Մինչև 21 տարեկանների Եվրոպայի 2021 թվականի առաջնության ընտրական փուլի հերթական տուրում Հայաստանի երիտասարդական հավաքականը Կատանիայում հյուրընկալվեց Իտալիայի Մ21 հավաքականին ու 0:6 հաշվով խայտառակ պարտություն կրեց:
Իտալացիների կազմում հաշիվը խաղի արդեն 15-րդ րոպեին բացեց «Էվերթոնի» հարձակվող Մոյզե Քինը, որն առաջին կեսի վերջնամասում նաև դուբլ ձևակերպեց: Իրենց ակտիվում գոլեր գրանցեցին նաև Անդրեա Պինամոնտին (25′), Նիկոլո Զանելատոն (53′), Ջանլուկա Սկամական (57′) և Դավիդե Բետելան (66′):
Նշենք՝ հանդիպման 70-րդ րոպեին դարպասապահ Սևակ Ասլանյանը վնասվածքի պատճառով չկարողացավ շարունակել հանդիպումն ու նրա փոխարեն դաշտ դուրս եկավ Մարկ Գրիգորյանը:
Իտալիայի երիտասարդական հավաքականը 5 խաղից հետո վասակած 13 միավորով A խմբի մրցաշարային աղյուսակի երկրորդ հորիզոնականն է զբաղեցնում, իսկ Հայաստանի երիտասարդական ընտրանին ընդամենը 3 միավոր ունի իր ակտիվում ու գտնվում է նախավերջին՝ 5-րդ տեղում:
Հաջորդ հանդիպումը մեր ընտրանին կանցկացնի մարտի 26-ին Երևանում ընդունելով Շվեդիայի Մ21 հավաքականին, իսկ մարտի 31-ին Հայաստանի Մ21 հավաքականը դարձյալ սեփական հարկի տակ կմրցի Իսլանդիայի իր հասակակիցների հետ:
Խմբի մյուս խաղում առաջատար Իռլանդիայի Մ21 հավաքականը սեփական հարկի տակ ընդունեց Շվեդիայի իր հասակակիցներին ու 3:1 հաշվով հաղթանակ տարավ՝ իր միավորների թիվը հասցնելով 16-ի:
