալ եմ ձեր աջակցության համար»,- մեջբերում է Կլիմկոյին ակումբի պաշտոնական կայքը:
Հավելենք. որ ՖԱԼ-ի այս առաջնությունում «Արմավիրը» զբաղեցնում է 12-րդ հորիզոնականը:
