Կարեն Մուրադյան․ Արարատը լեգենդար պատմություն ունեցող թիմ է․ այստեղ հանդես գալը՝ պատասխանատվություն

Հայաստանի Բարձրագույն խմբի առաջնության ավարտից հետո հայտնի դարձավ, որ Եվրոպա Լիգայի ուղեգիր նվաճած «Շիրակի» կազմի շատ ֆուտբոլիստներ գլխավոր մարզիչ Վարդան Բիչախչյանի գլխավորությամբ հեռանում են թիմից՝ տեղափոխվելով Երևանի «Արարատ»։

Ինչպե՞ս եղավ այդ առաջարկը, չկա՞ արդյոք եվրագավաթային պայքարի շեմին թիմից հեռանալու զղջում և ի՞նչ սպասելիքներ կան նոր թիմից ArmSport-ը զրուցել է Գյումրիից Երևան տեղափոխված 27-ամյա կիսապաշտպան Կարեն Մուրադյանի հետ։

-Կպատմե՞ս՝ ինչպես ստացվեց «Արարատ» տեղափոխությունը։

-Ամեն ինչ անսպասելի ստացվեց։ Առաջնության վերջին խաղից հետո մի շաբաթ արձակուրդ ունեցանք, սակայն լիարժեք չկարողացանք հանգստանալ։ Այդ ընթացքում ինձ տեղեկացրեցին, որ «Շիրակում» շատ մեծ փոփոխություններ են լինելու՝ նոր մարզիչ, ավելի շատ երիտասարդ տեղացի խաղացողներ, և նույն ժամանակ «Արարատ» տեղափոխվելու առաջարկ եղավ։ Ծանր ու անսպասելի էր ամեն ինչ։

«Շիրակից» հեռանալը շատ դժվար էր։ Բանակցությունների ընթացքում քննարկել եմ «Շիրակում» մնալու տարբերակը, սակայն այս պահին այնտեղ ուրիշ մոտեցում է։ Իսկ «Արարատի» առաջարկից տեղեկացել էի, որ թիմը գլխավորելու է Վարդան Բիչախչյանը, «Շիրակի» խաղացողներից շատերն են տեղափոխվելու այստեղ, որ թիմն իր առջև ամենաբարձր նպատակներն է դնելու, ու ինձ հետ հույսեր են կապում․․․այս ամենի արդյունքում ես տեղափոխվեցի «Արարատ»։

-Այսինքն՝ մինչև առաջնության վերջին խաղը չկայի՞ն նման խոսակցություններ, որ «Շիրակում» մեծ փոփոխություններ են սպասվում։

-Ո՛չ, ոչ մի տեսակի խոսակցություն չի եղել, նույնիսկ տեղեկություն չենք ունեցել այդ մասին։ Պայքարել ենք չեմպիոնության համար, ցավոք, ամենակարևոր պահին եղավ այն, ինչ եղավ։ Բայց Եվրոպա Լիգայի ուղեգիր նվաճեցինք, ամեն ինչ նորմալ էր։

-Իսկ հիմա ափսոսանքի զգացում չկա՞, որ ձեր վաստակած ուղեգրից չեք օգտվելու։

-Գիտեք, չեմ ափսոսում, որովհետև այդ ուղեգիրը «Շիրակինն» է, Գյումրիինն է, երկրպագուներինն է, որոնք ամենակարևոր պահին, նույնիսկ սահմանափակումների պայմաններում, էլի թիմի հետ էին։ Ուրախ եմ, որ «Շիրակն» այս տարի խաղալու է եվրագավաթներում ու հաջողություն եմ մաղթում տղաներին։

-Ըստ քեզ՝ այս փոփոխված կազմով «Շիրակը» ինչի՞ կարող է հասնել Եվրոպա Լիգայում։

-Այս հարցը երևի ինձ չպետք է տալ, բայց ես մի բան գիտեմ․ տղաները դաշտ են դուրս գալու ու անմնացորդ պայքարելու են հաղթանակի համար և իրենք կարող են հասնել հաջողության։

-Բայց ընկերական խաղ անցկացրեցիք «Շիրակի» դեմ․ ի՞նչ տպավորություն ստացար այդ թիմից։

-Դե, ընկերական խաղ էր, չես կարող լիարժեք կարծիք կազմել։ Բայց մարտունակ թիմ է։ Մինչև փոփոխությունները շատ լավ խաղ էր, հավասար։

-Այս փոփոխություններից հետո «Շիրակի» երկրպագուները մի փոքր հուսահատ տեսք ունեին․ ինչ-որ խոսք ունե՞ս նրանց ուղղելու։

-Նախևառաջ, ուզում եմ շնորհակալություն հայտնել նրանց աջակցության համար։ Նրանք կարևոր տեղ են զբաղեցնում թիմի կյանքում, ինչի համար շատ շնորհակալ ենք։ Հստակ չեմ հիշում՝ երբ էր, կարծեմ, մրցաշրջանից առաջ, բայց էլի ձեզ տված հարցազրույցում ասել եմ, որ «Շիրակը» մնում է «Շիրակ»։ Նույնը ուզում եմ մեր երկրպագուներին փոխանցել։ Վստահ եմ՝ ամեն ինչ լավ է լինելու, և հուսով եմ, որ մենք նորից կհանդիպենք։

-Երևանյան, արտասահմանյան թիմերում խաղացել ես․ խաղադաշտ դուրս գալիս՝ զգացողություններում տարբերություն կա՞, երբ ներկայացնում ես քո հարազատ քաղաքի թիմը և երբ այլ քաղաքի թիմի կազմում ես դաշտ դուրս գալիս։

-Ինձ համար միշտ ուրիշ զգացողություն է եղել «Շիրակի» կազմում հարազատ քաղաքի համար դաշտ դուրս գալը։ Դա պարտավորեցնող է։ Բայց կարող եմ ասել, որ «Արարատը» լեգենդար պատմություն ունեցող թիմ է։ Հիմա այստեղ հանդես գալը ևս մեծ պատասխանատվություն է։ Պետք է աշխատենք բարձր պահել ակումբի պատիվը։

-Հիմա ինչպիսի՞ թիմ է հավաքվել «Արարատում»։

-Իմ կարծիքով՝ լավ ֆուտբոլիստներ են հավաքվել, լավ կոլեկտիվ է։ Մնում է խաղակցվածությունը հնարավորինս շուտ լավացնենք, ու ամեն ինչ լավ է լինելու։

-Մեկ շաբաթից նոր առաջնությունը կմեկնարկի․ մինչ այդ կհասցնե՞ք բարելավել խաղակցվածությունը։

-Տղաների մեծ մասը փորձառու խաղացողներ են, դրան գումարած՝ մեծ մասը «Շիրակից» են տեղափոխվել։ Կարծում եմ՝ մինչ առաջնության սկսվելն արդեն նորմալ կլինի։

-Քո մարզավիճակն ինչպե՞ս կգնահատես։

-Լավ մարզավիճակում եմ, լավ մրցաշրջան եմ ունեցել, աշխատելու եմ, որ էլ ավելի լավ մրցաշրջան ունենամ։

-«Արարատի» երկրպագուները ի՞նչ կարող են սպասել «Փյունիկի» դեմ առաջնության մեկնարկային խաղից։

-Ամեն ինչ անելու ենք, որ բարձր հորիզոնական զբաղեցնենք այս մրցաշրջանում և ուրախացնենք «Արարատի» երկրպագուներին։ Մեզ համար նրանց աջակցությունը կարևոր է։ «Փյունիկի» դեմ խաղը ևս շատ կարևոր է․ պետք է լավ մեկնարկել նոր առաջնությունում։

Ստելլա Բաբլոյան