Արմեն Մելիքբեկյան. Ես լավ տիրապետում եմ իրավիճակին և «տապալում», «կործանում» բառերը իմ աշխատանքի վերաբերյալ չի կարելի օգտագործել

ՀՖՖ գլխավոր քարտուղար, ֆեդերացիայի նախագահի թեկնածու Արմեն Մելիքբեկյանը վստահ է իր հաղթանակին:

Նախորդ մեկ տարվա ընթացքում կատարված աշխատանքների, ներկա ընթացքի, ընտրությունների և հետընտրական հավանական զարգացումների մասին ArmSport.am-ը զրուցել է Մելիքբեկյանի հետ:

-Պարոն Մելիքբեկյան, ինչքանո՞վ եք վստահ Ձեր հաղթանակին:

-Եթե այս գործընթացի մեջ մտել եմ, ուրեմն վստահություն ունեմ:

-Ինչպիսի՞ կոնսոլիդացիա կա Ձեր շուրջը և ո՞ր ուժերն են պաշտպանում Ձեր թեկնածությունը:

-Այն ուժերը, որոնք ցանկանում են շարունակական բարեփոխումներ տեսնել, աջակցում են ինձ: Այդ հասարակական կազմակերպությունների թիվը բավականին մեծ է:

-Կարծում եմ՝ հանդիպումներ ունենում եք հայկական ֆուտբոլային ընտանիքի ներկայացուցիչների հետ: Կա՞ն արդեն պայմանավորվածություններ:

-Ես մշտապես հանդիպում եմ ոչ միայն ֆեդերացիայի անդամ ՀԿ-ների, այլ նաև ֆուտբոլում ներգրավված այլ կազմակերպությունների, մարդկանց հետ: Փորձում ենք հասկանալ այս ընթացքում ի՞նչ դժգոհություններ, առաջարկներ, գոհունակություններ կան, որպեսզի ավելի հստակ պատկերացնենք մեր անելիքները: Գոհ եմ այդ հանդիպումներից: Կա մի իրավիճակ, երբ մենք հստակ հասկանում ենք ինչ պետք է անել:

-Ձեր ծրագրի առաջնահերթությունները…

-Մենք ունենք ընդունված ռազմավարություն: Ինքս ունեմ ծրագրային կետ՝ պրոֆեսիոնալ լիգայի ստեղծումը: Այս նախագծին բավականաչափ դրական են արձագանքել պրոֆեսիոնալ ակումբները: Հասկանում ենք, որ հեշտ գործընթաց չէ, ակումբները պետք է համաձայնության գան: Բարձրագույն և Առաջին խմբի շատ ակումբներ պատրաստ են սկսել քննարկել և աշխատել ճանապարհային քարտեզի վրա:

-Պրոֆեսիոնալ լիգայի գաղափարը մեկ տարի առաջ եղե՞լ է:

-Ես՝ որպես գլխավոր քարտուղար եկել եմ այդ ծրագրով, քննարկել եմ ֆեդերացիայի նախկին նախագահ Արթուր Վանեցյանի հետ: Երկար քննարկումներից հետո եկել ենք այն հայտարարին, որ լիգան անհրաժեշտ է: Ես առաջարկելու եմ աշխատանքային խումբ ստեղծել, որպեսզի հանդիպումների արդյունքում կարողանանք սկսել գործընթացը: Իմ կարծիքով այս գործընթացը պետք է շուտ սկսել:

-Վանեցյանի հրաժարականով արձանագրվեց, որ կար դժգոհության ալիք՝ ուղղված ՀՖՖ գործունեությանը։ Նրա խիստ զբաղվածության պայմաններում, ՀՖՖ փաստացի կառավարումն իրականացնում էիք Դուք և պարոն Նիկողոսյանը. այդպե՞ս է:

-Բնականաբար, ամենօրյա գործառույթները մենք ենք իրականացրել. դա հերքել հնարավոր չէ: Բայց այն հեքիաթները, որ Արթուր Վանեցյանը չի պատկերացրել՝ ինչ է կատարվել, ինչ ծախսեր են արվել, դրանք հեքիաթներ են, բացառվում են…: Ամեն ինչին Արթուր Վանեցյանը տիրապետել է՝ անկախ իր զբաղվածությունից: Շատ հաճախ հանդիպել ենք, կարևոր հարցերը քննարկել ենք: Աշխատանքում լինում են համաձայնություններ և անհամաձայնություններ, դա մշտական գործընթաց է: Գործընթացի որոշողը, ի վերջո, ՀՖՖ նախագահն է: Ինքը կայացրել է այն որոշումը, որը գտել է ճիշտ:

-Ըստ շատերի՝ տապալում եղավ: Այս ամենում Ձեր մեղքի բաժինն ինչքա՞ն է:

-Ես չեմ կարծում՝ որպես գլխավոր քարտուղար, իմ աշխատանքի մասին կարելի է կիրառել «տապալում», «կործանում» բառերը: Վստահ եմ՝ յուրաքանչյուր աշխատանքում լինում են սխալներ, որոնք շտկվում են: Ես կարծում եմ, որ լավ տիրապետում եմ իրավիճակին, և այդ բառերը իմ աշխատանքի վերաբերյալ չի կարելի օգտագործել. դա իմ կարծիքն է:

-Եթե տիրապետում եք, ուրեմն ունեք այն բանալիները, որոնցով պետք է բացառել ևս մեկ անգամ նման խնդրի հանգելը: Կա՞ն այդ բանալիները:

-Այո, բնականաբար: Ունենք զարգացման հստակ ծրագիր: Մեր ռազմավարությունը կարող է մոդիֆիկացվել՝ հաշվի առնելով ֆուտբոլի զարգացման տեմպերը: Ծրագրում կան կետեր, որոնցից արդեն իսկ առաջ ենք ընկել, որոշ տեղերում հետ ենք… անընդհատ պետք է շտկումներ անենք՝ քննարկելով շահագրգիռ կողմերի հետ: Շարունակելու ենք այսկերպ աշխատել, կազմել նոր ծրագրեր: Ունենք բավականաչափ մտքեր՝ կապված ֆուտբոլիստների արհմիություն ստեղծելու հետ, մարզային ֆուտբոլ զարգացնելու հիմնադրամ ստեղծելու հետ…: Ծրագրերը շատ են, անպայման իրագործվելու են:

-Գլխավոր նորությունները, որոնց մասին չեք խոսել նախկինում…

-3 հիմնական կետեր են. պրոֆեսիոնալ լիգայի ստեղծում. այն անհրաժեշտություն է: Արհմիության ստեղծումը, նույնպես, իմ կարծիքով անհրաժեշտություն է. այն կզբաղվի կարիերան ավարտած ֆուտբոլիստների խնդիրներով՝ կապված աշխատանքի տեղավորման, մարզչական լիցենզիա ստանալու, առողջապահության հետ: Դա ինձ համար կարևորագույն հարց է:

Գործընթացները պետք է համակցված լինեն: Մարզերում ենթակառուցվածքներ ստեղծելը չպետք է ինքնանպատակ լինի: Զուգահեռ պետք է «ներդրում անենք» մարդկանց մեջ՝ կրթենք մարզերի մարզիչներին: Արդեն քայլեր արել ենք: Մարզչական C լիցենզիան մարզերի մարզիչների համար կլինի անվճար: Համայնքների ներկայացուցիչներին խնդրելու ենք հաստիքներ տրամադրել մարզիչների համար: Երկրորդ փուլը մարզային ակադեմիաներ կառուցելն է. շատ հնարավոր է՝ դիմենք պետության աջակցությանը, այլ միջոցներ էլ կգտնենք յուրաքանչյուր մարզում մեկ ակադեմիա կառուցելու համար: Երեխաները փոքր դաշտերում կխաղան, ապա ակադեմիաներում կշարունակեն պրոֆեսիոնալ ֆուտբոլով զբաղվել:

-Հենց այդ հարցի մասին խոսենք: Տարածված կարծիք կա, որ փոքր դաշտերը չեն նպաստի ֆուտբոլի զարգացմանը: Ինչքանո՞վ եք կիսում այդ տեսակետը:

-Ո՞ւմ համար է ֆուտբոլը… այսինքն այն միայն պրոֆեսիոնալ ֆուտբոլիստների և Երևանի համա՞ր է: Մարզերում շատ են սիրում ֆուտբոլը, ցանկանում են խաղալ, իսկ այդ հնարավորությունը չունեն: Այդ մարդիկ պետք է տեսնեն, թե ինչպես են մարզերի այդ դաշտերում ֆուտբոլ խաղում. բացառիկ բան է: Սիրողական և մասսայական ֆուտբոլը ֆունդամենտն է. այդտեղ են լավագույնները կերտվում: Բոլոր գործընթացները պետք է լինեն զուգահեռ: Ներդրումները նույնպես պետք է զուգահեռ լինեն, այո, չափաբաժինները կարող են տարբեր լինել:

ՀՖՖ-ի ֆինանսական կարողությունները այնքան չեն, որպեսզի ամեն ինչ իդեալական լինի: Բայց մենք կարողանում ենք բյուջեում այնպես տեղավորվել, որ բոլոր մակարդակներում ֆուտբոլի զարգացում ապահովենք:

-Կազմավորվելու է նոր Գործկոմ, որի անդամներն ուրվագծվում են: Բնականաբար, առաջադրված անձանց ծանոթ եք: ՀՖՖ նախագահ ընտրվելու դեպքում ինչպե՞ս եք պատկերացնում համատեղ աշխատանքները:

-Գործկոմի կազմը դեռևս նախանշված չէ, քանի որ թեկնածուների թիվը անհամեմատ մեծ է: Ես իհարկե պատրաստ եմ յուրաքանչյուր Գործկոմի հետ աշխատել ու լեզու գտնել: Շատ կարևոր է, որպեսզի մարդիկ գան Գործկոմ ոչ միայն դժգոհություն հայտնելու, այլ կառուցողական լուծումներ առաջարկելու համար: Կարծում եմ՝ մեզ մոտ անպայման կստացվի: Երբ կազմը ընտրվի, այս հարցին ավելի հեշտ կկարողանամ պատասխանել:

-Թեկնածուների ցանկում չկա՞ն անձինք, ովքեր սեփական ակումբի շահը կգերադասեն հայկական ֆուտբոլի շահից:

-Այժմ չեմ կարող այդ հարցին պատասխանել:

-Այսպես կոչված «ֆեյք» ՀԿ-ների ապագան ինչպե՞ս է որոշվելու:

-Տվյալ ՀԿ-ն իր իսկ հարցին չի քվեարկելու: ՀԿ-ների հետ հարցերը կորոշի ժողովը:

-Ուղիղ հարց. Ձեր՝ ՀՖՖ նախագահ ընտրվելու դեպքում Աբրահամ Խաշմանյանը շարունակելո՞ւ է գլխավորել Հայաստանի հավաքականը:

-Շատ ուղիղ պատասխան. Աբրահամ Խաշմանյանը ունի գործող պայմանագիր, որը ստորագրվել է Արթուր Վանեցյանի հետ: Ի՞նչ կլինի Խաշմանյանի հետ. ես չեմ կայացնելու այդ որոշումը: Խորհրդակցելու եմ տեխնիկական տնօրենի հետ, առաջարկները բերելու եմ Գործկոմ և միասին քննարկելու ենք: Իմ կարծիքը կլինի մեկը. Գործկոմը կորոշի հետագա անելիքները:

-ՀՖՖ նախագահ ընտրվելու դեպքում ի՞նչ փոփոխություններ են լինելու անձնակազմում:

-Մենք ունենք մեր թիմը, առանձնապես փոփոխություններ չեմ նախատեսում: 1-2 ավելացումների մասին կհայտնեմ՝ բավականին փորձառու մարդիկ կավելանան իմ թիմին, ովքեր կարող են աջակցել մեզ: Այո, վերադասավորումներ կլինեն: Բայց այն թիմը, որը հաջողությունների է հասել՝ մեկը Մ-19 Եվրո-2019-ի կազմակերպումը, որը, ի դեպ, շատ բարձր գնահատականների է արժանացել ՈւԵՖԱ-ի կողմից, նաև ԲԿՄԱ-ի ստեղծման հանգամանքը… թիմը շարունակելու է աշխատել, իսկ ավելացումների մասին շուտով կիմանաք:

-Իտալիայից կրած 1:9 հաշվով պարտության մասին ե՞րբ կխոսեք. նշել եք, որ վերլուծության կարիք կա:

-Այո, վերլուծության կարիք կա, բայց դա կարծաժամկետ պլան չէ: Պետք է դասեր քաղենք, ամեն ինչ անենք, որ այդպես չլինի: Ժամանակը կգա, այդ մասին կխոսենք:

-Պատվիրակության կազմում Դուք բացակայում էիք…

-Ես ունեցել եմ չգնալու կոնկրետ պատճառները, որոնք քննարկել եմ ՀՖՖ նախագահի հետ: Ես խղճի խայթ չունեմ, քանի որ ՀՖՖ նախագահի որոշում կար:

-Կա հանրային պահանջ, որն առնչվում է ՀՖՖ տեխնիկական տնօրինության աշխատավարձերին: Ինչպե՞ս եք պատրաստվում արձագանքել:

-Հանրային պահանջը ձևավորվել է մի փոքր խմբի կողմից, իրականում ոչ մի խնդիր չկա: Ֆուտբոլային հանրությունը հասկանում է, թե ով է մեզ մոտ եկել: Բարձրակարգ մասնագետները պետք է բարձր աշխատավարձ ստանան՝ համապատասխան եվրոպական չափանիշների: Իրենք դա հավերժ չեն ստանալու, եկել են 2 տարվա ծրագրով: Բազմաթիվ ծրագրեր են գրել, կարևորագույն սեմինարներ են անցկացրել, մարզչական լիիցենզիայի դասընթացներ…: Արել են մի քանի տիպի բազում աշխատանքներ: Մեկ տարի հետո ծրագրերը կթողնեն մեզ, մենք դրանք մոդիֆիկացնելով կշարունակենք աշխատել: Իրենք հավերժ չեն մնալու, հավերժ գումար չեն ստանալու: Մելենդեսն ասում է, որ երկու տարուց ավելի չի մնալու: Երկու տարին բավարար է, որից հետո նրանք պատրաստ են մեզ անվճար խորհրդատվություն տրամադրել:

-Որպես վերջին 1 տարի 2 ամիսների ընթացքում հայկական ֆուտբոլի գլխավոր պատասխանատուներից մեկը՝ ինչպե՞ս եք գնահատում տարբեր տարիքային հավաքականներում աշխատող իսպանացի մասնագետների աշխատանքը:

-Ես չէ, որ պետք է գնահատեմ, այլ տեխնիկական տնօրինությունը: Կարվեն համապատասխան վերլուծություններ: Հունվարին կտեսնենք, թե ինչ մարզչական փոփոխություններ կլինեն: Արդյունքների տեսանկյունից կտեսնենք աննշան, բայց դրական տեղաշարժ: Գնահատում կլինի: Մարզիչներից արդեն ստացել եմ մինչև 17 և 19 տարեկան հավաքականների տարվա հանդիպումների տեխնիկական վերլուծությունը: Կստեղծենք մի խումբ, որտեղ մի շարք մարդկանց կներգրավվենք, որոնք գնահատականներ կտան: Թիմերը չեն մնա կարծրացած շտաբերով:

-Երիտասարդական հավաքականի մասին ի՞նչ կասեք և ինչպիսի՞ մասնագետ եք համարում Անտոնիո Ֆլորեսին:

-Երիտասարդականի առջև դրված են ուրույն խնդիրներ: Կան կազմի օբյեկտիվ խնդիրներ: Անտոնիո Ֆլորեսը բարձրակարգ մասնագետ է, ով ամենօրյա աշխատանքներ է կատարում՝ կապված նաև մարզչական կրթության հետ: Շատ կարևոր է, որ իր առջև կոնկրետ խնդիրներ են դրված՝ կապված ֆուտբոլիստների զարգացման հետ: Արդյունքների մասին կարող ենք խոսել դեռևս ավել ցածր տարիքային հավաքականների դեպքում, որտեղ ծրագրերը ներդրված են: Ուրախությամբ եմ նշում՝ Մ-15 հավաքականը լիովին անցել է նոր ծրագրին: Տարվա ընթացքում ունեցել են 5 խաղ՝ 3 հաղթանակ, 1 ոչ-ոքի, 1 պարտություն. ինձ համար առաջին նախանշանն է, որ ինչ-որ բան լինելու է:

-Ցավոտ կետեր էլ կան, որոնցից թերևս գլխավորը իրավիճակն է Առաջին խմբում: Երբ նման խոշոր հաշվներ են գրանցվում, դժվար թե հայկական ֆուտբոլը շահում է…

-Միանգամից ոչինչ չի լինում. թիմերը շատացել են, ուստի նման հաշիվներ կարող են գրանցվել: Անընդհատ խոսվում է պայմանավորված խաղերի մասին. այդ առումով ֆեդերացան աշխատում է: Կա մեկ քրեական գործ, ՀՖՖ-ն համագործակցում է իրավապահ մարմինների հետ: Աշխատանքները պետք է որ շատ արդյունավետ ավարտ ունենան: Վստահ եմ, որ 2020 թվականին այդ խնդիրների մասին չենք լսի:

Առաջին խմբում ունենք շատ լավ օրինակներ՝ «Վեսթ Արմենիան», «Վանը»…: Թիմերի ավելացումը ինքնանպատակ չէ: Արդեն գիտենք խնդիրները:

-Հնարավոր է՝ պատասխանատու հայտարարություն եմ անում, բայց Առաջին խմբում կարող են այնպես կազմակերպել խաղերը, որ պարզելը բարդ լինի: Մեր իրավապահ մարմինները ի զորո՞ւ են բացահայտել այդ ամենը:

-Այո: Մենք ունենք այդ հնարավորությունները: Շատ բան չեմ կարող ասել, կա նախաքննական գաղտնիք: Կգա ժամանակը, երբ ավելի բաց կխոսենք: ՀՖՖ-ում վերահսկում ենք իրավիճակը այդ առումով:

-Ցավոտ խնդիրներից է նաև Հայաստանում մրցավարությունը: Հասկանում ենք՝ երկարաժամկետ խնդիր է, ինչպե՞ս պետք է լուծվի այս հարցը:

-Խնդիրը շատ երկարաժամկետ է: Մեկ բարձրակարգ մրցավար պատրաստելու համար հարկավոր է 6-7 տարի: Մրցավարական նոր բաժինն աշխատում է 3-4 ամիս: Այդ խնդրի լուծման համար քայլեր անում ենք. հավաքել ենք երիտասարդ, տաղանդավոր մրցավարներ, որոնց հետ խումբ է աշխատում: Ակումբների արձագանքի մասին էլ ասեմ. միշտ խոսում են այն դեպքերում, երբ կայացված որոշումներն իրենց դեմ են: Սխալները միտում չեն պարունակում: Նաև հեշտ է սեփական բացթողումներն ու սխալները գցել մրցավարների վրա: Ես հասկանում եմ, որ հայ մրցավարները Եվրոպայում ամենաբարձրակարգը չեն, բայց այդ ուղղությամբ աշխատանքներ տարվում են: Մրցավարական կազմերը երիտասարդացվելու են, ընթացքում պետք է որ շտկումները տեսնենք:

Արման Առաքելյան