Հայաստանի ներկայացուցիչ Արթուր Ավետիսյանը բրոնզե մեդալակիր է դարձել Գերմանիայի Կոտբուս քաղաքում ընթացող սպորտային մարմնամարզության աշխարհի գավաթի խաղարկությունում:
Այս մասին հայտնում է ՀԱՕԿ-ի պաշտոնական կայքը:
Oղակների վարժության եզրափակչում Արթուր Ավետիսյանը երրորդ տեղն է գրավել 14.833 միավորով: Առաջին տեղը զբաղեցրել է 15.133 միավոր վաստակած չինացի Լիու Յանգը, որը նվաճել է միակ օլիմպիական ուղեգիրն այս վարժությունում:
Oղակների վարժությունում Հայաստանի մյուս ներկայացուցիչ Վահագն Դավթյանը 14.825 միավորով գրավել է 5-րդ տեղը: Հարություն Մերդինյանը նժույգի թափեր վարժության եզրափակչում վաստակել է 14.733 միավոր և զբաղեցրել 4-րդ տեղը:
Հիշեցնենք, որ մրցաշարին մասնակցել էր նաև Արթուր Դավթյանը, որը չէր կարողացել հաղթահարել որակավորման փուլի արգելքը նժույգի թափերում, ազատ վարժությունում, հենացատկում ու պտտաձողում:
Աշխարհի գավաթի խաղարկությունը վարկանիշային է Տոկիո-2020 Օլիմպիական խաղերի համար: Հայ մարմնամարզիկներից օլիմպիական ուղեգիր ունի միայն Արթուր Դավթյանը, որը Տոկիո-2020-ում հանդես կգա հենացատկում:
